Rom 4:1-25
4 Sipos i olsem, ?bambae yumi talem se olfala blong yumi Ebraham i winim wanem?
2 Sipos God i talemaot se Ebraham i wan stret man from ol wok we hem i mekem, bambae hem i gat risen blong tok flas, be i no long fes blong God.
3 ?Be Baebol i talem wanem? Hem i talem se: “Ebraham i bilif long Jehova,* nao hem i luk hem olsem wan stret man.”
4 Man we i wok, hem i kasem pei. Pei ya i no wan presen, be hem i pei blong wok we hem i mekem.*
5 Be man we i no wok be i bilif long God ya we i stap talemaot se wan sinman i stret man, bilif blong hem i mekem se God i luk hem olsem wan stret man.
6 Deved tu i tokbaot glad blong man we God i luk hem se i wan stret man be i no from wok we hem i mekem. Hem i talem se:
7 “Olgeta we God i fogivim ol rabis fasin we oli mekem, mo i kavremap* ol sin blong olgeta, oli glad.
8 Mo man we Jehova* bambae i no tingbaot sin blong hem, hem i glad.”
9 ?Olsem wanem, ol man ya nomo we oli sakomsaes oli kasem glad ya, no ol man we oli no sakomsaes oli kasem tu? Yumi talem finis se: “God i luk Ebraham se hem i wan stret man from bilif blong hem.”
10 ?Wetaem God i luk hem se hem i wan stret man? ?Taem hem i no sakomsaes yet no taem hem i sakomsaes finis? Hem i long taem ya we hem i no sakomsaes yet.
11 Mo God i talem long hem blong hem i sakomsaes, mo hemia i wan saen. Hemia wan mak blong soemaot se God i luk hem se hem i wan stret man from bilif blong hem taem hem i no sakomsaes yet. Long rod ya, hem i save kam papa blong olgeta we oli gat bilif taem oli no sakomsaes yet, blong God i save luk olgeta se oli stret man.
12 Mo hem i save kam papa blong ol pikinini we oli stap folem fasin blong sakomsaes, mo tu blong olgeta ya we oli stap wokbaot folem bilif we papa blong yumi Ebraham i gat, taem hem i no sakomsaes yet.
13 I no loa we i mekem se Ebraham no pikinini* blong hem i kasem promes ya se wol ya bambae i blong hem. Bilif blong hem nao i mekem se God i luk hem olsem wan stret man, nao i mekem promes ya long hem.
14 Sipos promes ya i blong olgeta ya nomo we oli stap folem loa, bilif i blong nating nomo, mo promes ya tu i finis.
15 Loa i pulum kros blong God i kam, be sipos i no gat loa, bambae i no gat man i brekem loa.
16 Ebraham i kasem promes ya from bilif blong hem, mo hemia i soemaot se God i kaen tumas. Mo ol pikinini* blong hem tu oli kasem promes ya. I no olgeta ya nomo we oli stap folem Loa, be olgeta ya tu we oli stap folem bilif blong Ebraham we i papa blong yumi evriwan.
17 (Hemia i olsem we Baebol i talem, i se: “Mi mi putumap yu blong yu papa blong plante neson.”) Samting ya i hapen long fes blong God ya we hem i bilif long hem. God ya i mekem dedman i laef bakegen, mo i tokbaot ol samting we oli no kamtru yet olsem we oli kamtru finis.*
18 Hem i hop mo i bilif se maet hem i save kam papa blong plante neson, nating we i luk olsem se samting ya bambae i no kamtru. Bilif blong hem i stanap long tok ya we i talem se: “Bambae yu gat plante pikinini.”*
19 Mo nating se bilif blong hem i no kam slak, be hem i tingbaot bodi blong hem se i ded finis (from we hem i gat samwe long wan handred yia), mo i tingbaot se Sera i olfala tumas blong i gat bel.*
20 Be promes blong God i mekem se hem i no gat tu tingting. Bilif blong hem i givim paoa long hem, nao hem i stap leftemap nem blong God,
21 mo hem i bilif fulwan se God bambae i mekem promes blong hem i kamtru.
22 From samting ya, “God i luk hem olsem wan stret man.”
23 Be tok ya se, “God i luk hem” oli no raetem i go long hem nomo,
24 be oli raetem i kam long yumi tu we God bambae i luk yumi se yumi stret man, from we yumi bilif long hem we hem i mekem Jisas Masta blong yumi i laef bakegen.
25 God i letem ol man oli kilim Jisas i ded from ol sin blong yumi, mo i mekem hem i laef bakegen. God i mekem olsem blong hem i save talemaot se yumi stret man long fes blong hem.
Ol futnot
^ Yu luk Diksonari.
^ NT: “hem i kaon we oli mas pem long hem.”
^ NT: “fogivim.”
^ Yu luk Diksonari.
^ PT: “laen.”
^ PT: “laen.”
^ MNT: “mo i singaot samting we i no stap yet blong i kam.”
^ PT: “laen.”
^ NT: “Sera i no save bonem pikinini.”
