Plante man long wol oli sot long kakae. ?Olsem wanem? ?I no gat inaf kakae long wol? Si i gat plante kakae i stap. Ol man oli faenemaot se olgeta kakae we ol fama long wol oli stap karem long garen blong olgeta, i naf blong fidim 12 bilian man. Be yumi 7 bilian man nomo long wol. Taswe ?from wanem ol man oli sot long kakae? Plante taem samting ya i kamaot from we ol man oli tingbaot mane nomo, oli no seraot kakae long fasin we i stret, mo oli westem kakae.

Wan ripot i soemaot se 24 pesen blong ol man we oli wok long faenans, oli talem se oli save brekem loa sipos samting ya i save halpem olgeta blong kam antap. Mo 16 pesen blong olgeta ya oli talem se oli save kilim wan man i ded, “sipos oli luk se ol man bambae oli no save faenemaot olgeta.”

Long Ajentina, 3 long evri 5 tija oli askem taem blong spel, from we oli wari tumas no from nogud fasin long skul.

I no longtaem, long Saot Koria bambae ol man oli laef wanwan nomo from we plante famle naoia oli stap seraot mo plante olfala oli laef olgeta wan nomo.

Gavman blong Jaena i talem se long yia 2016 bambae hem i putum sam loa we ol man oli mas folem blong katemdaon doti we oli stap sakem long win. Be i luk olsem se long evri tri taon long Jaena, i gat tu long olgeta we bambae oli no naf blong folem ol loa ya. Antap long hemia, bighaf blong wota we oli pamem aninit long graon blong man i dring, be oli talem se hem i “nogud no i rabis olgeta.”