“Nalilolela ici cintu pa myaka 19!” Cinshi munyinefwe alelolela? Ni Baibolo ya Amalembo ya Calo Cipya aya ciGriki aya Bwina Kristu, mu lulimi lwakwe ulwa ciBengali. Ifi munyinefwe alandile e fyo abantu abengi balanda nga bapokelela Baibolo ya Amalembo ya Calo Cipya mu lulimi lwabo. Nomba bushe mwalibala amutontonkanyapo pa fyo ciba pa kuti bapange amaBaibolo?

 Babalilapo ukusala aba bwananyina abakuba mwi bumba lya bakupilibula Baibolo abo na Komiti ya Kulemba iye Bumba Litungulula isuminishako. Bushe cisenda ubutali bwaba shani pa kuti bapwishe ukupilibula Baibolo? Munyinefwe Nicholas Ahladis uubombela mu Dipartimenti Ilolekesha pa Mulimo wa Kupilibula iyaba ku Warwick, ku New York alondolwele ukuti: “Kwaliba ifingi ifyo baloleshapo ilyo bashilatendeka ukupilibula Baibolo. Pa fyo baloleshapo paba ne mpendwa ya bakapilibula abalipo abengabomba uyu mulimo, abantu ubwingi abalanda ulo lulimi, ifyo abalanda ulo lulimi baishiba pa fyo ifintu fyali ilyo balelemba Baibolo, e lyo no kumona nga ca kuti ifyo ululimi balulanda ku ncende imo fyalipusana ne fyo balulanda ku ncende imbi. Ilingi line cisenda umwaka umo ukufika ku myaka itatu pa kuti fye bapilibule Amalembo ya ciGriki aya Bwina Kristu, kabili ilingi line cisenda imyaka 4 nelyo ukucilapo pa kuti bapilibule Baibolo yonse. Nomba mu lulimi lwa bankomamatwi lwena cilasenda imyaka iingi sana.”

 Kwaliba na fimbi ifikabilwa pa kuti bapilibule Baibolo. Kufwile ukuba ibumba lya ba bwananyina ukufuma mu ncende ishapusanapusana, e lyo limo ukufuma mu fyalo fyalekanalekana, abakupituluka mu fyo bakapilibula bapilibwile. Aba aba bwananyina babomba uyu mulimo mu kuitemenwa. Ifyo balanda pa numa ya kupitulukamo filafwa bakapilibula ukupilibula ifyebo fya cine, kabili ifya-anguka ukubelenga no kumfwa. Na kuba, nga fintu munyinefwe wa ku South Africa uusambilisha aba bwananyina ifya kupilibula Baibolo alandile, “bakapilibula baleshiba ukuti balakwata umulimo uukalamba nga nshi uwa kubombela Yehova e lyo na bantu ababelenga Icebo cakwe.”

 Nga bapwisha ukupilibula Baibolo, bafwile ukuipulinta no kuipanga mu fitabo. Aba bwananyina ababombela ku kupulinta balabomfya ifintu 10 pa kupanga Baibolo. Balabomfya amapepala, inki, ifya kupangile nkupo, ifya kukambatikilako, ifya kubika mu kati ka nkupo, ilangi lya silver, ututambo, akasalu kekatanya amapepala, ifya kwikatanya amapepala ne nkupo, e lyo ne fya kubomfya pa kulenga amapepala yonse aya muli Baibolo yekatane bwino pamo. Mu 2019 indalama babomfeshe pa kushita ifi fyonse ifyo babomfya pa kupanga amaBaibolo shalicilile pali K435 milioni. Muli uyu mwaka ababombela uko bapulintila amaBaibolo babombele ama-awala ukucila pali 300,000 ukupanga amaBaibolo no kuyatuma uko yalingile ukuya.

 Mulandu nshi tubomfesha inshita yakula ifi ne ndalama pa kubomba iyi milimo? Ba Joel Blue ababombela mu International Printing Department balandile ukuti, “Baibolo e lupapulo lwa cindamisha pa mpapulo shonse isho tusabankanya. Kanshi tufwaya ifyo imoneka filelenga abantu balelumbanya Lesa tupepa kabili balecindika ne mbila nsuma tubila.”

 Ukulunda pali Baibolo ya Amalembo ya Calo Cipya iyo tupulinta lyonse, tulapanga iyi Baibolo mu misango na imbi. Ku ca kumwenako, tulapanga Baibolo ya Amalembo ya Calo Cipya mu ndimi 10 iya mu filembo fya bashimona. Pa kupanga Baibolo imo mu filembo fya bashimona, cisenda ama-awala ukufika kuli 8, kabili amavolyumu yonse aya Baibolo imo yalasenda incende iikalamba apa kuyabika, ukufika fye na ku mamita 2.3. Na kabili, tulapanga amaBaibolo ayaibela ayo tupeela abafungwa ababa mu fifungo umo basuminisha fye ifitabo ifyakwata inkupo sha mapepala.

 Baibolo ya Amalembo ya Calo Cipya ilalenga abaibelenga ukuba sana ne nsansa. Ku ca kumwenko, icilonganino icabela ku Tombe mu Democratic Republic of the Congo, icibomfya ululimi lwa ciKiluba cabela ukutali sana. Ukufuma ku musumba uukalamba ukuya ku Tombe paba amakilomita ukucila pali 1,700. Ba Nte muli ici cilonganino bakwete fye Baibolo ya mu ciKiluba imo iya kale sana, umwaba amashiwi ayakosa ayo abantu baleka ukubomfya. Iyi yine Baibolo imo eyo bamunyinefwe balelekanina ukubomfya nga balepekanya amalyashi ya pa kulongana. Nomba mu August mu 2018, Baibolo ya Amalembo ya Calo Cipya iya mu ciKiluba iyakwata amashiwi aya-anguka ukumfwa yalifumine, kabili bonse mu cilonganino balipokeleko iyi Baibolo.

 Nkashi uulanda iciGerman alandile pali Baibolo ya Amalembo ya Calo Cipya iyo bapitulukamo iya mu lulimi lwakwe ulwa iciGerman ukuti: “Nalileka ukulanda ukuti mfwile ukubelenga Baibolo. Ino nshita ntontonkanya ukuti, ‘ni nshita nshi nalabelengelapo na fimbi?’” Umufungwa umo alembele ukuti: “Balimpeele Baibolo ya Amalembo ya Calo Cipya kabili iyi Baibolo yalilenga natendenka ukwaluka. Nshaleumfwikisha Icebo ca kwa Lesa nge fyo ndecumfwikisha ili ndebelenga Baibolo ya Amalembo ya Calo Cipya. Kuti natemwa ukwishiba na fimbi pa Nte sha kwa Yehova ne fyo mfwile ukucita pa kuti mbe Inte ya kwa Yehova.”

 Bonse ababelenga Baibolo ya Amalembo ya Calo Cipya balatasha pa misangulo iitungilila umulimo wa kupanga iyi Baibolo. Imisangulo iingi iyo musangwilako ku mulimo wa mwi sonde lyonse, musangwilako ukubomfya inshila shaba pa donate.jw.org. Tulatasha sana pali bukapekape bwenu.