Tinikeni pa kuti muye ku filimo

Tinikeni pa kuti mumone imitwe iilimo

Inte sha kwa Yehova

Saleni ululimi Cibemba

Daniele 1:1-21

1  Mu mwaka walenga butatu ukutula apo Yehoyakimu+ atendekele ukuteka Yuda, e mo Nebukadnesari imfumu ya Babiloni aishile ku musumba wa Yerusalemu no ku-ushinga.+  Mu kuya kwa nshita Yehova apeele imfumu ya Yuda+ mu minwe ya kwa Yehoyakimu ne fipe+ fya mu ng’anda ya kwa Lesa wa cine fimo fimo, na o Nebukadnesari afitwele ku calo ca Shinari+ ku ng’anda ya kwa lesa wakwe; ne fipe afingishe mu ng’anda ya kututilamo ifyuma ifya kwa lesa wakwe.+  Awe imfumu yaebele Ashipenasi umukalamba+ wa bacilolo bakwe aba kwi sano ukuti pa bana ba kwa Israele na pa bana ba ku bufumu na pa bana ba bakankaala asalepo+  abana abashabamo akalema+ nangu kamo, lelo abamoneka bwino, abashilimuka mu mano+ yonse kabili abasalapuka mu kwishiba, abeluka bwangu ifintu,+ abengabombela mwi sano lya mfumu;+ no kubasambilisha amabuuku no lulimi lwa bena Kaldi.  Kabili, imfumu yabapimiine ifya kulya fya cila bushiku pa fya maliila+ ya mfumu na pa mwangashi uo yalenwa, no kubaliisha bwino pa myaka itatu, pa kuti imyaka itatu nga yapwa bakalebombela imfumu.  Awe pa balumendo abasalilwe pali na bana abaume abaYuda, Daniele,+ Hanania, Mishaele na Asaria.+  Kabili umukalamba wa bacilolo ba kwi sano abenike amashina.+ Ainike Daniele ati Belteshasari;+ na Hanania amwinike ati Shadraki; na Mishaele amwinike ati Meshaki; e lyo Asaria amwinike ati Abednego.+  Lelo Daniele apangile mu mutima wakwe ukukanaikowesha+ ku fya maliila ya mfumu na ku mwangashi uo yalenwa. Kabili apapeete umukalamba wa bacilolo ba kwi sano ukuti amusuminishe ukukanaikoweshako.+  Awe Lesa wa cine alengele umukalamba wa bacilolo ba kwi sano ukuba ne cikuuku kuli Daniele no kumumfwilako uluse.+ 10  E ico umukalamba wa bacilolo ba kwi sano atile kuli Daniele: “Ine ndetiina shikulu imfumu, uwamupimiine ifya kulya ne fya kunwa.+ Nga ca kuti imfumu yamumona muli abaonda pa menso ukucila abana bambi aba mushinku wenu, kuti mwaletelela umutwe wandi ku mfumu.” 11  Lelo Daniele atile kuli kalinda uo umukalamba+ wa bacilolo ba kwi sano asontele ukwangalila Daniele, Hanania, Mishaele na Asaria: 12  “Mukwai esheni ababomfi benu pa nshiku ikumi (10), muletupeela fye ifilimwa+ e fyo tulelya kabili tulenwa fye amenshi; 13  kabili mukamone ifyo tukamoneka ne fikamoneka abana bambi abalelya ifya maliila ya mfumu, kabili ukulingana ne fyo mukamona e fyo mukacite ababomfi benu.” 14  Awe alibomfwile no kubesha inshiku ikumi (10). 15  Kabili ilyo inshiku ikumi (10) shapwile balimoneke bwino sana kabili bali abaina ukucila abana bonse abalelya ifya maliila ya mfumu.+ 16  Awe kalinda e walesenda ifya maliila fyabo no mwangashi wabo, lelo bena alebapeela fye ifilimwa.+ 17  Kabili aba bana bane, Lesa wa cine abapeele ukwishiba no kushilimuka mu mabuuku yonse na mano yonse;+ kabili Daniele aali na mano ya kwiluka ifimonwa fyonse ne filoto fyonse.+ 18  Awe ilyo inshiku isho imfumu yasosele ukuti babengishe shapwile,+ e lyo umukalamba wa bacilolo ba kwi sano abengishe pa kuti beminine ku cinso ca kwa Nebukadnesari. 19  Ne mfumu yalalanda na bo, kabili takwasangilwe nangu umo pali balya uwali nga Daniele, Hanania, Mishaele na Asaria;+ e ico bakonkenyepo ukulabombela ku cinso ca mfumu.+ 20  Kabili umulandu onse uwalekabila amano no mucetekanya+ uo imfumu yabepwishe, yasangile ukuti bena bacililepo imiku ikumi (10) pali bashimapepo bonse aba finjelengwe+ na babuka+ abali mu bufumu bwa iko bonse. 21  Kabili Daniele aikele ukufika ku mwaka wa ntanshi ukutula apo imfumu Sailasi yatendekele ukuteka.+

Amafutunoti