1, 2. 1) ¿Kunsa wiñay jakañ jikjjatañatakejj lurañasa? 2) Diosar tukuykam jan jitheqtas serviskakiñatakejja, ¿kunas yanaptʼistani?

CRISTIANOR tukuñajja, mä thaknama sarañ qalltañampi sasiwa. Wiñay jakañ katoqjjañäni ukhaw uka thaknam sarañ tukuyjjañäni. Jesusasti sänwa: “Khititejj tukuykama saytʼkani ukawa qhespiyatäni” sasa (Mat. 24:13). Wiñay jakañ katoqañatakejja, ¿kunsa lurañasa? Jiwañkama, jan ukajj akapachan tukusiñapkamaw Diosar jan jitheqtas serviskakiñasa. Ukampis aka ñanqha pachaw Diosar serviñat jitheqtayistaspa (1 Juan 2:15-17). ¿Kunas Diosar tukuykam serviskakiñatakejj yanaptʼistani?

² Jesusat yateqasisaw sarnaqañasa. Bibliajj jupjjat sum yatichistu. Ukhamajja, kunanaktï Bibliajj jupjjat yatichki ukanak yateqañäni ukhajja, Jesusarojj munasiñäniwa iyawsarakiñäniwa (1 Pedro 1:8, 9 liytʼañataki). Apóstol Pedrojja, Jesusan kayup arkañasatakiw chʼamañchtʼistu (1 Ped. 2:21). Ukham lurañaw tukuykam  aguantañatak yanaptʼistani. * Pasïr yatichäwinjja, Jesusan altʼat chuymanïtapata khuyaptʼayasirïtapatwa yatjjatawaytanjja. Jichhajj aka yatichäwinjja, Jesusan jan ajjsartʼirïtapata ukat amuytʼasirïtapatwa yatjjataskañäni.

3. 1) ¿Jan ajjsarirïñajj kun sañs muni? 2) ¿Kunas jan ajjsarirïñatakejj yanaptʼistani?

³ Jan ajjsarirïñajja, chʼaman saytʼasiña, jan waltʼäwinakan aguantaña sañ muni. Ukatsti, kunatï cheqäki uk arjjataña, tʼaqhesiñanakan uñjasisas sumaki jikjjatasiña, Diosatsa jan jitheqtaña sañwa munaraki. Jiwasatï Diosar chuym jan ustʼayañ munkstanjja, janiw jaqer ajjsarañampejj apayaskañäniti (1 Sam. 11:7; Pro. 29:25). Ukat Diosan arsutanakapar confiyañäni ukhajja, janiw jichhürunakan jan waltʼäwinakajj utjki ukanakat sinti llakiskañäniti, jan ukasti kunanaktï jutïr pachan katoqkañäni ukanakatwa llakisiñäni (Sal. 27:14). Jaqe masisarutï munasiñänejja, jakañ aptʼasirjamäkasas yanaptʼañäniwa (Juan 15:13). Ukhamajj ¿kunas jan ajjsarirïñatakejj yanaptʼistani? Jehová Diosaruw confiyañasa, ukatjja Jesusatsa yateqasiñasarakiwa (Sal. 28:7).

4. Jesusajj 12 maranïskäna ukhajja, ¿kunjamsa jan ajjsarirïtap uñachtʼayäna? (10 janankir dibujo uñjjattʼam.)

⁴ Kunapachatï Jesusajj 12 maranïskäna ukhajja, ‘templon ley yatichirinak taypin qontʼatäskänwa’, ukapachaw jan ajjsarirïtap uñachtʼayäna (Lucas 2:41-47 liytʼañataki). Ley yatichirinakajja, Moisesan Leyinakapatsa judionakan costumbrenakapatsa sum yatipjjäna. Uka costumbrenak arkasaw jaqenakajj Diosan leyinakap jan istʼapkänti. Jesusasti uka yatichirinakarojj janiw ajjsarkänti, ukatwa jupanakar wal jisktʼäna. Jisktʼanakapajj janiw wawanakan jisktʼanakapjamäkänti, jan ukasti yatichirinakarojj wal lupʼiyäna, ukatwa jupanakajj wal istʼañ munapjjpachäna. Ley yatichirinakajj inas jiskhisiñ laykuk jisktʼapjjchïna, ukampis inakiw yanapjjäna. Jesusar sum parlatap istʼasasa, wali yatiñanïtap uñjasasa, jaqenakajj wal muspharapjjäna. Jesusajj janiw ajjsarirïkänti ukat kunatï cheqäki uksa arjjatarakirïnwa.

5. Diosan arunakap yatiykasajja, ¿kunjamsa Jesusajj jan ajjsarirïtap uñachtʼayäna?

⁵ Jesusajj Diosan arunakap yatiykäna ukhajja, walja toqenakatwa jan ajjsarirïtap uñachtʼayäna. Amuytʼañataki, ‘religión pʼeqtʼirinakajj kʼarinakwa yatichapjjtamjja’ sasaw jaqenakar jan ajjsaras säna (Mat. 23:13-36). Janirakiw akapachan munañapampis apayaskänti (Juan 16:33). Uñisirinakapan amuktʼayañ munatpachasa, Diosan arunakap yatiyaskakïnwa (Juan 5:15-18; 7:14). Templon qollqe ganañ layku aljapkäna ukanakarus pä kutinwa templot alissüna (Mat. 21:12, 13; Juan 2:14-17).

6. Jesusajj janïr jiwayatäkäna ukhajja, ¿kunjamsa jan ajjsarirïtap uñachtʼayäna?

⁶ Jesusajj janïr jiwayatäkasajja, kunjamsa jan ajjsarirïtap uñachtʼayäna uk jichhajj uñjarakiñäni. Judasan aljantatajj kunas pasañapäna ukjja sum yatïna. Ukhamäkchïn ukhasa, akham sasaw Judasar säna: “Kuntejj lurañamäki ukjja, jankʼak luram” sasa (Juan 13:21-27). Kunapachatï soldadonakajj katuntir sarapjjäna ukhajja, Jesusajj janiw imantaskänti. Jiwayatäñap yatiskchïnsa, katuntayasïnwa, arkirinakaparus jarkʼaqarakïnwa (Juan 18:1-8). Kunapachatï judionakan jachʼa tribunalapan ‘¿jumätati Cristojja, qollan Diosan Yoqapäki ukajja?’ sasin jisktʼapjjäna ukhajja, akham sasaw jan ajjsaras  säna: “Jïsa, nayätwa” sasa. Jilïr sacerdotejja kunaymanitwa jupar jiwayañ thaqhäna, ukampis Jesusajj janiw jupar ajjsarkänti (Mar. 14:60-65). Jesusajja, jiwañkamaw Diosar serviwayi. Ukatwa janïr jiwkasajj akham säna: “Taqe kunaw phoqhasjje” sasa (Juan 19:28-30).

7. 1) Wayn tawaqo, ¿kunjamsa Jehová Diosan Qhanañchiripäsajj jikjjatasta? 2) ¿Kunjamatsa jan ajjsarirïtam uñachtʼayasma?

⁷ Wayn tawaqonakajj escuelankkasajja, ¿kunjamatsa Jesusjam jan ajjsarirïpjjaspa? Walja wayn tawaqonakajja, yateqer masinakaparusa yatichirinakaparusa, jan ajjsartʼasaw ‘Jehová Diosan Qhanañchiripätwa’ sasin sapjje. Jumas ukhamwa sarakisma, yateqer masinakamajj phiskasipkchïtamsa, ukham lurasajj jan ajjsarirïtamwa uñachtʼayäta. Ukatjja, Jehová Diosan sutip apatamatsa kusisitaw jikjjatasirakïta (Salmo 86:12 liytʼañataki). Inas yaqhep yatichirinakamajj monot jutatätanwa sasin yatichasajj ukar iyawsayañ munapjjchïtam. Ukampis Biblian yatichaski ukaw cheqajja, janiw pächasiñamäkiti. ‘Diosaw taqe kuns lurawayi sasajja, ¿kunatsa sista?’ sasin jisktʼapjjätam ukhajja, El origen de la vida. Cinco cuestiones dignas de análisis sat folletompiw qhanañchtʼasma (1 Ped. 3:15). Jehová Diosar ukham arjjatasajja, kusisitaw jikjjatasïta.

8. ¿Kunatsa Diosan arunakap jan ajjsaras yatiyañasa?

⁸ Diosan arunakap yatiykasaw jan ajjsarirïtasjja uñachtʼayaraksna (Hech. 14:3). ¿Kunatsa Diosan arunakap jan ajjsaras yatiytanjja? Maya, kuntï yatichktan ukajj janiw kʼarïkiti, Diosan Arupawa (Juan 17:17). Paya, ‘Diosan yanapirinakapäpjjtanwa’ Jupajj qollan ajayupampiw yanaptʼistu (1 Cor. 3:9, MT; Hech. 4:31). Kimsa, Jehová Diosaru, jaqe masisaru munasitasatwa yatiytanjja (Mat. 22:37-39). Jan ajjsarirïñäni ukhajja, janiw kunas amuktʼaykistaniti. Jaqenakarojja, kʼari religionanakan yatichäwinakap apanukupjjañapatakisa, Biblian cheqa yatichäwinakap uñtʼapjjañapatakisa yanaptʼaskakiñäniwa (2 Cor. 4:4). Jan istʼañ munatpachasa, uñisitpachasa, Diosan arunakap yatiyaskakiñäniwa (1 Tes. 2:1, 2).

9. Jan walinakan uñjasisajja, ¿kunjamsa jan ajjsarirïtas uñachtʼaysna?

⁹ Jan waltʼäwinakan uñjasktan ukhaw jan ajjsarirïtas uñachtʼayaraksna. Jehová Diosar confiyañäni ukhajja, Jupaw jan walinakar saykatañatakejj chʼam churistani. Amuytʼañataki, mä familiarasasa jan ukajj mä munat masisasa jiwjje ukhajja, wal llakistanjja, ukampis jupanakajj jaktanipjjaniwa, uka suytʼäwinïtanwa. Ukatjja, ‘chuymachiri’ Jehová Diosas yanaptʼarakistaniwa (2 Cor. 1:3, 4; 1 Tes. 4:13). Wali usutäkasasa, janiw qollayasiñ laykukejj Diosan leyinakap pʼakintktanti (Hech. 15:28, 29). Sinti llakit uñjasisasa, jiwas pachpat jan walinakwa amuyjjsna, ukampis janiw uka amuyumpejj aynachtʼañasäkiti. Jehová Diosajj llakitanakar yanaptʼapuniwa, uk janipun armapjjañäniti (1 Juan 3:19, 20; Sal. 34:18). *

10. 1) ¿Kunsa mä amuytʼasir jaqejj luri? 2) Arunakasampisa luratanakasampisa, ¿kunjamsa amuytʼasirïtas uñachtʼaytanjja?

¹⁰ Mä amuytʼasiri jaqejja, kunatï walïki jan walïkaraki ukjja sumwa amuytʼi, ukatjja walïki uk lurañpunwa amti (Heb. 5:14). Jiwasatï  suma amuytʼasirïñänejja, parlatasampi luratanakasampiw uñachtʼayañäni. ¿Kunjamsa? Janïr parlkasaw amuytʼasisin kuns sañäni, ukhamatwa mayninakar chuym jan ustʼaykañäniti, jan ukasti yanaptʼañäniwa. Diosajj ukham lurañaswa muni (Pro. 11:12, 13). Ukhamarus janiw jankʼak coleraskañäniti (Pro. 14:29). Ukham amuytʼasirïñäni ukhajja, Jehová Diosampejj jukʼamp sumwa apasiñäni (Pro. 15:21). ¿Kunas suma amuytʼasirïñatakejj yanaptʼistani? Bibliatwa yatjjatañasa, ukarjamaw sarnaqañasaraki (Pro. 2:1-5, 10, 11). Ukat sipansa, Jesusat yateqasiñasawa, jupajj amuytʼasisapuniw sarnaqerïna.

11. Parlkasajja ¿kunjamsa Jesusajj amuytʼasirïtap uñachtʼayäna?

¹¹ ¿Kunjamatsa Jesusajj amuytʼasirïtapa uñachtʼayäna? Uk kimsa toqet uñjañäni. Maya, parlatapampiw amuytʼasirïtap uñachtʼayäna. Diosan arunakapat chuymar purtʼkir yatiyatap uñjasajja, jaqenakajj wal muspharapjjerïna (Luc. 4:22; Mat. 7:28). Yatichkasajj Qollan Qellqatanakatpun aytirïna ukat liytʼarakirïna. Sapa yatichäwitakejj kuna qellqat aytañas wakisispa uksa yatirakïnwa (Mat. 4:4, 7, 10; 12:1-5; Luc. 4:16-21). Ukampirus yatichatapampejja, jaqen chuymaparupuniw purtʼirïna. Sañäni, jaktjjäna uka qhepatjja, thaknam sarkasaw kuntï profecianakajj jupjjat siskäna uk arkirinakapar qhanañchäna. Ukajj jupanakar wal chʼamachtʼäna, ukatwa akham sapjjäna: “¿Janit qhanpacha chuymanakasajj nakkistänjja [...] Qellqatanakat amuytʼayaskistäna ukkhajja?” sasa (Luc. 24:27, 32).

12, 13. Jesusajj janiw jankʼak colerasirïkänti, janirakiw leyinakarjampun phoqasiñap munkänti sasajja, ¿kunatsa sissna?

¹² Paya, Jesusajj sarnaqatapampiw amuytʼasirïtap uñachtʼayäna. Jupajj janiw jankʼak colerasirïkänti (Pro. 16:32). Antisas llampʼu chuymanïnwa (Mat. 11:29). Arkirinakapajj pantjasipjjäna ukhajj pacienciampiw jupanakar uñjäna (Mar. 14:34-38; Luc. 22:24-27). Uñisirinakapan tʼaqhesiyat uñjasïna ukhasa, janiw “suytʼam” siskänti (1 Ped. 2:23).

¹³ Jesusajj janiw leyinakarjampun phoqasiñap munkänti. Uka toqet amuytʼañatakejj wila apa usuni mä warmit parltʼañäni (Marcos 5:25-34 liytʼañataki). Jupajj walja jaqenak taypir mantasinjja, Jesusan isip llamktʼañatakiw jakʼachasïna. Moisesan Leyiparjamajja, uka warmejj janiw khitirus llamktʼañapäkänti (Lev. 15:25-27). Ukampis Jesusajj janiw toqenoqkänti. Kuna amtampis Diosajj uka leyinak churäna uk jupajj sum yatïna. Ukatwa munasiñat uka warmir khuyaptʼayäna. Leyinakajj kuntï siskäna ukarjampun phoqañat sipansa, jaqenakar khuyapayasiñampi uñjañaw jupatakejj jukʼamp wakiskirïnjja (Mat. 23:23). Ukatwa uka warmirojj akham säna: “Wawa, iyawsatam laykuw kʼumaräjjtajja. Jichhasti sumak sarjjam. Usumatsti kʼumaräjjtawa” sasa. ¡Ukajj wali yateqaskayapuniwa!

14. 1) ¿Kun lurañas Jesusatakejj nayrankäna? 2) Diosan arunakap yatiyañatakejja, ¿kunsa Jesusajj luräna?

¹⁴ Kimsa, Jesusajj Diosan Reinop nayraqat thaqhasaw amuytʼasirïtap uñachtʼayarakïna. Jupatakejj Diosan arunakap yatiyañaw taqe kunat sipans wali wakiskirïnjja (Luc. 4:43). Ukatwa kunanakatï Diosan arunakap yatiyañatakejj yanaptʼkaspäna ukanak lurañ amtäna. Sañäni, kunanakatï jakasiñatakejj munaski ukampikiw jakasïna, ukhamatwa yatiyañatakejj tiempopasa chʼamapasa utjäna (Luc. 9:58). Jiwatap qhepat yatiyasipkakiñapatakisa, arkirinakaparojj wakichtʼänwa (Luc. 10:1-12; Juan 14:12). Ukasti jupanakarojj sarakïnwa: ‘Akapachan tukusiñapkamaw jumanakampïskä’ sasa (Mat. 28:19, 20).

15. ¿Kunjamsa parlatasampejj amuytʼasirïtas uñachtʼaysna?

¹⁵ ¿Kunjamatsa Jesusjam amuytʼasirïsna? Parlatasampi. Jilat kullakanakasarojj janiw aynachtʼayir arunakamp parlktanti, jan ukasti chʼamañchtʼir arunakampiw parltanjja (Efe. 4:29). Diosan arunakapat yatiyktan ukhajja, arunakasajj ‘jayump mojjsañchatäkaspas’ ukhamäñapawa, mä arunjja, respetompiw jaqenakar parltʼañasa (Col. 4:6, MT). Suma arunakampi parltʼañatakejja, kunas jaqenakar llakisiyi, kuna toqetsa yatiñ munapjjaspa, uk yatiñatakiw chʼamachasiñasa. Ukhamtï lurañänejja, jaqenakajj istʼapjjestaspawa, cheqa yatichäwinakas chuymanakaparuw purtʼaspa. Ukampisa, kunanakarutï iyawsktan ukanakat yatichañ muntan ukhajja, Bibliampipuniw qhanañchtanjja. ¿Kunatsa? Biblian qellqatäki uka arunakaw arunakasat sipansa jukʼamp chʼamanejja, uk yatisaw ukham lurtanjja (Heb. 4:12).

16, 17. 1) ¿Kunas jan jankʼak colerañatakejj yanaptʼistaspa? 2) Munañasaruk jan lurayañ munirïtasjja, ¿kunjamsa uñachtʼaysna? 3) ¿Kunas Diosan Reinop nayrar uchañatakejj yanaptʼistani?

¹⁶ Sarnaqatasampiw amuytʼasirïtas uñachtʼayaraksna. ¿Kunjamsa? Jan jankʼak colerasisa. ¿Kunas jan jankʼak colerasiñatakejj yanaptʼistani? (Sant. 1:19.) Maynitï luratampisa, jan ukajj arunakampis chuym ustʼayistani ukhajja, ‘kunatsa ukham lurpacha’ sasin jisktʼasiñasawa. Ukham lurañäni ukhajja, perdonañajj janiw chʼamäkaniti (Pro. 19:11). Maysa toqetjja, janiw kunjamtï jiwasajj munktan ukarjampun lurapjjañap mayninakar mayiñasäkiti. Jupanakajj jiwasjam pantjasirïpjjarakiwa. Jan waltʼäwinakans jikjjatasipjjarakiwa, jiwasajj janiw ukanak yatksnati. ¿Kunamp lurañas wakisispa? Kunsa amuyapjje uk sapjjestani ukhajja, istʼañasawa janiw munañasarjampun lurapjjañap suyañasäkiti (Fili. 4:5).

¹⁷ Diosan Reinop nayrar uchasaw amuytʼasirïtas uñachtʼayaraktanjja. Jiwasajja, Diosan arunakap yatiyañ wali askitwa uñjtanjja. Ukatwa, Diosan Reinop nayrar uchañatakejj kunanakatï jakasiñatak munaski ukampik jakastanjja. Ukhamatwa akapach janïr tukuskipan yatiyaskakiñatakejj tiempsa chʼamsa apstʼastanjja (Mat. 6:33; 24:14).

18. ¿Kunsa wiñay jakañ katoqañatakejj lurañasa?

¹⁸ Aka pä yatichäwinjja, Jesusan altʼat chuymanïtapata, khuyapayasirïtapata, jan ajjsarirïtapata ukat amuytʼasirïtapatwa yatjjatawaytanjja. Ukanakat yatjjatañajj walpun yanaptʼawayistu. Ukhamasti, Jesusajj kunjam chuymanïnsa ukanakat jukʼamp yateqaskakiñäni, kayup arkañatakis chʼamachasiskakiñäni. Ukhamatwa Jehová Diosar jukʼamp jakʼachasiñäni, ukatjja wiñay jakañsa katoqarakiñäni.