NDEMONA ulesumina ukuti bambi balitucila ubukalamba, nelyo ubucindami na maka. Kuti watila nani uwatucila?— Ni Yehova Lesa. Ngo Mwana wakwe, Kasambilisha Mukalamba? Bushe na wene alitucila?— Ee, alitucila.

Yesu aleikala na Lesa ku muulu. Ali Mwana wa ku mupashi, nelyo malaika. Bushe Lesa alipangile bamalaika bambi, nelyo abana ba ku mupashi?— Ee, apangile bamalaika abengi sana. Aba bamalaika na bo balitucila amaka.—Amalumbo 104:4; Daniele 7:10.

Bushe uleibukisha ishina lya kwa malaika walandile na Maria?— Ali ni Gabriele. Aebele Maria ukuti umwana wakwe ali no kuba Mwana wa kwa Lesa. Lesa abikile ubumi bwa Mwana wakwe uwa ku mupashi muli Maria pa kuti Yesu akafyalwe pe sonde.—Luka 1:26, 27.

Bushe walisumina ico cipesha mano? Bushe walisumina ukuti Yesu aleikala ku muulu na Lesa?— E fyo Yesu alandile. Bushe Yesu aishibe shani ifi fintu? Cisuma, ilyo ali umwaice, Maria napamo alimwebele ifyo Gabriele alandile. Na kabili, Yosefe afwile alyebele Yesu ukuti Wishi wa cine ni Lesa.

Ilyo Yesu abatishiwe, Lesa alandile ukufuma ku muulu, ati: “Uyu e mwana wandi.” (Mateo 3:17) Kabili ubushiku bwa kuti mailo akafwa, Yesu apepele ati: “Mwe Tata, muncindamikile  mu cinso cenu cine ku bukata nakwete kuli imwe ilyo pano isonde pacili tapalabako.” (Yohane 17:5) Yesu aipwishe ukubwelela mu kwikala na Lesa ku muulu. Kuti ayaikala shani kulya?— Kano nga Yehova Lesa na kabili amulenga ukuba umuntu wa ku mupashi, nelyo malaika.

Nomba ndefwaya ukukwipusha icipusho cacindama. Bushe bamalaika bonse basuma? Uletipo shani?— Kwena, inshita imo bonse bali abasuma. Ni pa mulandu wa kuti Yehova e wabapangile, kabili conse ico apanga cilaba icisuma. Lelo malaika umo aishileba uwabipa. Cali shani?

Pa kusanga icasuko, tufwile ukubwelela ku nshita lintu Lesa apangile umwaume wa kubalilapo no mwanakashi, Adamu na Efa. Abantu bamo balanda ati ilyashi lyabo kashimi fye. Lelo Kasambilisha Mukalamba alishibe ukuti ili lyashi lyali lya cine.

Lintu Lesa apangile Adamu na Efa, ababikile mwi bala ilisuma ilyaleitwa ati Edene. Lyali ni parka, paradaise. Bali no kukwata abana abengi, ulupwa ulukalamba, no kwikala mu Paradaise umuyayaya. Lelo bali no kusambila isambililo lyacindama. Lisambililo ilyo twalandapo kale. Natumone nga tuleibukisha.

 Yehova aebele Adamu na Efa ukuti kuti balya ifisabo fyonse balefwaya ku fimuti fya mwi bala. Lelo kwali icimuti cimo ico tabali no kulyako. Lesa alibebele icali no kucitika nga balyako. Atile: ‘Ukufwa mukafwa.’ (Ukutendeka 2:17) E co, lisambililo nshi Adamu na Efa balekabila ukusambilila?—

Balekabila ukusambilila icumfwila. Ubumi bwaba mu kumfwila Yehova Lesa! Adamu na Efa tabali no kulanda fye ati bali no kumumfwila. Bali no kulacita ifyalelanga ukuti balemumfwila. Nga baleumfwila Lesa, bali no kulanga ukuti balimutemwa no kuti balefwaya abe Kateka wabo. Lyene nga baikele umuyayaya mu Paradaise. Lelo nga balya ku cimuti, cali no kulanga cinshi?—

Cali no kulanga ukuti tabaletasha pa fyo Lesa abapeele. Bushe aubako nga waliumfwila Yehova?— Pa kutendeka, Adamu na Efa balicitile co. Lelo umuntu umo uwabacilile abepele Efa. Amulengele ukukanaumfwila Yehova. Bushe ali nani?—

Baibolo ilanda ati insoka e yalandile na Efa. Lelo walishiba ukuti insoka tashilanda. E co ilya  nsoka yalandile shani?— Malaika alengele camoneka kwati insoka e yalelanda. Lelo ni uyo malaika e walelanda. Uyu malaika atendeke ukutontonkanya ifintu fyabipa. Alefwaya Adamu na Efa ukulamupepa. Alefwaya balecita ifyo alanda. Alefwaya ukuba e Lesa.

E co ulya malaika wabipa alengele Efa alatontonkanya pa fintu fyabipa. Ukupitila mu nsoka, amwebele ati: ‘Lesa tamwebele icishinka. Tamwakafwe nga mwalya ku cimuti. Mukaba na mano nga Lesa.’ Bushe nga walisumine ifyo ilya nsoka yalelanda?—

Efa atendeke ukufwaya icintu Lesa ashamupeele. Aliile icisabo ku cimuti babakeenye. Lyene apeeleko na Adamu. Adamu tasumine ifyo insoka yalandile. Lelo ukufwaya ukuba na Efa kwacilile ifyo atemenwe Lesa. E co na o aliile icisabo ca ku cimuti.—Ukutendeka 3:1-6; 1 Timote 2:14.

Cinshi cacitike?— Adamu na Efa baishileba abashapwililika, balikotele, no kufwa. Kabili pa mulandu wa kuti bali abashapwililika, abana babo  bonse bali abashapwililika kabili balikotele no kufwa. Lesa tabepele! Ubumi cine cine bwaba mu kumumfwila. (Abena Roma 5:12) Baibolo itweba ati malaika abepele Efa etwa Satana Kaseebanya, kabili bamalaika bambi abaishileba ababipa betwa ifibanda.—Yakobo 2:19; Ukusokolola 12:9.

Nomba, bushe waumfwikisha umulandu ulya malaika musuma Lesa apangile aishileba uwabipa?— Pantu atendeke ukutontonkanya ifyabipa. Alefwaya Ukucila bonse. Alishibe ukuti Lesa aebele Adamu na Efa ukukwata abana, kabili alefwaya bonse balemupepa. Kaseebanya afwaya bonse ukukanaumfwila Yehova. E co esha ukulenga twalatontonkanya ifyabipa.—Yakobo 1:13-15.

Kaseebanya alanda ati takwaba uwatemwa Yehova. Alanda ati tatwatemwa Lesa no kuti tatufwaya ukucita ifyo Lesa alanda. Alanda ati tumfwila fye Yehova lintu ifintu fileenda ukulingana ne fyo tulefwaya. Bushe Kaseebanya alanda ica cine? Bushe e fyo twaba?

Kasambilisha Mukalamba atile Kaseebanya wa bufi! Yesu alangile ukuti alitemwa Yehova pa Kumumfwila. Kabili Yesu taleumfwila fye Lesa lintu cali icayanguka. Alemumfwila lyonse, na lintu abantu bambi balelenga camukosela. Ali uwa cishinka kuli Yehova ukufika na ku mfwa. E mulandu wine Lesa amubuushishe ku kwikala umuyayaya.

E co kuti watila umulwani wesu umukalamba nani?— Ni Satana Kaseebanya. Bushe kuti wamumona?— Iyo! Lelo twalishiba ukuti eko aba no kuti alitucila amaka. Lelo nani wacila Kaseebanya?— Ni Yehova Lesa. E co twalishiba ukuti Lesa kuti atucingilila.