Muli lipoti yalenga 6 iye Bumba Litungulula iya mu 2020 ba Geoffrey Jackson batile: “Tapakokwele twalemona kwati te kuti tupokelele ifyebo fya ku mupashi ifishapulintwa. Nomba ino nshita ilyo kuli icikuko nalimo tuletila nga tulecita shani nga tatwakwete ifintu ifya kubomfya pamo nga JW Library? Pa myaka iingi, Yehova aletupekanishisha ku fintu pamo nge fi ifilecitika.” Nalimo na imwe tamwatalile amutontonkanyapo ukutila kuti twapokelela impapulo pa foni nelyo pa tabuleti.

 Bushe Yehova atupekanya shani? Finshi bacitile pa kuti bapange JW Library, kabili finshi fifwaikwa pa kuti ilewaminako?

 Mu May 2013, Ibumba Litungulula lyalilandile na bapanga MEPS Programming ukuti bapanga JW Library app no kubikamo Baibolo ya Amalembo ya Calo Cipya. Ba Paul Willies ababombela ku MEPS batile, “Tatwabalile atupangapo app ya pa foni. E ico twalipangile ibumba ilya kupanga JW Library app, twalilekele ukubombela pa milimo imo iyo twakwete kabili twalitendeke ukubombela pamo na madipartimenti yambi pa kuti tupange JW Library app na fyonse ifyabamo. Cila bushiku twalepepelapo kuli Yehova, ica kuti pa numa ya myeshi 5 ilyo kwali kukumana kwa pa mwaka, JW Library yalifumine!”

 Ubwafya bumbi twakwete bwa kubika impapulo ishingi mu JW Library kabili mu ndimi ishingi. Ilyo calefika mu 2015, twalibikilepo impapulo ishingi isho twakwata mu ciNgeleshi kabili pa numa ya myeshi 6, abantu balekopolola ishi impapulo mu ndimi ishalekanalekana.

 Ukutula lilya, bamunyinefwe balaya balile balewamyako JW Library app mu nshila ishalekanalekana. Balibikilemo amavidio, impapulo, ifikope, inyimbo sha kubomfya pa kulongana, na kabili balibikamo na Icitabo ca Kwafwa Ukusanga Ifyebo pa kuti ilyo umuntu alebelenga Baibolo alemona ne fyo balondolola ico cikomo.

 Cila bushiku amafoni, amatabuleti na amakomputa ayo abantu beswilapo JW Library yalafika amamilioni 8 kabili cila mweshi yalacila pa amamilioni 15! Finshi fikabilwa pa kuti JW Library ilebomba bwino pa mafoni na pa matabuleti? Munyinefwe Willies atile: “Takuba ukuleka ukubombela pa ma app ya pa foni na pa matabuleti. Kanshi tulatwalilila ukubikamo ifipya no kuwamyako ifyo ibomba. Abapanga ifyo beta ukuti ama operating system (ifilenga amafoni na matabuleti ukubomba) balatwalilila ukubikako ifipya lyonse, kanshi na ifwe tulatwalilila ukwalulako JW Library. Na kabili tulatwalilila ukuwamyako JW Library no kubikako ifipya pantu lyonse tulabikapo impapulo ne fya kukutikako kanshi filaya filefulilako fye. Nga kupenda impapulo shonse mu ndimi ishilipo pa JW Library, kuti shafika nalimo 200,000 ne fya kukutikako na mavidio kuti fyacila pali 600,000.

 Pa kuti JW Library ilebomba bwino te makompyuta fye ayakabilwa, lelo balingile no kushita amaprogramu yamo aya pa kompyuta. Imo programu baishita pali K26,908 (nelyo $1,500 U.S) cila mwaka. Na kabili cila mwaka dipartimenti ya MEPS Programming ibomfya indalama K179,384 (nelyo $10,000 U.S) ku kushita amakompyuta, amatabuleti, na mafoni ayapya ayapangwa no twampani utwalekanalekana pa kuti bamone nga ca kuti JW Library ilebomba fye bwino.

 JW Library yalilenga twilabomfya indalama ishingi ku kupulintila, ukupanga impapulo no kushituma uko shilingile ukuya. Ku ca kumwenako, mu mwaka wa 2013 twalipulintile icitabo ca Ukubebeta Amalembo Cila Bushiku kabili twapulintile ifitabo mupepi na 12 milioni. Lelo mu 2020 twapulintile fye nalimo 5 milioni nangu ca kuti twalikwete bakasabankanya abapya nalimo 700,000 mwi sonde lyonse. Mulandu nshi? Bamunyinefwe na bankashi abengi balabelenga ici citabo pa JW Library. a

 JW Library yalyafwa abaibomfya mu nshila shalekanalekana. Ba Geneviève abekala ku Canada balimona ukuti yalilenga baleisambilisha Baibolo lyonse. Batile: “Ukulanda fye icishinka, nga ca kuti nalibuulile amabuuku yonse ayo ningile ukubomfya pa kuisambilisha, te kuti nkumanishe ukulabelenga ulucelo cila bushiku. Nomba JW Library yena, nga nabula fye tabuleti ninshi impapulo shonse ninkwata. Ukulaisambilisha lyonse kwalilenga icitetekelo candi ukukoselako kabili nalipalama sana kuli Yehova.”

 JW Library naitwafwa sana maka maka ili kuli icikuko ca COVID-19. Ba Charlyn aba ku United States batile: “Apo icikuko ca COVID-19 catendekele, napapita umwaka umo no kucilapo ukwabula ukumonapo ulupapulo ulwapulintwa ulupya. Nomba JW Library ilakwata ifyo tukabila pa kukosha icitetekelo cesu. Ndatasha sana Yehova pali JW Library.”

 Ba Faye abekala ku Philippines balanda ifyo abengi bomfwa. Batile: “Ndabomfya JW Library pa kuti ndepalama kuli Yehova. Ndaibomfya lyonse ulucelo pa kubelenga. Ndakutika ku mpapulo babelenga na ku nyimbo ilyo ndebomba imilimo pa ng’anda. E lyo ndaibomfya na pa kupekanya ukulongana na lintu ndepekanya ukuya mu kutungulula isambililo lya Baibolo. Pa nshita ndetusha ndatambako na mavidio yabapo, kabili ndabelenga ifipande babikapo nelyo Baibolo ilyo ntanteme pe bumba lya bantu ndelolela ukucita fimo. Ukwabula no kutwishika JW Library app isuma icine cine.”

 JW Library app ilabomba bwino sana na mu mulimo wa kubila imbila nsuma. Ku ca kumwenako, ilyo nkashi wa ku Cameroon alebila imbila nsuma, alefwaya ukubomfya ilembo ilyo amwene nkashi umbi abomfeshe imilungu iinono iyapitile. Nomba alilabile icikomo ulya nkashi abelengele. Atile: “Icawemeko ca kuti nalibukishe amashiwi yamo ayabapo. Naiswile fye JW Library natinika na pali Baibolo e lyo nalemba yalya amashiwi apakufwaila ifyebo. Mu kwangufyanya fye nalisangile ilembo. Ukubomfya JW Library kwalilenga ndesanga amalembo ayo mfilwa ukwibukisha inshita shimo.”

 Imisangulo musangula ukubomfya inshila shaba pa donate.jw.org shalilenga twapanga, twatwalilila ukuwamyako, no kusungilila bwino JW Library app pa kuti bamunyinefwe ne nkashi mwi sonde lyonse baleibomfya. Ala tulatasha icine cine pali bukapekape bwenu.

1. Mu October 2013—JW Library yalifumine iyakwete Baibolo ya Amalembo ya Calo Cipya iya mu ciNgeleshi iyo bapitulukamo

2. Mu January 2015—Impapulo shimbi isha mu ciNgeleshi balishibikilepo, lyena pa numa ne sha mu ndimi shimbi ishingi.

3. Mu November 2015—Balibikilemo aka kushililako mu lupapulo ulebelenga.

4. Mu May 2016—Balibikilemo apatila Meeting.

5. Mu May 2017—Balibikilemo apa kulemba ifyebo.

6. Mu December 2017—Balilundileko Study Bible.

7. Mu March 2019—Balilundileko ifya kukopolola inyimbo ne fyo bakopa, balibikileko ne fya kutamba vidio nelyo ukukutika ku lupapulo ukwabula ukukopolola, balibikilemo ne Icitabo ca Kwafwa Ukusanga Ifyebo.

8. Mu January 2021—Balilundileko na pa kusanga ifyaba mu citabo ca Kuti Mwaba ne Nsansa Umuyayaya!