LESA WA MAKA YONSE e Shikulu mu bubumbo bonse. Ubumi bwesu, ubwa pali nomba na ku ntanshi, bwashintilila pali wene. Alikwata amaka ya kulambula na maka ya kukanda. Alikwata amaka ya kupeela ubumi na maka ya kwipaya. Nga twasenaminwa na wene, tukabomba bwino; nga tatusenaminwe, tukacula. Kanshi calicindama nga nshi ukuti ukupepa kwesu kwapokelelwa na wene!

Abantu bapepa mu nshila ishingi. Nga imipepele yaba nge nshila, bushe ninshi imipepele yonse ilapokelelwa kuli Lesa? Iyo taipokelelwa. Kasesema wa kwa Lesa, Yesu, alangile ukuti kwaba inshila shibili epela. Atile: “Impongolo yasalala, kabili inshila yapabuka iitwala ku boni, kabili bengi abengilako. Lelo inshila iitwala ku mweo ya kamfyemfye kabili yalifyenenkana, kabili banono abaisanga.”—Mateo 7:13, 14.

Kwaba fye imisango ibili iya mipepele: imo itwala ku mweo e lyo imbi itwala ku boni. Ico uno broshuwa alembelwe kumwafwa ukusanga inshila iitwala ku mweo wa muyayaya.