Balaba Sana no Bulanda Kabili Tabupwa Bwangu

UUFWAILISHA ilyashi umo alefwaya ukwishiba ifyo abafyashi bomfwa nga papita inshita ukufuma apo umwana wabo afwilile. Nomba line, atumine ifipepala apali amepusho ku bafyashi bamo bamo abafwililwe abana kabili abo papitileko inshita apo abana babo bafwilile. Abafyashi bamo tabayaswike no kwasuka. BaVladimir, abafwililwe umwana umwaume ninshi palipita imyaka isano, batile na nomba cilankosela sana ukulanda pa mwana wandi. *

Abafyashi abengi balaba sana no bulanda pa mfwa ya mwana. Napapita imyaka 10 ukutula apo baWilliam bafwililwe umwana wa myaka 18 uwanwenene pa menshi, kabili baWilliam batile, “Na nomba ndomfwa sana ubulanda, kabili ubu bulanda tabwakapwe.” Ilyo papitile imyaka isano ukutula apo umwana wa baLucy umwaume afwilile mu kupumikisha fye, batile: “Pa kubala, nalemona kwati taafwa kwati fye bufi. Naleumfwa kwati ndeloota fye iciloto icibi kabili nomba line nalashibuka. Ilyo papitileko inshita e lyo nasumine ukuti ca cine alifwa, kabili takabwele. Napapita imyaka isano apo umwana wandi afwilile, lelo limo, na ino nshita ndalila nga ndi neka.”

Mulandu nshi abafyashi bomfwila sana ubulanda, kabili cinshi tabupwila bwangu, nge fyo caba kuli baVladimir, baWilliam, na baLucy? Natulande pali fimo ifilenga.

Mulandu Nshi Bomfwila Sana Ubulanda?

Ilyo umwana afyalwa, abafyashi balomfwa bwino sana kabili ifyo bomfwa pa mwana te kuti filingane ne fyo bomfwa pa bantu bonse abashala. Ilyo balelela akamwana kabo, ukukatamba ilyo kaleele, no kumona ifyo kaleseka, balomfwa bwino sana kabili balaba ne nsansa. Abafyashi abakwata icitemwiko balasakamana bwino abana babo. Balabasambilisha imibele isuma no mucinshi. (1 Abena Tesalonika 2:7, 11) Ilyo abana balekula no kulakonka ifyo balebasambilisha, abafyashi balomfwa bwino kabili benekela ukutila abana babo bakakula bwino.

Abafyashi ababika amano ku bana balabombesha ukubasakamana. Nalimo balasunga ne ndalama nangu ifipe fimo pa kuti bakaafwe abana babo ukuikwatila amayanda ku ntanshi. (2 Abena Korinti 12:14) Ifi abafyashi babombesha ukupoosa inshita iikalamba ne ndalama ishingi pa kusakamana umwana, filangilila fye ukuti abafyashi tabafwaya ukuti  umwana wabo akafwe. Umwana nga afwa, ninshi umulimo wa bafyashi uwa kumukusha wapelela pa kati, kabili ne fyo baleenekela ninshi apo pene fyapwa. Imfwa ilalenga ukutemwa konse uko abafyashi batemenwe umwana ukuputuka. Bashala fye aba bulanda pantu ifyo bamutemenwe ne fyo balemusakamana ninshi fyonse fyapwa. Abafyashi balomfwa sana ubulanda kabili ubulanda bwabo tabupwa bwangu.

Na Baibolo yalilanda ukuti abafyashi nga bafwilwa umwana balomfwa sana ubulanda kabili ubulanda tabupwa bwangu. Baibolo ilatweba icacitike ilyo Yakobo uwaliko kale aumfwile ukuti umwana wakwe Yosefe nafwa. Itila: “Yakobo alepwile ifya kufwala fyakwe, afwele no lusamu mu musana, no kuloosha mwane inshiku ishingi. Kabili baimine bonse abana bakwe abaume na bana bakwe abanakashi ku kumusansamusha; lelo akene ukusansamuka, atile, Pantu nkatentemukila ku Mbo [nelyo inshiishi] ndelilo mwana wandi.” Palipitile imyaka iingi, Yakobo aleloosha fye umwana wakwe uo alemona kwati alifwa. (Ukutendeka 37:34, 35; 42:36-38) Na umbi uo Baibolo ilandapo uwaumfwile sana ubulanda, mwanakashi wa busumino Naomi uwafwililwe abana bakwe abaume babili. Alyumfwile sana ubulanda ica kuti alefwaya no kwalula ishina lyakwe ilya kuti Naomi, ilyalola mu kuti “Ubusuma,” alefwaya balemwita ati Mara, ilyalola mu kuti “Ubulanda.”—Ruti 1:3-5, 20, 21.

Baibolo ilalanda ukuti ca cine abafyashi balomfwa ubulanda nga bafwilwa. Lelo ilalanda na pa fyo Yehova akosha abaleloosha. Mu cipande cikonkelepo, twalalanda pali fimo fimo ifyo Lesa acita pa kusansamusha abaleloosha.

[Futunoti]