Rom 12:1-21

  • Givim bodi blong yufala i go long God olsem wan sakrefaes we i laef (1, 2)

  • Defdefren presen be wan bodi nomo (3-8)

  • Laef blong wan tru Kristin (9-21)

12  Ol brata. From we God i sore long mi, mi mi askem long yufala blong yufala i givim bodi blong yufala i go long God olsem wan sakrefaes we i laef mo i tabu, mo we God i glad long hem. Hemia wan tabu wok we yufala i mas yusum gud tingting blong yufala blong mekem.  Yufala i no mas letem fasin blong yufala i kam olsem fasin blong wol* ya, be yufala i mas jenisim tingting blong yufala blong yufala i jenis fulwan, olsem nao bambae yufala i save pruvum se samting we God i wantem i gud, i stret gud, mo hem i glad long hem.  From we God i kaen tumas long mi, mi mi talem long yufala se i no mas gat wan long yufala we i tinghae long hem bitim mak. Yufala i mas gat stret tingting folem mak blong bilif we God i givim long yufala wanwan.  Bodi blong yumi i gat plante haf blong hem, be ol haf ya oli no mekem sem wok.  Long sem fasin, nating se yumi plante be yumi evriwan i joen long Kraes olsem wan bodi nomo, mo yumi wanwan yumi olsem ol haf blong bodi we yumi joen long yumi.  God i kaen tumas long yumi, nao hem i givim presen long yumi wanwan we i defdefren. Sipos presen ya i blong talemaot profet tok, i gud yumi talemaot profet tok stret long mak blong bilif we hem i givim.  Sipos presen ya i blong mekem wok blong narafala, i gud yumi mekem. No sipos wan man i stap tij, i gud hem i gohed blong tij.  No sipos wan man i stap givim advaes blong givhan long narafala, i gud hem i gohed blong mekem olsem. No sipos wan man i stap givimaot ol samting,* i gud hem i rere blong givim* nomo. No sipos wan man i lukaot long wok,* i gud hem i wok strong long wok ya. No sipos wan man i stap soemaot sore, i gud hem i glad blong mekem.  Yufala i mas lavem ol man we yufala i no giaman. Yufala i mas agensem ol samting we oli rabis, be yufala i holemstrong long ol samting we oli gud. 10  Yufala i mas lavlavem yufala olsem we yufala i brata nomo. Mo oltaem yufala wanwan i mas faswan blong ona long yufala. 11  Yufala i mas wok had, mo yufala i no mas les.* Yufala i mas letem tabu spirit i mekem se yufala i wok olsem we faea i laet. Yufala i mas wok slef blong Jehova.* 12  Yufala i mas glad from we yufala i gat hop. Yufala i mas stanap strong long taem blong trabol. Mo yufala i mas prea oltaem. 13  Yufala i mas serem samting we yufala i gat wetem ol tabu man we oli nidim samting. Mo oltaem yufala i mas gat fasin ya blong tekem ol narafala oli kam long haos blong yufala. 14  Yufala i mas gohed blong toktok kaen long* ol man we oli stap spolem yufala. Yufala i toktok kaen long ol man, mo yufala i no singaot trabol i kam long olgeta. 15  Sipos ol man oli glad, yufala i glad wetem olgeta. Sipos ol man oli krae, yufala i krae wetem olgeta. 16  Yufala i mas tingbaot ol narafala man olsem we yufala i tingbaot yufala. I nogud yufala i putum tingting blong yufala long ol samting we oli hae,* be yufala i mas putum tingting blong yufala long ol samting we oli daon. Yufala i no mas ting se yufala i waes from save blong yufala nomo. 17  Sipos wan man i mekem i nogud long yufala, yufala i no mas givimbak fasin ya long hem. Yufala i mas mekem ol samting we olgeta man bambae oli luk se i stret. 18  Sipos i gat rod, yufala i mas mekem bes blong yufala blong yufala i gat pis wetem olgeta man. 19  Ol gudfala fren, yufala i no mas givimbak, be yufala i letem God i soemaot kros blong hem long man we i mekem rong, from we Baebol i talem se: “Jehova* i talem se, ‘Mi bambae mi givimbak. Mi nao bambae mi givim panis.’” 20  Be sipos enemi blong yu i hanggri, yu givim kakae long hem. Sipos hem i tosta, yu givim wota long hem. Taem yu mekem olsem, i olsem we yu hivimap sakol we i hot long hed blong hem.”* 21  Yu no mas letem ol rabis samting oli winim yu, be yu mas gohed blong mekem ol gudfala samting blong winim ol rabis samting.

Ol futnot

Yu luk Diksonari.
NT: “i stap givhan.”
NT: “givhan.”
NT: “i stap lidim wok.”
NT: “yufala i no pleplei long wok.”
Yu luk Diksonari.
PT: “gohed blong blesem.”
NT: “Yufala i no mas wokem ol tingting we oli hae.”
Yu luk Diksonari.
Hemia i blong mekem tingting blong man ya i kam sofsof, nao strong fasin ya blong hem i ronaot.