Rom 16:1-27

  • Pol i tokbaot Fibi, wan sista we i stap givhan long kongregesen (1, 2)

  • Halo long ol Kristin long Rom (3-16)

  • Woning long saed blong olgeta we oli stap mekem man i seraot (17-20)

  • Olgeta we oli wok wetem Pol, oli talem halo (21-24)

  • Naoia tabu tokhaed i kam long klia ples (25-27)

16  Mi mi wantem blong yufala i save sista ya blong yumi, Fibi, we i stap givhan long kongregesen ya long Kengkria,  blong yufala i save welkamem hem long Masta olsem we i stret blong ol tabu man oli mekem, mo blong yufala i givhan long hem sipos hem i sot long sam samting, from we hem i givhan gud long mi mo plante narafala.  Yufala i pasem halo blong mi long Priska* mo Akwila we tufala i stap joen wetem mi long wok blong Kraes Jisas.  Tufala ya i rere blong lusum laef* blong tufala from mi.* I no mi nomo we mi talem tangkiu long tufala, be olgeta man long kongregesen blong ol narafala neson tu oli talem tangkiu.  Mo yufala i pasem halo long kongregesen we i stap mit long haos blong tufala. Yufala i pasem halo long gudfala fren blong mi Epaenetas, we hem i fas man long Esia we i kam disaepol blong Kraes.  Pasem halo long Meri we i wok had blong givhan long yufala.  Pasem halo long Andronikas mo Junias we tufala i famle blong mi mo mifala i bin stap long kalabus wanples. Ol aposol oli save gud tufala, mo tufala i joen long Kraes longtaem moa long mi.  Yufala i pasem halo blong mi long gudfala brata blong mi Ampliatas, we i joen long Masta.  Pasem halo long Obanas, we i joen wetem mifala long wok ya blong Kraes, mo long gudfala fren blong mi Stakis. 10  Pasem halo long Apeles. Man ya, Kraes i glad long hem. Mo yufala i talem halo long olgeta we oli stap long haos blong Aristobolas. 11  Pasem halo long Herodion we i famle blong mi. Mo yufala i talem halo long olgeta we oli stap long haos blong Nasisas, olgeta ya oli joen long Masta. 12  Pasem halo long tufala woman ya Trifaena mo Trifosa we tufala i wok strong long wok blong Masta. Mo yufala i talem halo long gudfala fren blong yumi Perisis, from we hem i wok strong long wok blong Masta. 13  Pasem halo long Rufas we Masta i jusumaot hem, mo long mama blong hem we i mama blong mi tu. 14  Pasem halo long Asingkritas, mo Flegon, mo Heremes, mo Patrobas, mo Heremas mo ol brata we oli stap wetem olgeta. 15  Pasem halo long Filologas mo Julia, mo Nereas mo sista blong hem, mo Olimpas, mo olgeta tabu man we oli stap wetem olgeta. 16  Taem yufala i talem halo long yufala, i gud yufala i kis* long yufala. Olgeta kongregesen blong Kraes oli talem halo long yufala. 17  Ol brata, mi mi talem strong long yufala se yufala i mas lukaot gud mo yufala i mas stap longwe long olgeta we oli stap mekem ol man oli seraot, mo oli mekem ol man oli foldaon, from we oli agens long ol tok ya we ol man oli tijim yufala finis long hem. 18  Ol man we oli stap mekem olsem, oli no slef blong Masta blong yumi Kraes, be oli slef blong ol samting we olgeta nomo oli wantem.* Oli stap tok flas mo oli tok swit blong spolem hat blong ol man we oli olsem pikinini. 19  Olgeta man oli luksave se yufala i stap obei, mo mi mi glad tumas long yufala. Be mi mi wantem we yufala i waes long ol samting we oli gud, be long ol samting we oli nogud, yufala i no mas save nating. 20  I no longtaem God ya we i givim pis bambae i smasem Setan, i mekem yufala i purumbut long hem. Prea blong mi se Masta blong yumi Jisas i gohed blong kaen long yufala. 21  Timoti we i stap wok wetem mi, hem i talem halo long yufala. Lusias, mo Jeson, mo Sosipata we oli famle blong mi, olgeta tu oli talem halo long yufala. 22  Mi, Tosias, we mi raetem leta ya, mi talem halo long yufala long nem blong Masta. 23  Gaeas ya we mi stap long haos blong hem mo we olgeta kongregesen oli stap mit long haos blong hem, hem i talem halo long yufala. Erastas we i man blong lukaot* long mane blong taon, mo brata blong hem Kwotas, tufala i talem halo long yufala. 24  * 25  Gud nius we mi talemaot mo tok long saed blong Jisas Kraes oli soemaot se God i save mekem yufala i stanap strong. Gud nius ya i joen wetem tabu tokhaed ya we God i soemaot. Tokhaed ya i stap haed longtaem, 26  be naoia hem i mekem i kam long klia ples. Ol man blong ol narafala neson oli save long tabu tokhaed ya from ol profet tok long Baebol. Hemia i stret wetem tok blong God ya we i stap blong olwe. Hem i wantem se olgeta neson oli bilif long hem nao oli obei long hem. 27  God nomo i waes. Mo long nem blong Jisas Kraes, yumi leftemap hem gogo i no save finis. Amen.

Ol futnot

Narafala nem blong hem “Prisila.”
PT: “nek.”
NT: “from sol blong mi.”
PT: “wan kis we i tabu.” Hemia wan kis we ol Kristin oli mekem taem oli mitim olgeta.
NT: “oli slef blong bel blong olgeta.”
NT: “man we i bos.”
Vas ya i no stap long sam olfala hanraet, mo i klia se hem i no kamaot long God.