Tinikeni pa kuti muye ku filimo

Tinikeni pa kuti mumone imitwe iilimo

Inte sha kwa Yehova

Saleni ululimi Cibemba

Daniele 5:1-31

5  E lyo Belshasari+ imfumu, apangiile abakankaala bakwe ikana limo (1,000) umutebeto uukalamba, kabili aikele pa ntanshi ya aba abali ikana limo no kunwa umwangashi.+  Pa mulandu wa mwangashi,+ Belshasari asosele ukuti balete ifipe fya golde ne fya silfere+ ifyo Nebukadnesari wishi* afumishe mwi tempele lya mu Yerusalemu, pa kuti imfumu na bakankaala ba iko, bakanakashi ba iko na bakashi banono+ banwenemo.  E lyo baletele ifipe fya golde ifyo bafumishe mwi tempele lya ng’anda ya kwa Lesa ilyali mu Yerusalemu, kabili e mo imfumu na bakankaala ba iko, bakanakashi ba iko na bakashi banono banwenene.  Banwenenemo umwangashi, no kutasha balesa ba golde na ba silfere, aba mukuba, aba cela, aba cimuti na ba mabwe.+  Mu nshita ilya ine kwamoneke iminwe ya muntu kabili yalelemba apalungatene ne ca kutekapo inyali pa cibumba cashingulwa ica mwi sano lya mfumu,+ ne mfumu yalemona icisansa icalelemba.  E lyo ukumoneka kwa mfumu kwalyalwike, na matontonkanyo ya iko yailengele ibe no mwenso,+ ne mfyufyu sha mu musana wa iko shalesokona+ na makufi ya iko yalepumana.+  Imfumu yabilikishe ukuti bengishe mu kati bakabuka, abena Kaldi na babukila ku ntanda.+ Imfumu yaebele aba mano ba ku Babiloni, aiti: “Umuntu onse uwalabelenga ifilembo ifi no kunondolwela umo filolele, twalamufwika ifya kufwala ifyakashikila,+ na kamunyololo ka golde mu mukoshi, kabili akaba kateka wa butatu mu bufumu.”+  E lyo aba mano bonse aba mfumu balingiile, lelo balifililwe ukubelenga ifilembo nangu ukulondolwela imfumu umo fyalolele.+  E lyo Imfumu Belshasari yatiinine nga nshi no kumoneka kwa iko kwalyalwike; na bakankaala ba iko bapeshiwe amano.+ 10  Awe namfumu aingile mu ng’anda ya mutebeto ilyo aumfwile amashiwi ya mfumu na bakankaala ba iko. Namfumu ayankwile no kutila: “Mwe mfumu, mube no mweo umuyayaya.+ Mwileka yamutiinye amatontonkanyo yenu, no kumoneka kwenu kwiyaluka. 11  Mu bufumu bwenu mwaliba umuntu uwafikapo uwaba no mupashi wa balesa ba mushilo;+ kabili mu nshiku sha kwa shinwe,* ukwishiba no kushilimuka na mano nga mano ya balesa fyasangilwe muli ena, kabili shinwe, mwe mfumu, Imfumu Nebukadnesari yamulengele ukuba umukalamba+ wa bashimapepo ba finjelengwe, bakabuka, abena Kaldi na babukila ku ntanda; 12  pa mulandu wa kuti alikwatishe amano no kwishiba no kushilimuka mu kulondolola ifiloto+ na mu kwilula ifishimbiko na mu kupikulula ubwile.+ Ishina lyakwe ni Daniele, uo imfumu yainike ishina lya kuti Belteshasari.+ Nomba lekeni bete Daniele, na o aleilula.” 13  Awe baletele Daniele pa cinso ca mfumu. Imfumu yaipwishe Daniele aiti: “Bushe e iwe Daniele uwa muli bankole abaYuda,+ abo imfumu tata aletele ukufuma ku Yuda?+ 14  Ning’umfwa ukuti umupashi wa balesa waba muli iwe,+ kabili muli iwe mwaba ukwishiba no kushilimuka na mano+ ayengi nga nshi. 15  Kabili aba mano na bakabuka nabesa ku cinso candi, pa kuti babelenge ifilembo ifi, no kunondolwela umo filolele; lelo nabafilwa ukulondolola umulolele ifi fintu.+ 16  Kabili ning’umfwa ukuti iwe waliba na maka ya kwilula+ ifintu no kupikulula ubwile. Nomba, nga kuti wabelenga ifilembo ifi no kunondolwela umo filolele, twalakufwika ifya kufwala ifyakashikila, na kamunyololo ka golde mu mukoshi, kabili walaba kateka wa butatu mu bufumu.”+ 17  E lyo Daniele ayaswike no kutila ku mfumu: “Lekeni ifya bupe fyenu fibe fyenu, ne filambu fyenu peeleni kuli bambi.+ Lelo, nalamubelengela ifilembo mwe mfumu, no kumulondolwela umo filolele.+ 18  Mwe mfumu, Lesa+ Uwapulamo apeele ubufumu no bukulu no bukata no kucindama+ kuli Nebukadnesari shinwe.+ 19  Kabili pa mulandu wa bukulu ubo apeele kuli ena, abantu na bantu bonse, aba nko ne ndimi baletutuma no kutiina ku cinso cakwe.+ Aleipaya uo afwaya ukwipaya; na untu afwaya ukonaula, alemonaula; kabili uo afwaya ukusansabika, alemusansabika; na untu afwaya ukucefya, alemucefya.+ 20  Lelo ilyo umutima wakwe waishileba na matutumuko, na lintu umupashi wakwe wataleme, ku kuituntumba,+ bamwikishe pa cipuna cakwe ica bufumu, no bukata bwakwe bwafumine pali ena.+ 21  Kabili bamutamfishe ukufuma pa bantunse, kabili basangwile umutima wakwe ngo wa nama, kabili aile mu kwikala pamo ne mpunda sha mu mpanga.+ Alelya umulemfwe kwati ni ng’ombe, no mubili wakwe walibombele ku mume wa mu muulu,+ asukile aishiba ukuti Lesa Uwapulamo e wakwata amaka pa mabufumu ya bantunse, no kuti abikapo uo atemenwe.+ 22  “Na iwe, we mwana* wakwe Belshasari,+ tawaicefya mu mutima+ obe, nangu ca kuti walishiba ifi fyonse.+ 23  Lelo wali-ikusha pali Shikulu wa mu muulu,+ ne fipe fya mu ng’anda yakwe wafiletele kuli iwe;+ kabili iwe na bakankaala bobe, bakanakashi bobe na bakashi banono mwanwenamo umwangashi, kabili watasha na balesa ba fye aba silfere na ba golde, aba mukuba, aba cela, aba cimuti na ba mabwe,+ abashimona nangu ukuumfwa nangu ukwishiba;+ kabili tawacindika+ Lesa uo umupu+ obe uli mu minwe yakwe kabili uwakwata amaka pa mibele yobe yonse.+ 24  E mulandu wine atumiine icisansa kabili e mulandu wine ifilembo ifi fishiliilwe.+ 25  Kabili ifilembo ifishililwe ni fi: MENEE, MENEE, TEKEELE na PARSIINI. 26  “Umu e mulolele aya mashiwi: MENEE ilolele mu kuti Lesa napenda inshiku sha bufumu bobe no kubupwisha.+ 27  “TEKEELE ilolele mu kuti naulingwa mu ca kulinga ukufina no kusangwa uwabulila.+ 28  “PEREESE ilolele mu kuti ubufumu bobe nabwakanishiwa no kupeelwa ku bena Madai na bena Persia.”+ 29  E lyo Belshasari asosele ukuti bafwike Daniele insalu ishakashikila, na kamunyololo ka golde mu mukoshi; kabili bapishishemo imbila ya kuti Daniele e wali no kuba kateka wa butatu mu bufumu.+ 30  Muli ilya ine nshita ya bushiku Belshasari imfumu ya bena Kaldi aliipaiwe+ 31  kabili Dariusi+ umwina Madai apokelele ubufumu, ilyo ali ne myaka nalimo amakumi mutanda na ibili (62).

Amafutunoti

Atemwa “wishikulu.”
Nangu “shikulwinwe.”
Atemwa “we mwishikulu.”