Muno nshiku, takwaba umuntu uushikwata amafya. Icacindama kwishiba ifya kucita pa bwafya tukwete e lyo no kulacita fye ifyo twingaba na maka ya kucita ukulingana no bwafya twakwata. Nga kuti mwabombesha no kucefyako ubwafya bwenu, ninshi cili fye bwino. E lyo ku ntanshi ifintu nga fyawamako ninshi kuti cawama. Lelo lyonse mulesubila ukuti ku ntanshi ifintu fikawama.

Baibolo yalaya kuti ku ntanshi abantu bakekala bwino sana ukwabula ifya kubasakamika. Bakaba ne nsansa kabili tabakalekwata amafya tukwata pali ino nshita pamo nga ukufilwa ukucita ifyo tulefwaya, ukukanakwata ifyo tulekabila, e lyo no kuba no bulanda. (Esaya 65:21,22) Baibolo itila uyu ukaba e “umweo wine wine.”—1 Timote. 6:19.

“Kabili bakakuula amayanda no kwikalamo; bakalima na mabala ya myangashi no kulya ifisabo fya yako. Tabakakuule amayanda e lyo bambi bakekalemo; tabakalime amabala e lyo bambi bakalye ifisabo. Pantu ifyaba inshiku sha muti e fikaba inshiku sha bantu bandi; kabili umulimo wa minwe yabo abasalwa bandi bakasekelamo nga nshi.”—Esaya 65:21, 22.