Naoia i Taem Blong Jusum Fiuja Blong Yu

“[God] i mekem man, mo man ya i tekem fasin blong hem, i olsem hem stret. Fastaem, hem i mekem tu man nomo, wan we i man mo wan we i woman.”—Jenesis 1:27.

OL TOK ya we oli stap long faswan buk blong Baebol oli soemaot wan long ol bigfala wok we God “i wokem oli naes long stret taem blong olgeta,” hemia taem hem i givim laef we i stret gud long faswan man mo woman, Adam mo Iv. (Prija 3:11, NW) Jeova God we i wokem tufala i talem long tufala se: “I gud yutufala i gat plante pikinini blong yutufala, blong olgeta we bambae oli kamaot biaen long yutufala, bambae oli save go stap long olgeta ples long wol. Nao bambae yufala i save mekem evri samting long wol ya oli stap aninit long han blong yufala. Mi mi putum yufala blong yufala i bos long ol fis, wetem ol pijin, mo ol narafala samting we i gat laef we oli stap long wol ya.”—Jenesis 1:28.

Long ol tok ya, God i talemaot long tufala, plan blong hem long saed blong wol ya. Tufala i mas gat pikinini mo lukaot long wol, mekem fulwol i kam wan paradaes we tufala mo ol pikinini blong tufala oli save stap long hem. God i no makemaot wan taem we bambae tufala i ded long hem, nogat. Defren olgeta, God i givim janis long tufala blong kasem wan nambawan fiuja. Sipos tufala i jus gud mo tufala i laef folem tingting blong God, bambae tufala i save laef olwe long pis mo glad.

 Tufala i mekem wan nogud jus, mo frut we i kamaot hemia se, olgeta man oli stap kam olfala mo oli ded. From samting ya, olfala Job i talem se: “Mifala man we i bon long wol ya, mifala i no strong. Laef blong mifala i sotfala nomo, mo i fulap long trabol.” (Job 14:1) ?Wanem i gorong?

Baebol i eksplenem se, “wan man nomo i statem fasin blong sin long wol ya. Mo from we hem i mekem sin, hem i ded. Be frut blong samting ya, hemia we ol man oli stap ded, from we olgeta oli mekem sin.” (Rom 5:12) Man ya we i jusum blong no obei long tok blong God we i klia nomo, hemia Adam. (Jenesis 2:17) From we Adam i jusum olsem, hem i lusum janis we hem i gat blong laef olwe long wan paradaes long wol. Mo hem i mekem se ol pikinini blong hem tu oli lusum laef ya, hem i pasem sin mo ded i go long olgeta. I luk olsem se i no gat rod blong oli save kasem wan gudfala fiuja bakegen. ?Be i tru se i no gat rod?

Wan Taem Blong Ol Samting Oli Kam Niuwan

Plante yia biaen, God i pulum man blong raetem Sam blong talem se: “Ol stret man ya bambae oli tekem graon ya i blong olgeta, mo bambae oli stap long hem gogo i no save finis.” (Ol Sam 37:29) Yumi save sua se promes we God i mekem long garen blong Iden bambae i kamtru, from we Baebol i tokbaot ol nambawan samting we God bambae i mekem i no longtaem, i se: “Hem bambae i ravemaot wota blong ae blong olgeta. Nao bambae i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem. Ol samting ya blong bifo oli lus olgeta.” Biaen God hem wan i talem se: “!Yu luk! Mi mi stap mekem olgeta samting oli kam niuwan bakegen.”—Revelesen 21:4, 5.

From we i gat wan stret taem blong evri samting, i gat wan kwestin we yumi mas ansa long hem, hemia se: ?Wetaem ol samting bambae oli kam niuwan bakegen, blong ol nambawan promes blong God oli kamtru? Ol Witnes blong Jeova we oli wokem magasin ya, oli stap traehad blong pulum ol man blong tingbaot se yumi stap laef naoia long taem we Baebol i kolem “ol las dei,” mo se klosap nao i taem blong God i tekem aksen blong ‘mekem olgeta samting oli niuwan.’ (2 Timoti 3:1, NW) Mifala i askem strong long yu blong stadi long Baebol mo lanem moa long saed blong ol gudfala samting we yu save kasem long fiuja. Mifala i leftemap tingting blong yu tu blong obei long tok ya se: “Yufala i mas lukaot Jeova taem yufala i gat janis yet blong faenem hem. Yufala i mas singaot long hem taem hem i stap klosap yet long yufala.” (Aesea 55:6, NW) I klia we God i no makemaot ol samting long laef blong yumi. !Defren olgeta, fiuja blong yumi blong laef olwe i dipen bigwan long jus we yumi mekem naoia!

[Tok blong makem poen long pej 8]

“!Yu luk! Mi mi stap mekem olgeta samting oli kam niuwan bakegen”