BUSHE ilyo mwali abaice finshi mwalefwaya ukucita nga mwakula? Limbi mwalefwaya ukuupa nelyo ukuupwa, nangu nalimo mwalefwaya ukusambilila ukubomba bwino umulimo umo nelyo ukwingila incito iisuma. Lelo limo ifintu filaaluka. Amafya yamo ayabula ukwenekela ayo tukwata yalalenga twafilwa ukucita ifyo twalefwaya ukucita. Ifi fine e fyo caali na kuli Anja, ba Delina na ba Gregory.

  • Anja uwikala ku Germany, bamusangile no bulwele bwa kansa ninshi ali fye ne myaka 21, pali ino nshita cilamwafya no kufumina pa nse.

  • Ba Delina abekala ku United States, balilwala ubulwele ubulenga imicincili ukuleka ukubomba bwino ubo beta ukuti dystonia. E lyo kabili, balasunga na bandume yabo batatu abalemana.

  • Ba Gregory abekala ku Canada balilwala icintemfwila e kutila ubulwele ubulenga umuntu ukulasakamana sana.

Nangu ca kuti balikwata aya mafya, Anja, ba Delina, na ba Gregory tabekalila fye ukulaililila ubulanda. Cinshi cabafwa?

Ipinda lya mu Baibolo limo litila: “Bushe ulanenuka mu bushiku bwa macushi? Awe ninshi amaka yobe yanono.” (Amapinda 24:10) Ifyo ili ipinda lilandapo fya kuti ifyo tumona ifintu kuti fyalenga ifintu fyamoneka kwati na fibipa sana nelyo iyo. Abantu abekalila fye ukuililila ubulanda pa mafya bakwata, balafilwa ukucita ne fintu fimo ifyo bengaba na maka ya kucita. Lelo abantu abatontonkanya pa fisuma ifyo bakwata balatwalilila ukuba ne nsansa nangu bakwate amafya ya musango nshi.

Moneni ifyo ifi twalandapo fyayafwa Anja, ba Delina na ba Gregory.