Laktaw ngadto sa video

Pugson ba sa mga Saksi ni Jehova ang Ilang mga Anak nga Mag-Saksi?

Pugson ba sa mga Saksi ni Jehova ang Ilang mga Anak nga Mag-Saksi?

Dili, kay ang pagsimba sa Diyos personal nga desisyon. (Roma 14:12) Tudloan sa mga Saksi ni Jehova ang ilang mga anak sa mga prinsipyo sa Bibliya, pero dihang managko na ang mga anak, ang matag usa nila maoy modesisyon kon mag-Saksi ba sila o dili.​—Roma 12:2; Galacia 6:5.

Sama sa kadaghanang ginikanan, gusto sa mga Saksi ni Jehova ang kinamaayohan para sa ilang mga anak. Tudloan nila ang ilang mga anak sa ilang gihunahuna nga makaayo kanila: praktikal nga mga katakos, moral nga mga sukdanan, ug mga pagtulon-an bahin sa relihiyon. Ang mga Saksi ni Jehova nagtuo nga ang Bibliya makatabang sa pagbaton ug kinamaayohang kinabuhi, busa maningkamot sila sa pagtudlo sa ilang mga anak sa mga prinsipyo niini pinaagi sa pag-Bible study kanila ug pagdala kanila sa Kristohanong mga tigom. (Deuteronomio 6:6, 7) Dihang modako na ang anak, siyay modesisyon kon sundon ba niya ang relihiyon sa iyang ginikanan.

 Magbawtismo bag mga masuso (baby) ang mga Saksi ni Jehova?

Dili. Ang Bibliya wala magtudlog pagbawtismo sa mga masuso. Pananglitan, gipakita sa Bibliya nga sa wala pa mabawtismohi ang unang siglong mga Kristohanon, sila nakadungog na sa mensahe, “malipayong midawat” niini, ug naghinulsol. (Buhat 2:14, 22, 38, 41) Busa, aron mabawtismohan, ang usa kinahanglang naa na sa edad nga makasabot sa mga gitudlo sa Bibliya, motuo niini, ug modesisyon nga magkinabuhi uyon sa maong pagtulon-an. Dili gyod nâ mahimo sa usa ka masuso.

Dihang managko na ang mga anak, lagmit modesisyon ra sila nga magpabawtismo. Pero, aron mahimo kana, kinahanglan nilang masabtan ang panaad nga ilang himoon.

 Isalikway ba sa mga Saksi ni Jehova ang ilang mga anak kon dili sila magpabawtismo?

Dili. Bisag maguol ang Saksing mga ginikanan kon ang ilang anak dili modawat sa ilang tinuohan, gimahal gihapon nila ang ilang anak ug dili nila putlon ang relasyon tungod lang kay dili ni mag-Saksi.

Ang matag usa, bisag unsay edad, maoy modesisyon kon magpabawtismo ba o dili

 Nganong iuban sa mga Saksi ni Jehova ang ilang mga anak sa pagsangyaw?

Among iuban ang among mga anak sa pagsangyaw tungod sa daghang rason. *

  • Ang Bibliya nagsugo sa mga ginikanan nga tudloan ang ilang mga anak sa espirituwal nga mga butang ug bansayon sila sa pagsimba sa Diyos. (Efeso 6:4) Kay ang pagsimba naglakip ug publikong pagpahayag sa pagtuo, ang pagsangyaw maoy importanteng bahin sa pagtudlo sa anak maylabot sa Diyos.​—Roma 10:9, 10; Hebreohanon 13:15.

  • Ang Bibliya espesipikong nagdasig sa kabataan sa ‘pagdayeg sa ngalan sa Ginoo.’ (Salmo 148:12, 13, Ang Bag-ong Maayong Balita Biblia) Ang usa ka importanteng paagi sa pagdayeg sa Diyos mao ang pagsulti sa uban bahin kaniya. *

  • Ang mga anak makabenepisyo sa praktikal nga paagi dihang mosangyaw sila uban sa ilang ginikanan. Pananglitan, makakat-on sila sa pagpakig-estorya sa tanang matang sa tawo, ug makaugmad silag bililhong mga hiyas sama sa pagkamabination, pagkamaayo, pagtahod, ug pag-una sa kaayohan sa uban. Mas mapamilyar sab sila sa Kasulatanhong basehanan sa ilang pagtuo.

 Magsaulog bag mga holiday o ubang selebrasyon ang mga Saksi ni Jehova?

Ang mga Saksi ni Jehova dili makigbahin sa relihiyosong mga holiday o ubang selebrasyon nga dili makapalipay sa Diyos. * (2 Corinto 6:14-17; Efeso 5:10) Pananglitan, dili mi magselebrar ug birthday o Pasko, nga dili Kristohanon ug sinugdanan.

Bisan pa niana, malipay ming makig-uban sa among pamilya ug mohatag ug regalo sa among mga anak. Imbes magtapoktapok mi ingong pamilya ug maghinatagayg regalo sa espesipiko lang nga mga adlaw sa tuig, himoon namo ni bisag kanus-a.

Ang Kristohanong mga ginikanan malipayng mohatag ug regalo sa ilang mga anak

^ par. 6 Kasagaran, ang anak sa Saksi dili moubag sangyaw kon dili kauban ang ginikanan o ubang responsableng hamtong.

^ par. 8 Ang Bibliya naghisgot ug mga bata nga nakapalipay sa Diyos kay ilang gisulti sa uban ang ilang pagtuo.​—2 Hari 5:1-3; Mateo 21:15, 16; Lucas 2:42, 46, 47.

^ par. 23 Ang ubang ngalan giilisan.