Tinikeni pa kuti muye ku filimo

Tinikeni pa kuti mumone imitwe iilimo

ICIPANDE ICIKALAMBA | IFYA KUCITA NGA MWAKWATA AMAFYA

Ubwafya: Ukulaumfwa Sana Ubulanda

Ubwafya: Ukulaumfwa Sana Ubulanda

BUSHE mulomfwa sana ubulanda, ukufulwa sana, nelyo ukwenda ne cikonko ku mukoshi? Ukumfwa ifi kuti kwalamupwila inshita na maka ya kucita ifintu ifyacindama. Nomba kuti mwacita shani nga mwalikwata ubu bwafya? *

UMUNTU UO BAIBOLO YALANDAPO: DAVIDI

Imfumu Davidi limo yalesakamana kabili yaleba no bulanda sana. Nomba finshi fyayafwile ukuba ne nsansa? Davidi ashiile fyonse mu minwe ya kwa Lesa. (1 Samwele 24:12, 15) Kabili alilembele ne fyo aleumfwa, e lyo apo ali ne citetekelo sana alepepa lyonse kuli Lesa. *

IFYO BA GREGORY BACITA

Nga fintu tulandilepo mu cipande ca kubalilapo, ba Gregory balikwata ubulwele bwa cintemfwila ubulenga umuntu ukusakamana sana. Batile, “Nalesakamana sana ica kuti nalesakamana na pa fishilingile.” Bushe ba Gregory bacitile shani pa kuti belasakamana sana? Batile “icangafwile, nshalesuusha ifyo umwina mwandi na banandi balecita pa kungafwa. Na kabili, nalile ku cipatala ku kumona bashing’anga abaishibe ifingi pa bulwele nalwala pa kuti ningeshibilapo na fimbi pali ubu bulwele. Ilyo natampile ukukonka ifyo bashing’anga banjebele, nalitampile ukumfwako bwino. Nangu ca kuti na pali ino nshita limo ndomfwa ubulanda sana, nalishiba ifilenga, e lyo ne fya kucita pa kuti ng’umfweko bwino.”

“Umutima wa nsansa muti uusuma, lelo umutima uwa bulanda umya ifupa.”—Amapinda 17:22

IFYO MWINGACITA

Nga mulomfwa sana ubulanda, muleeshako ukucita ifi:

  • Muleleemba ifyo muleumfwa.

  • Muleebako balupwa na banenu ifyo muleumfwa.

  • Mwilamona kwati nga mwaumfwa ubulanda ninshi ca cine ifintu na fibipa. Muleyipusha amuti ‘bushe ifi ng’umfwa ukuti nshacindama ca cine?’

  • Mwilasakamikwa sana, ukufulwa nelyo ukwenda ne cikonko ku mukoshi. Mu nshita ya kulatontonkanya fye pa filemuletela ubulanda, mulecitako fimbi ifingalenga mwaleka ukusakamana sana. *

Icishinka ca Kuti: Ilingi line, icilenga tuleumfwa ububi te bwafya tukwete, lelo fintu tumona ubo bwafya.

^ par. 3 Limo icilenga ukuti umuntu aleumfwa sana ubulanda kulwala, e ico alingile ukuya ku cipatala. Abalemba Loleni! tabasalila abantu ifyo bafwile ukucita pa kupwisha ubwafya bakwete. Kanshi cila muntu afwile ukusalapo ifya kucita.

^ par. 5 Amalumbo ayengi ayaba muli Baibolo, mapepo ya kwa Davidi.

^ par. 13 Nga mulefwaya ukwishibilapo na fimbi pali ili lyashi, moneni icipande cili mu Ulupungu lwa kwa Kalinda ulwa July 1, 2015, icileti “Ifyo Twingacita pa Kucefyako Amasakamika”.