Rom 9:1-33
-
Pol i harem nogud from olgeta we oli prapa man Isrel (1-5)
-
Tru pikinini blong Ebraham (6-13)
-
God i gat raet blong mekem samting we hem i wantem, mo man i no gat raet blong askem kwestin from (14-26)
-
Ol man we oli olsem plet we hem i wantem mekem kros blong hem i kasem olgeta, mo ol man we oli olsem plet we hem i wantem sore long olgeta (22, 23)
-
-
God bambae i sevem smol man nomo (27-29)
-
Isrel i foldaon (30-33)
9 Mi mi man blong Kraes mo mi talem trutok. Tabu spirit i lidim tingting blong mi we i save jajem mi, taswe mi mi no giaman taem mi talem se,
2 mi mi sore tumas mo oltaem hat blong mi i soa.
3 Mi mi rere blong stap longwe long Kraes olsem wan man we bambae i kasem panis, sipos samting ya i save givhan long ol brata blong mi we oli famle blong mi,
4 hemia ol man Isrel. Olgeta ya, God i adoptem olgeta finis, i givim haenem long olgeta, i mekem kontrak wetem olgeta, i givim Loa long olgeta, i givim janis long olgeta blong oli mekem tabu wok blong hem, mo i mekem plante promes long olgeta.
5 Olgeta ya oli kamaot long ol olfala blong yumi bifo, mo Kraes tu i kamaot long laen blong olgeta. I gud yumi presem God gogo i no save finis, hem i gat paoa antap long olgeta samting. Amen.
6 Be hemia i no min se tok blong God i foldaon finis, from we i no evri man we oli kamaot long Jekob we oli prapa man “Isrel.”
7 Mo nating se oli pikinini* blong Ebraham, be i no olgeta evriwan we oli pikinini blong hem. Baebol i talem se: “Pikinini* blong yu bambae i kamaot long Aesak.”
8 Hemia i min se i no olgeta pikinini blong Ebraham we oli rili pikinini blong God, be olgeta we oli bon from promes, olgeta nomo oli tru pikinini* blong Ebraham.
9 From we God i mekem promes ya se: “Long stret taem olsem, bambae mi kam mo Sera bambae i gat wan pikinini boe.”
10 Be hem i no mekem promes long taem ya nomo. Hem i mekem promes tu, taem Rebeka i gat bel long tufala twin, we papa blong tufala hem i Aesak ya we i olfala blong yumi bifo.
11 God i tingting finis long fasin blong jusum wan man. Hem i no lukluk wok we man i mekem, be hem i jusum man nomo we hem i wantem singaotem. Taswe taem tufala twin ya i no bon yet mo tufala i no mekem wan samting we i gud no i nogud yet,
12 God i talem long mama blong tufala se: “Fasbon bambae i kam slef blong sekenbon.”
13 Mo olsem we Baebol i talem: “Mi mi lavem Jekob, be mi no laekem Esao nating.”
14 ?Bambae yumi talem wanem? ?God i no gat stret fasin? !Si, hem i gat!
15 Hem i talem long Moses se: “Sipos mi wantem sore long wan man, bambae mi sore long hem, sipos mi wantem lavem wan man, bambae mi lavem hem.”
16 Taswe, hemia i no dipen long samting we man i wantem no long samting we hem i traehad blong mekem,* be i dipen long God ya we i gat sore.
17 Long Baebol, God i talem long Fero se: “Mi mi letem yu yu stap laef blong mi yusum yu blong soemaot paoa blong mi mo blong mi mekem olgeta man long wol oli talemaot nem blong mi.”
18 Olsem nao, hem i sore long man we hem i wantem sore long hem, be hem i letem man we i wantem mekem stronghed, i mekem stronghed.
19 Maet bambae yufala i talem long mi se: “?From wanem hem i stap faenem poen long ol man yet? ?Hu i save blokem samting we hem i wantem?”
20 ?Be yu yu hu blong yu stap ansabak long God? Yu ting se samting we man i wokem i save tokbak long man we i wokem hem, se: “?From wanem yu wokem mi olsem?”
21 ?Olsem wanem? ?Man blong mekem graonpot i no gat raet blong tekem graon ya we i stap long han blong hem, mo i mekem tu plet long hem, we wan i blong yusum long spesel taem, mo narawan i blong yusum enitaem?
22 God i wantem soemaot kros blong hem long ol man mo i wantem mekem oli save paoa blong hem. Be hem i gat longfala tingting long ol man we oli olsem plet we hem i wantem mekem kros blong hem i kasem olgeta, mo we i stret nomo blong oli lus.
23 Hem i mekem olsem blong soemaot haenem blong hem long ol man we oli olsem plet we hem i wantem sore long olgeta, hemia olgeta we bambae oli kasem praes we hem i rerem finis.
24 Yumi nao olgeta ya. Hem i singaot yumi, yumi kamaot long ol man Jiu mo long ol man blong ol neson tu.
25 Olsem we God i talem long buk blong Hosea, se: “Olgeta we oli no man blong mi, bambae mi singaot olgeta se ‘ol man blong mi,’ mo mi singaot woman ya we mi no lavem hem se ‘mi lavem yu.’
26 Mo long ples we mi talem long olgeta se, ‘Yufala i no man blong mi,’ bambae oli singaot olgeta se ‘ol pikinini blong God ya we i laef.’”
27 Mo tu, Aesea i tokbaot Isrel se: “Nating se ol man Isrel oli plante olsem sanbij long solwota, be God bambae i sevem smol nomo long olgeta.
28 Jehova* bambae i askembak kaon long wol ya, bambae hem i mekem kwiktaem nomo mo i finisim.”
29 Mo tu, olsem Aesea i talemaot bifo se: “Sipos Jehova* blong ol ami i no lego wan pikinini* i stap wetem yumi, bambae yumi kam olsem Sodom, mo bambae yumi kam sem mak olsem Gomora.”
30 ?Bambae yumi talem wanem? Nating se ol man blong ol neson oli no stap folem stret fasin, be oli kam stret man long fes blong God from bilif blong olgeta.
31 Be ol man Isrel, nating se oli stap traehad blong kam stret man folem loa, be oli no kasem mak blong loa ya.
32 ?From wanem i olsem? From we oli ting se oli save kam stret man from wok, be i no from bilif. Oli kikim “ston ya we i save mekem man i foldaon.”
33 Hemia i olsem tok blong Baebol we i talem se: “!Yufala i luk! Long Saeon, mi mi putum wan ston blong mekem man i foldaon, wan bigfala ston we i blokem rod blong olgeta. Be man we i bilif long hem, hem bambae i no harem nogud.”
Ol futnot
^ PT: “laen.”
^ PT: “laen.”
^ PT: “laen.”
^ PT: “Taswe i no long man we i wantem no long man we i resis.”
^ Yu luk Diksonari.
^ Yu luk Diksonari.
^ PT: “laen.”
