Mga Pangutana Gikan sa mga Magbabasa

Diha sa iyang modelong pag-ampo, gipasabot ba ni Jesus nga ang kabubut-on sa Diyos natuman na sa langit bisan tuod wala pa mapalagpot ang daotang mga manulonda?

Sumala sa narekord sa Mateo 6:10, si Jesus nag-ingon: “Matuman unta ang imong kabubut-on, maingon sa langit, mao man usab sa yuta.” Kini nga hangyo mahimong sabton sa bisan hain sa duha ka paagi. Una, ingong pangamuyo nga matuman ang kabubut-on sa Diyos dinhi sa yuta maingon nga kini natuman na sa langit o, ikaduha, ingong hangyo nga kini bug-os nga matuman sa langit ug dinhi sa yuta. Ang kahulogan sa nag-unang mga pulong ni Jesus, “paanhia ang imong gingharian,” nagpakita nga ang ikaduha maoy mas kaharmonya sa Kasulatan. Ug kini nagbanaag sa kahimtang sa dinhi pa si Jesus sa yuta ug sa taas nga yugto human niana. Sa unsang paagi?

Ang basahon sa Pinadayag nagpunting sa duha ka lainlaing mga resulta sa pagkatukod sa Gingharian sa Diyos sa langit. Ang una nag-apektar sa langit mismo, ang ikaduha, sa yuta. Ang Pinadayag 12:7-9, 12 nag-ingon: “Miulbo ang gubat sa langit: Si Miguel ug ang iyang mga manulonda nakiggubat sa dragon, ug ang dragon ug ang mga manulonda niini nakiggubat apan kini wala makadaog, ni may dapit pa alang kanila sa langit. Busa gitambog ang dakong dragon, ang orihinal nga halas, ang usa nga gitawag Yawa ug Satanas, nga nagpahisalaag sa tibuok gipuy-ang yuta; siya gitambog sa yuta, ug ang iyang mga manulonda gitambog uban kaniya. Tungod niini, paglipay kamong kalangitan ug kamong nanagpuyo niini! Alaot ang yuta ug ang dagat, tungod kay ang Yawa nanaog kaninyo, nga may dakong kasuko, kay nahibalo nga hamubo na lamang ang iyang panahon.”

Ang pagpalagpot kang Satanas ug sa iyang mga demonyo gikan sa langit human sa 1914 naghinlo sa langit sa tanang espirituhanong mga rebelde, nga nagdalag dakong kalipay sa maunongon nga manulondang mga anak ni Jehova, nga maoy naghawas sa kadaghanan sa iyang espiritung mga linalang. (Job 1:6-12; 2:1-7; Pinadayag 12:10) Busa, natuman ang hangyo diha sa modelong pag-ampo ni Jesus, kon bahin sa langit. Ang tanang nagpabilin diha sa langitnong dominyo maoy maunongon kang Jehova ug bug-os nga nagpasakop sa iyang soberanya.

Angayng ipasiugda nga sa wala pa kadto mahitabo, sa dihang ang daotang mga manulonda makasaka pa sa langit, sila gisalikway na gikan sa pamilya sa Diyos ug nailalom sa tinong mga restriksiyon. Pananglitan, gipadayag diha sa Judas 6 nga sa unang siglo K.P., sila “gitagana [na] uban ang walay kataposang mga gapos ilalom sa naglugitom nga [espirituwal nga] kangitngit alang sa paghukom sa dakong adlaw.” Sa susama, ang 2 Pedro 2:4 nag-ingon: “Ang Diyos wala magpugong sa pagsilot sa mga manulonda nga nakasala, apan, pinaagi sa pagtambog kanila sa Tartaro [usa ka kahimtang sa tuman nga kaut-otan], nagtambog kanila ngadto sa mga gahong sa naglugitom nga [espirituwal nga] kangitngit aron itagana sa paghukom.” a

Kasukwahi kaayo sa ilang kahimtang sa pagkasinalikway samtang didto pa sa langit, ang daotang mga manulonda adunay dakong awtoridad ibabaw sa yuta. Gani, ang Pulong sa Diyos nagtawag kang Satanas nga “magmamando niining kalibotana,”  ug kini nagtawag sa mga demonyo nga “mga magmamando sa kalibotan niini nga kangitngit.” (Juan 12:31; Efeso 6:11, 12; 1 Juan 5:19) Tungod sa iyang awtoridad, ang Yawa makatanyag kang Jesus sa ‘tanang gingharian sa kalibotan ug sa ilang himaya’ puli sa usa ka buhat sa pagsimba. (Mateo 4:8, 9) Nan, tin-aw nga sa dihang ‘moabot’ ang Gingharian sa Diyos, magpahinabo kinig dagkong mga kausaban sa yuta.

Dinhi sa yuta, ang ‘pag-abot’ sa Gingharian sa Diyos moresulta sa bug-os bag-ong sistema sa mga butang. Ang Gingharian magadugmok sa tanang hinimog-tawo nga mga pagmando ug mahimong bugtong kagamhanan sa yuta. Sa samang higayon, ang mahinadlokon-sa-Diyos nga tawhanong mga sakop niini mahimong “usa ka bag-ong yuta.” (2 Pedro 3:13; Daniel 2:44) Paphaon usab sa Gingharian ang sala gikan sa masinugtanong katawhan ug sa ngadtongadto himoon niini ang tibuok yuta nga usa ka paraiso, sa ingon mawagtang na ang tanang timailhan sa pagmando ni Satanas.—Roma 8:20, 21; Pinadayag 19:17-21.

Sa pagkatapos sa Milenyo, sa dihang matuman na sa Mesiyanikong Gingharian ang kabubut-on sa Diyos alang niini, “ang Anak magpasakop usab ngadto sa Usa nga nagpasakop sa tanang butang ngadto kaniya, aron ang Diyos mahimong tanang butang ngadto sa tanan.” (1 Corinto 15:28) Dayon adunay kataposang pagsulay, nga human niana si Satanas, ang iyang mga demonyo, ug ang bisan kinsang nahisalaag nga rebelyosong mga tawo pagalaglagon sa bug-os diha sa “ikaduhang kamatayon.” (Pinadayag 20:7-15) Human niana, ang tanang intelihenteng mga linalang sa langit ug sa yuta malipayong magpasakop sa mahigugmaong soberanya ni Jehova sa walay kataposan. Sa tanang bahin, kana mao na unya ang bug-os nga katumanan sa modelong pag-ampo ni Jesus.—1 Juan 4:8.

[Footnote]