Kapitulo 32

“Pinaagi Niini ang Tanan Mahibalo nga Kamo Akong mga Tinun-an”

KADTO maoy Nisan 14, 33  K.P., ang kataposang gabii sa yutan-ong kinabuhi ni Jesus. Siya nasayod nga haduol na ang iyang kamatayon, apan wala siya maghunahuna sa iyang kaugalingon. Hinunoa, iyang gipahimuslan kining higayona sa pagdasig sa iyang mga tinun-an.

Si Jesus nasayod nga dili sayon alang kanila human sa iyang pagbiya. Sila mahimong “mga tumong sa pagdumot sa tanang nasod” tungod sa iyang ngalan. (Mat. 24:9) Si Satanas mosulay sa pagbahin ug pagdunot kanila. (Luc. 22:31) Ingong sangpotanan sa apostasiya, motungha ang mini nga mga Kristohanon. (Mat. 13:​24-30, 36-43) Ug ‘tungod sa pag-uswag sa pagkamalapason mobugnaw ang gugma sa kadaghanan.’ (Mat. 24:12) Bisan pa niining tanan, unsay makapahiusa sa iyang tinuod nga mga tinun-an? Labaw sa tanan, ang ilang gugma kang Jehova magasilbing bugkos sa panaghiusa alang kanila. (Mat. 22:​37, 38.) Apan kinahanglan usab nilang higugmaon ang usag usa ug himoon kana sa paagi nga magpalahi kanila gikan sa uban sa kalibotan. (Col. 3:14; 1 Juan 4:20) Unsang matanga sa gugma ang gisulti ni Jesus nga tin-awng magpaila sa iyang tinuod nga mga sumusunod?

Nianang ulahing gabii, si Jesus naghatag niining sugo kanila: “Ako magahatag kaninyog bag-ong sugo, nga kamo maghigugmaay sa usag usa; maingon nga ako nahigugma kaninyo, nga kamo usab maghigugmaay sa usag usa. Pinaagi niini ang tanan makaila nga kamo akong mga tinun-an, kon kamo may gugma sa inyong taliwala.” (Juan 13:​34, 35) Si Jesus mihisgot mahitungod sa gugma ug kapin sa 20 ka beses niadtong gabhiona. Ug tulo ka beses nga iyang gipahayag ang sugo nga sila “maghigugmaay sa usag usa.” (Juan 15:​12, 17) Dayag, ang gihunahuna ni Jesus dili lamang ang iyang 11 ka matinumanong apostoles nga kauban niya niadtong gabhiona apan ang tanang uban pa nga sa ulahi modawat sa tinuod nga Kristiyanidad. (Itandi ang Juan 17:​20, 21.) Ang sugo nga maghigugmaay sa usag usa pagatumanon sa tinuod nga mga Kristohanon sa “tanang adlaw hangtod sa konklusiyon sa sistema sa mga butang.”​—Mat. 28:20.

Apan gipasabot ba ni Jesus nga ang bisan kinsang indibiduwal sa tanang dapit sa kalibotan nga nagpakitag pagkabuotan ug gugma sa ilang isigkatawo pagailhon nang usa ka tinuod nga tinun-an ni Jesus?

“Maghigugmaay ang Usa sa Usa”

Niadtong samang gabhiona, daghan usab ang gisulti ni Jesus mahitungod sa panaghiusa. “Pabilin kamo kanako,” gisultihan niya ang iyang mga tinun-an. (Juan  15:4) Siya miampo nga ang iyang mga sumusunod “mahimong usa,” ug midugang, “maingon nga ikaw, Amahan, ania kanako ug ako anaa kanimo, aron nga sila usab maanaa kanato.” (Juan 17:21) Niining maong konteksto siya nagsugo kanila: “Maghigugmaay ang usa sa usa.” (Juan 13:35) Busa ang ilang gugma igapahayag dili lamang ngadto sa pipila ka suod nga mga higala o sulod sa usa ka kongregasyon. Sa pagsubli sa sugo ni Jesus, si apostol Pedro sa ulahi misulat: “Pagbaton ug gugma alang sa tibuok kapunongan sa mga igsoon [o, ‘ang panag-igsoonay’].” (1 Ped. 2:​17, Kingdom Interlinear; itandi ang 1 Pedro 5:9.) Sila mahimong usa ka suod, tibuok-kalibotang panag-igsoonay. Ang linaing gugma mahimong takos sa tanan sulod sa tibuok-yutang panimalay sa mga magtutuo tungod kay sila pagalantawon man ingong mga igsoong lalaki ug igsoong babaye.

Sa unsang paagi ang maong gugma igapadayag? Unsa ba gayod ang nakapahimong talagsaon, nakapalahi kaayo, mahitungod sa ilang gugma sa usag usa nga ang uban makakita niini nga tin-awng pamatuod sa matuod nga Kristiyanidad?

“Maingon sa Akong Paghigugma Kaninyo”

“Kinahanglang higugmaon nimo ang imong isigkatawo ingon sa imong kaugalingon,” nagpahayag ang Balaod sa Diyos ngadto sa Israel sa kapin sa 1,500 ka tuig una pa sa pagkinabuhi ni Jesus sa yuta. (Lev. 19:18) Hinuon, ang maong gugma alang sa silingan dili mao ang matang sa gugma nga magpalahi sa mga sumusunod ni Jesus. Si Jesus naghunahunag usa ka gugma nga molabaw pa sa paghigugma sa uban sama sa kaugalingon.

Ang sugo sa paghigugmaay sa usag usa maoy, sumala sa giingon ni Jesus, “usa ka bag-ong sugo.” Bag-o, dili tungod kay mas ulahi kana sa Moisesnong Kasugoan, kondili bag-o sa sukod nga ang gugma igapadapat. Maghigugmaay sa usag usa “maingon sa akong paghigugma kaninyo,” gipatin-aw ni Jesus. (Juan 13:34) Ang gugma niya alang sa iyang mga tinun-an maoy kusganon, walay paglubad. Kana maoy nagasakripisyo-sa-kaugalingon nga gugma. Iya kanang gipasundayag pinaagi sa paghimog labaw pa kay sa paghimog pipila ka maayong buhat alang kanila. Iyang gipakaon sila sa espirituwal ug, kon kinahanglanon, giatiman ang ilang pisikal nga mga panginahanglan. (Mat. 15:​32-38; Mar. 6:​30-34) Ug, siyempre, sa pangataposang pamatuod sa iyang gugma, iyang gihatag ang iyang kinabuhi alang kanila.​—Juan 15:13.

Mao kana ang talagsaong matang sa gugma nga gikinahanglan sa “bag-ong sugo,” nga batonan sa tinuod nga mga sumusunod ni Jesus alang sa usag usa. (1 Juan 3:16) Kinsa karong adlawa ang naghatag ug tin-awng pamatuod nga nagatuman sa “bag-ong sugo”? Ang pamatuod nga unang gipresentar niining publikasyona tataw nga nagpunting sa usa ka tibuok-kalibotang kapunongan sa mga Kristohanon.

Sila nailhan, dili pinaagi sa talagsaong porma sa sapot o pila ka dili kasagarang mga kustombre, apan pinaagi sa kusganon ug mainitong pagkasuod sa usag usa. Sila ilado tungod sa pagpasundayag sa gugma nga nakabuntog sa rasanhong mga kalainan ug nasodnong mga utlanan. Sila nailhan tungod sa pagdumili sa pagpakig-away batok sa usag usa bisan pag ang mga nasod nga ilang gipuy-an makiggubat. Ang uban nakadayeg sa ilang pagtinabangay sa usag usa sa panahon sa kalisdanan, sama sa dihang mohampak ang kinaiyanhong mga katalagman o sa dihang  ang pila ka sakop sa ilang panag-igsoonay gilutos tungod sa paghupot ug integridad sa Diyos. Sila andam sa pag-antos sa kalisod o sa pag-atubang sa kapeligrohan aron tabangan ang ilang mga igsoong lalaki ug babaye nga alang kanila nagpakamatay si Kristo. Ug, oo, sila andam nga magpakamatay alang sa usag usa. Ang gugma nga ilang gipasundayag maoy talagsaon diha sa kalibotan nga nagauswag ang pagkahakog. Sila maoy mga Saksi ni Jehova. a

Usa ka pananglitan sa maong gugma nga gipadapat nakita human sa Urakang Andrew, nga mihapak sa baybayon sa Florida, T.B.A., sa sayong mga takna sa kabuntagon sa Lunes, Agosto 24, 1992. Human niana mga 250,000 ka tawo ang nawad-ag balay. Taliwala sa mga biktima maoy linibo ka Saksi ni Jehova. Halos dihadiha dayon ang Nagamandong Lawas sa mga Saksi ni Jehova milihok pinaagi sa pagtudlo ug usa ka komite sa hinabang ug sa paghikay nga mabatonan ang mga pondong hinabang. Ang Kristohanong mga magtatan-aw sa gihampak nga dapit sa walay langan nagkontak sa indibiduwal nga mga Saksi aron sutaon ang ilang mga panginahanglan ug mohatag ug tabang. Sa buntag sa Lunes, ang adlaw sa urakan, ang mga Saksi sa South Carolina, ginatos ka kilometro ang gilay-on, nagpadala na ngadto sa dapit sa katalagman ug usa ka trak nga nakargahan ug mga generator, mga chain saw, ug tubig nga mainom. Sa pagka Martes, dala ang dugang pang mga abiyo nga gidonar, ginatos ka taga-laing lungsod nga mga boluntaryo ang nangabot aron sa pagtabang sa lokal nga mga igsoon sa pag-ayo sa mga Kingdom Hall ug pribadong mga balay. Mahitungod sa gihimong mga tabang, usa ka dili-Saksing babaye nga nagpuyo duol sa usa ka Kingdom Hall miingon: “Kini sa pagkatinuod mao ang Kristohanong gugma nga gihisgotan sa Bibliya.”

Kana bang gugmaha maibanan human sa usa o duha maayong buhat? Kana ba itumong lamang ngadto sa mga tawo nga samag rasa o nasyonalidad sa usa? Dili gayod! Ingong gisangpotan sa huyang nga kahimtang sa politikal ug ekonomiya sa Zaire, sa 1992 kapin sa 1,200 ka Saksi didto ang nawad-an sa ilang tanang kabtangan. Ang ubang mga Saksi sa Zaire mitabang dayon kanila. Bisan tuod sila mismo naglisod, sila usab nagpaambit sa mga kagiw nga midangop sa Zaire gikan sa Sudan. Sa wala madugay, ang hinabang nga mga abiyo miabot gikan sa Habagatang Aprika ug Pransiya; kini naglakip sa mais, inasinan nga isda, ug mga tambal​—mga butang nga magamit gayod nila. Sa makadaghan, gitagana ang tabang, sumala sa mga kahimtang. Ug samtang padayon kining gihimo, ang susamang tabang ginatagana sa daghang ubang kayutaan.

Apan, ang ilang pagbaton sa maong gugma wala makapahimo sa mga Saksi ni Jehova nga dili-manumbaling. Ilang nasabtan nga,ingong mga sumusunod ni Jesu-Kristo, kinahanglang mopadayon sila sa pagbantay.

[Footnote]

[Blurb sa panid 710]

Unsang matanga sa gugma ang gisulti ni Jesus nga tin-awng magpaila sa iyang tinuod nga mga sumusunod?

[Blurb sa panid 711]

Sila mahimong usa ka suod, tibuok-kalibotang panag-igsoonay

[Kahon sa panid 712]

“Ang mga Saksi Nag-atiman sa Isigka-Saksi​—Ug sa Uban”

Ubos sa maong ulohan, ang “Miami Herald” nagtaho mahitungod sa gihimong mga tabang sa mga Saksi ni Jehova sa South Florida human sa kalaglagan nga gipahinabo sa Urakang Andrew niadtong Agosto 1992. Ang artikulo nag-ingon: “Walay mausa sa Homestead ang nagasira ug kusog sa mga pultahan ngadto sa mga Saksi ni Jehova nianang semanaha​—bisan pag sila may mga pultahan nga isirag kusog. Mga 3,000 ka boluntaryong Saksi gikan sa lainlaing dapit sa nasod ang mihugop sa dapit nga gihampak sa katalagman, una aron tabangan ang isigka-saksi, unya aron tabangan ang uban. . . . Mga 150 ka toneladang pagkaon ug mga abiyo ang gipadala pinaagi sa usa ka sentral nga lokasyon sa pag-organisar didto sa Assembly Hall sa kasadpang Broward County ngadto sa duha ka Kingdom Hall diha sa dapit sa Homestead. Gikan sa mga tigomanan, ang mga trabahante mangadto sa lainlaing dapit kada buntag sa pagpang-ayo sa nadaot nga mga balay sa igsoong mga Saksi. . . . Usa ka temporaryong kusina nga nahimutang sa gihampak nga dapit kusog kaayong nakaandam ug mga pagkaon alang sa 1,500 ka tawo, tulo ka beses sa usa ka adlaw. Ug dili mga hot dog ug mga donat lang. Ang mga boluntaryo gitagan-an ug ginama-sa-balay nga tinapay, ginama sa balay nga lasagna, gisalad nga preskong utanon, linat-an, mga flapjack ug French toast​—ang tanan gikan sa gidonar nga mga sagol.”​—Agosto 31, 1992, panid 15A.