Wan God We i Rere Blong Fogivim Man
Kam Klosap Long God
Wan God We i Rere Blong Fogivim Man
“YU, YU gud tumas long mifala, yu stap fogivim mifala, yu stap tekemaot ol sin blong mifala.” (Ol Sam 86:5) Ol gudgudfala tok ya blong Baebol i mekem yumi sua se Jeova God i glad blong fogivim yumi. Samting we i bin hapen long laef blong aposol Pita i soemaot klia se ‘fasin blong Jeova blong fogif i bigwan.’—Aesea 55:7, NW.
Pita i wan gudfala fren blong Jisas we i klosap moa long hem, i bitim plante narafala fren blong hem. Be long laswan naet blong laef blong Jisas long wol, Pita i bin letem fasin blong fraet long man i winim hem, mo biaen hem i mekem wan bigfala sin. Long yad blong haos ya we oli bin jajem Jisas long fasin we i no stret folem loa, Pita i talem long fored blong ol man se hem i no save Jisas nating—i no wan taem nomo we hem i talem samting ya, be tri taem. Nao afta long namba tri taem we Pita i tok strong blong haedem samting ya, Jisas i “tanemraon, i lukluk stret i kam long Pita.” (Luk 22:55-61) Traem tingbaot filing blong Pita taem Jisas i lukluk stret long hem. Wantaem nomo, Pita i luksave bigfala sin we hem i bin mekem, nao hem i ‘harem nogud tumas, i krae.’ (Mak 14:72) Aposol Pita i tanem tingting blong hem from sin we hem i mekem. Be ating hem i stap fraet se maet God bambae i no save fogivim hem, from we hem i bin giaman tri taem se i no save Jisas.
Afta we Jisas i laef bakegen, hem i storian wetem Pita, mo i sua se biaen, tingting blong Pita i no moa hafhaf long saed blong fasin blong God blong fogivim man. Jisas i no yusum ol strong tok, i no talem tok blong jajem hem tu. Defren olgeta, hem i askem long Pita se: “?Yu yu lavem mi?” Pita i ansa se: “Yes Masta, yu save we mi mi lavem yu.” Nao Jisas i talem long hem se: “Ale, yu givim kakae long ol smol sipsip blong mi.” Jisas i askem kwestin long hem namba tu taem, mo Pita i givim semfala ansa bakegen, maet wetem moa paoa long voes blong hem tu. Nao Jisas i se: “Ale, yu lukaot gud long ol sipsip blong mi.” Nao Jisas i askem semfala kwestin ya long hem namba tri taem, i se: “?Yu yu lavem mi?” Nao “Pita i harem nogud” mo i talem se: “Masta. Yu yu save olgeta samting. Yu save we mi mi lavem yu.” Jisas i ansa, i se: “Ale, yu givim kakae long ol sipsip blong mi.”—Jon 21:15-17.
Jisas i save ansa blong ol kwestin ya finis. ?Sipos i olsem, from wanem hem i askem olgeta? Jisas i save wanem i stap long hat blong man. Taswe hem i save finis se Pita i lavem hem. (Mak 2:8) Be taem Jisas i askem ol kwestin ya, hem i givim janis long Pita blong soemaot tri taem se hem i rili lavem Jisas. Jisas i talem trifala tok ya long ol ansa blong hem, i se: “Givim kakae long ol smol sipsip blong mi. . . . Lukaot gud long ol sipsip blong mi. . . . Givim kakae long ol sipsip blong mi.” Trifala tok ya oli leftemap tingting blong aposol ya we i tanem tingting blong hem finis. Oli soemaot long hem se Jisas i trastem hem yet. Tingbaot, Jisas i stap givim wan bigfala wok long Pita, hemia blong lukaot gud long wan samting we i sas we i sas long tingting blong hem—ol gudfala man we oli stap folem hem olsem ol sipsip. (Jon 10:14, 15) !I sua se Pita i bin haremgud tumas blong save se Jisas i trastem hem yet!
Yes, i klia se Jisas i fogivim aposol Pita we i tanem tingting blong hem from sin we hem i mekem. From we Jisas i stap soemaot ol fasin mo ol rod blong Papa blong hem, mo i mekem samting ya long fasin we i stretgud olgeta, taswe yumi save talem se Jeova tu i fogivim Pita. (Jon 5:19) Jeova i no hafhaf nating long fasin blong hem blong fogivim man. Defren olgeta, hem i wan God we i gat bigfala sore, mo ‘i stap fogivim man’ we i tanem tingting blong hem from sin blong hem. ?Save ya i leftemap tingting blong yu?