Sa Unsang Paagi Mahiusa ang Kalibotan?

PARA kanimo, unsay kahulogan sa pulong “panaghiusa”? Alang sa pipila, kana maoy usa ka kahimtang diin walay panagbangi. Pananglitan, kon ang duha o mas daghan pang nasod mopirma ug usa ka tratado ug magkauyon sa kasabotan sa kalinaw, nagkahiusa kono sila. Tinuod ba kana? Dili.

Tagda kini: Sa tibuok kasaysayan, linibo na ka tratado sa kalinaw ang gimugna apan wala tumana. Ngano? Tungod kay ang mga lider sa kalibotan sagad nga mas naghunahuna sa ilang kaugalingong posisyon kay sa kalinaw o panaghiusa. Gawas pa, nahadlok ang pipila ka nasod sa mahimong sangpotanan kon malabwan sa uban ang ilang puwersang militar.

Busa, dili gayod ikaingon nga ang duha ka nasod nagkahiusa tungod lang kay wala sila maggubatay. Pananglitan, dunay duha ka tawo nga nagtion ug pusil sa usag usa. Ikaingon ba nga sila may kalinaw tungod kay igo ra man nilang gition ang pusil ug wala nila kana kablita? Dili gayod! Sama niana ang kahimtang sa daghang nasod karon. Ang maong mga nasod walay pagsalig sa usag usa busa sila nahadlok nga basin dunay usa kanila nga mogamit ug nukleyar nga mga armas. Unsay gihimo aron malikayan kana?

Kahadlok Maylabot sa Nukleyar nga mga Armas—Babag sa Panaghiusa

Para sa daghan, ang solusyon niini mao ang Nuclear Non-Proliferation Treaty (NPT). Ang maong tratado, nga giaprobahan niadtong 1968, nagdili sa mga nasod sa paggama ug nukleyar nga mga armas. Ang katuyoan sa NPT, nga giaprobahan karon sa kapin sa 180 ka nasod, mao ang bug-os nga pagwagtang sa nukleyar nga mga armas.

Daw maayo ang maong katuyoan, apan ang pipila ka kritiko nag-ingon nga ang NPT usa lamang kono ka taktika aron ang mga nasod nga walay nukleyar nga mga armas mapugngan sa paggama niana. Busa, daghan ang nabalaka nga basin bakwion sa ubang nasod ang ilang pagsuportar sa NPT. Sa pagkatinuod, ang pipila ka nasod nagtuo nga dili makataronganon nga did-an sila sa paghimog nukleyar nga mga armas kay sila naghunahuna nga magamit nila kini sa pagpanalipod sa ilang kaugalingon.

Misamot pa kini ka komplikado—ug lagmit nahimo pang mas peligroso—tungod kay ang mga nasod wala did-i sa pagtukod ug mga planta sa koryente nga naggamit ug nuclear reactor. Tungod niini, daghan ang nahadlok  nga basin sekretong naghimog nukleyar nga mga armas ang mga nasod nga nakabaton niining mga plantaha.

Bisan ang mga nasod nga adunay nukleyar nga mga armas lagmit wala magtuman sa NPT. Ang mga kritiko nag-ingon nga dili gayod katuohan nga kunhoran o kaha wad-on niining mga nasora ang ilang nukleyar nga mga armas. Ang usa ka reperensiya nag-ingon nga mahimo kini kon ang mga nasod nga nagkontrahay adunay maayong relasyon ug tiunayng pagsalig sa usag usa, apan dili gayod kini mahitabo.

Ang paningkamot sa tawo nga maangkon ang panaghiusa—bisan pag kini sinsero—wala gayod molampos. Nahibalo na niini ang mga estudyante sa Bibliya tungod kay ang Pulong sa Diyos nag-ingon: “Dili iya sa tawo nga nagalakaw bisan ang pagtultol sa iyang lakang.” (Jeremias 10:23) Ang Bibliya prangka usab nga nag-ingon: “Adunay dalan nga matul-id atubangan sa usa ka tawo, apan ang kataposan niana mao ang mga dalan sa kamatayon.” (Proverbio 16:25) Ang gobyerno sa tawo limitado rag mahimo sa paghiusa sa katawhan. Bisan pa niana, duna kitay paglaom.

Ang Tinubdan sa Tinuod nga Panaghiusa

Sumala sa Bibliya, ang Diyos nagsaad nga ang kalibotan mahiusa apan dili pinaagi sa paningkamot sa tawo. Ang Maglalalang, kansang katuyoan mao nga ang mga tawo magpuyo nga malinawon, makahimo gayod sa kon unsay dili mahimo sa tawo. Daghan ang naghunahuna nga dili kana katuohan. Apan, sukad pa sa sinugdan katuyoan na sa Diyos nga ang tanang tawo magpuyo nga malinawon. a Daghang teksto sa Bibliya ang nagpamatuod nga wala mausab ang katuyoan sa Diyos. Tagda ang pipila ka pananglitan:

• “Dali kamo, tan-awa ang mga kalihokan ni Jehova, kon giunsa niya pagpahinabo ang makapahinganghang mga hitabo sa ibabaw sa yuta. Gipahunong niya ang mga gubat hangtod sa kinatumyan sa yuta. Gibali niya ang busogan ug giputolputol ang bangkaw; ang mga karomata iyang gisunog sa kalayo.”—SALMO 46:8, 9.

• “Dili sila magadaot ni magagun-ob sa tibuok nakong bukid nga balaan; tungod kay ang yuta mapuno sa kahibalo kang Jehova ingon sa katubigan nga nagtabon sa dagat mismo.”—ISAIAS 11:9.

• “Iyang lamyon gayod ang kamatayon hangtod sa kahangtoran, ug ang Soberanong Ginoong Jehova tinong magpahid sa mga luha gikan sa tanang nawong. Ug ang kaulawan sa iyang katawhan iyang wagtangon gikan sa tibuok yuta, kay si Jehova maoy nagsulti niini.”—ISAIAS 25:8.

• “Adunay bag-ong mga langit ug usa ka bag-ong yuta nga atong ginapaabot sumala sa iyang saad, ug niini magpuyo ang pagkamatarong.”—2 PEDRO 3:13.

• “Pagapahiran [sa Diyos] ang tanang luha gikan sa ilang mga mata, ug ang kamatayon mawala na, ni may pagbangotan ni pagtiyabaw ni may kasakit pa. Ang unang mga butang nangagi na.”—PINADAYAG 21:4.

Kini nga mga saad kasaligan. Ngano man? Tungod kay ang Maglalalang, si Jehova nga Diyos,  dunay gahom ug katakos sa paghiusa sa katawhan. (Lucas 18:27) Siya nagtinguha usab sa pagbuhat niana. Sa pagkatinuod, ang Bibliya nag-ingon nga, “gikahimut-an [sa Diyos nga] . . . tigomon pag-usab ang tanang butang diha kang Kristo, ang mga butang sa mga langit ug ang mga butang sa yuta.”—Efeso 1:8-10.

Ang saad sa Diyos nga “usa ka bag-ong yuta” diin “magpuyo ang pagkamatarong” dili damgo lamang. (2 Pedro 3:13) Bahin sa iyang saad, si Jehova nga Diyos nag-ingon: “Kini dili mobalik kanako nga walay sangpotanan, apan kini tinong magbuhat nianang akong gikahimut-an, ug kini tinong magpalampos sa butang nga tungod niana kini akong gipadala.”—Isaias 55:11.

Nahiusa Tungod sa Pulong sa Diyos

Sama sa gihisgotan sa nag-unang artikulo, ang relihiyon maoy usa sa mga hinungdan kon nganong nabahin ang mga tawo. Angay gayod kining tagdon tungod kay kon nagtuo kita nga adunay Maglalalang, makataronganon lamang nga dahomon nato nga adunay kalinaw ug panaghiusa taliwala sa iyang mga magsisimba.

Ang pagkabahinbahin sa mga tawo tungod sa relihiyon wala uyoni ni Jehova ug sa iyang Pulong, ang Bibliya. Ngani, gihukman ni Jehova ug sa Bibliya ang mga relihiyon nga nagsuportar sa tawhanong mga paningkamot sa pagpatunghag panaghiusa inay paluyohan ang katuyoan sa Diyos. Gitawag ni Jesus ang mga lider sa relihiyon sa iyang panahon nga “mga salingkapaw” ug giingnan niya sila: “Si Isaias haom nga nagtagna bahin kaninyo, sa dihang siya miingon, ‘Kining mga tawhana nagpasidungog kanako pinaagi sa ilang mga ngabil, apan ang ilang kasingkasing halayo kaayo kanako. Kawang lamang nga sila nagpadayon sa pagsimba kanako, tungod kay sila nagtudlo sa mga sugo sa mga tawo ingon nga mga doktrina.’”—Mateo 15:7-9.

Sa kasukwahi, ang matuod nga pagsimba naghiusa sa mga tawo. Si Isaias nagtagna: “Mahitabo sa kaulahiang bahin sa mga adlaw nga ang bukid sa balay ni Jehova lig-ong matukod ibabaw sa tumoy sa kabukiran, ug kini igatuboy gayod ibabaw sa kabungtoran; ug nganha niini ang tanang kanasoran magaganayan. Ug siya magahukom gayod taliwala sa mga nasod ug magatul-id sa mga butang labot sa daghang mga katawhan. Ug ilang pagasalsalon ang ilang mga espada nga mga punta sa daro ug ang ilang mga bangkaw nga mga galab. Usa ka nasod dili mobakyaw sa espada batok sa usa ka nasod, ni makakat-on pa sila sa gubat.”—Isaias 2:2, 4.

Ang mga Saksi ni Jehova diha sa kapin sa 230 ka kayutaan karon nagsunod sa instruksiyon nga gitagana ni Jehova nga Diyos kon sa unsang paagi mabatonan ang panaghiusa. Unsay pasukaranan sa maong panaghiusa? Si apostol Pablo misulat: “Isul-ob ninyo ang gugma, kay kini maoy usa ka hingpit nga bugkos sa panaghiusa.” (Colosas 3:14) Ang orihinal nga pulong nga gigamit ni Pablo nga gihubad ug “bugkos” mahimong magtumong sa mga ugat sa lutahan. Ang maong mga ugat sama ka lig-on sa pisi, ug kini adunay duha ka katuyoan. Kini nagsangga sa mga organo sa lawas ug nagdugtong sa mga bukog.

Sama niana ang gugma. Kining hiyasa nakapugong sa mga tawo sa pagpinatyanay. Apan labaw pa niana, ang gugma nga sama sa iya ni Kristo nagtukmod usab sa mga tawo nga lainlain ug kagikan nga magmakigdaiton sa usag usa. Kini makapaarang sa mga tawo sa pagpadapat sa Bulawanong Lagda. Ingon sa nasulat sa Mateo 7:12, si Jesu-Kristo miingon: “Busa, ang tanang butang nga buot ninyo nga pagabuhaton sa mga tawo nganha kaninyo, kinahanglang pagabuhaton usab ninyo sa ingon ngadto kanila.” Pinaagi sa pagsunod niining lagdaa, nabuntog sa daghang tawo ang pagpihigpihig.

“Gugma sa Inyong Taliwala”

Aron mapamatud-an sa mga Saksi ni Jehova nga sila tinun-an gayod ni Kristo, ilang gisunod ang gisulti ni Jesus: “Ang tanan makaila nga kamo akong mga tinun-an, kon kamo adunay gugma sa inyong taliwala.” (Juan 13:35) Ila gayong gipasundayag kanang gugmaha ilabina sa dihang adunay mga panagbangi sa rasa ug kagubot sa politika. Pananglitan, sa dihang nahitabo  ang pagpuo sa tribo sa Rwanda niadtong 1994, gipasundayag sa mga Saksi ni Jehova ang ilang gugma sa usag usa. Ang mga Saksi nga Hutu nagpameligro sa ilang kaugalingon aron panalipdan ang ilang mga igsoon nga Tutsi!

Siyempre, dili gayod kita makadahom nga maugmad sa tanang tawo ang gugma nga makapahiusa sa tibuok kalibotan. Sumala sa Bibliya, ipahinabo kana sa Diyos sa iyang tinudlong panahon. Apan bisan karon pa lamang, posible na nga mahiusa ang mga tawo kon sila adunay gugma sa usag usa.

Sa miaging tuig, ang mga Saksi ni Jehova migugol ug kapin sa usa ka bilyong oras sa pagduaw sa mga tawo ug sa pagpakigsulti kanila bahin sa Bibliya ug sa mga benepisyo niini sa atong kinabuhi karon. Ang tukmang kahibalo sa Pulong sa Diyos nakapahiusa sa milyonmilyong tawo, diin ang uban kanila nagdumot kaniadto sa usag usa. Kini naglakip sa mga Arabo ug Hudiyo, mga Armeniano ug Turko, mga Aleman ug Ruso, sa paghisgot lang ug pipila.

Gusto ka bang makakat-on ug dugang kon sa unsang paagi mahiusa ang mga tawo pinaagi sa Pulong sa Diyos, ang Bibliya? Kon mao, palihog kontaka ang mga Saksi ni Jehova sa inyong lugar, o sulati sila sa adres nga makita sa panid 2.

[Footnote]

[Blurb sa panid 4]

Linibo na ka tratado sa kalinaw ang gimugna apan wala tumana

[Blurb sa panid 7]

Ang pagpadapat sa mga prinsipyo sa Bibliya nakapahiusa sa mga tawo, butang nga wala mahimo sa gobyerno sa tawo

[Hulagway sa panid 5]

Ang Pulong sa Diyos nagpunting sa Tinubdan sa tinuod nga panaghiusa

[Hulagway sa panid 7]

Ang Hutu ug Tutsi nga mga Saksi ni Jehova nag-uban sa pagtukod ug dapit sa pagsimba