Bushe Ukufwaya Indalama Ishingi Kulemulwalika?

CINSHI mwingafwaya ukucita nga mwakwate ifyuma ifingi ku ntanshi? Bushe kuti mwaleka ukubombesha mwatendeka ukwikala fye? Bushe kuti mwaleka incito pa kutila mulekwata inshita iikalamba iya kuba pamo no lupwa lwenu e lyo no kuba pamo ne fibusa fyenu? Nelyo bushe kuti mwatendeka ukubomba umulimo umo uo mwatemwisha? Nomba icipapusha ca kuti, abantu abengi abakwata ifyuma tabacita fyonse ifi. Lelo, babika fye amano ku kufwaya indalama ishingi pa kutila balipile inkongole nangu ukufwaya fye ukunonkelapo ifyuma na fimbi.

Lelo bamo abafwaya ukunonka sana, baleiluka ukuti ukutemwisha indalama kulelenga balelwala amalwele yamo, indupwa shabo ukonaika, e lyo na bana babo ukuba fye cimbi cimbi. Shino nshiku amabuuku, bamagazini, amalyashi ya pa TV, na mavidio filesoka abafwaya indalama ishingi pa bubi bwaba mu kushifwaisha lelo balebakoselesha ‘ukwangusha imikalile.’ Amabuuku ayengi yalanda ukuti ukufwaisha ukunonka kuti kwakulwalika, umutwe kuti walakalipa umo shacela e lyo no kulwala amalwele yambi.

Lelo kwena, te nomba twaishiba ukuti ukutemwishe ndalama kulatuletelela. Papita imyaka nalimo 2,000 apo Baibolo yalandile aiti: “Abafwaisha ukuba ne fyuma bawila mwi tunko kabili mu citeyo kabili mu lunkumbwa ulwingi ulwa kutumpa kabili ulwa kucena, ifyo fiibisha abantu mu bonaushi kabili mu kupomonwa. Pantu ukutemwe ndalama e shinte lya bubi bwa misango yonse, kabili pa kutinamina ukutemwa kwa musango yu bamo balilufiwa ku citetekelo no kuilasaulamo abene amacushi ayengi.”—1 Timote 6:9, 10.

Lelo bushe ico ca cine? Bushe cine cine abafwaisha ukukwata indalama ishingi no kunonka sana balailetela amacushi ayengi? Nelyo bushe balikwata fyonse ifyo bafwaya, ifyuma, ubumi busuma, kabili bushe indupwa shabo sha nsansa? Ifyasuko fili mu cipande cikonkelepo.