Proverbios 14:1-35
14 Cheqpach yatiñan warmejja utapjja saytʼayiwa,+ukampis jan amuytʼasir warmejja pachpa amparanakapampiw utapjja allthapi.
2 Khititï cheqap sarnaqki ukajja Jehová Diosarojj ajjsariwa,ukampis khititï qʼewinukut thakinakanjam sarki ukajja Diosarojj jiskʼachiwa.
3 Jan amuytʼasir jaqen jachʼa jachʼa tukus parlatapajja castigañatak mä varar uñtasitawa,ukampis yatiñan jaqenakarojja pachpa lakapaw jarkʼaqani.
4 Kawkjantï vacanakajj jan utjki ukanjja, uywa liwañajj qʼomawa,ukampis chʼamani mä torojja walja cosechwa utjayi.
5 Cheq parlir testigojja janiw kʼariskaniti,ukampis falso testigojja sapa kut lak jistʼarasaw kʼarisi.+
6 Burlasir jaqejja yatiñanïñsa thaqkchejja janiw kunsa jikjjatkiti,ukampis amuytʼasir jaqen ukarojja facilakiw yatiñajj puri.+
7 Jan amuytʼasir jaqerojj jan jakʼachasimti,kuna laykutejj lakapatjja janiw kuna yatiñsa jikjjatkätati.+
8 Amuytʼasir jaqejja yatiñanïtap laykojj kawkïr thaknamas saraski uk amuyiwa,ukampis jan amuytʼasir jaqerojja pachpa jan amuytʼasirïtapaw engañji.*+
9 Jan amuytʼasir jaqenakajja, juchapat larusipjjakiwa,+ukampis cheqap sarnaqer jaqenak taypinjja sumankthapiñ munañaw utji.
10 Sapa mayniw chuymapan llakinakapjja yati,mä jaqejj kunja kusisitas chuymapan jikjjatasi ukjja janiw khitis amuykaspati.
11 Jan wali jaqenakan utapajj tukjatäniwa,+ukampis cheqap sarnaqer jaqenakan carpapajj suma uttʼayatäniwa.
12 Mä thakiw utji, uka thakejja jaqetakejj cheqa thakïkaspas ukhamawa,+ukampis qhepatjja uka thakejj jiwañaruw api.+
13 Mä jaqejj larusiskchisa chuymapajj tʼaqesiskaspawa,kusisiñasti llakisiñaruw tukuspa.
14 Khititï kutkatasir chuymanïki ukajja, jan wali luratanakapatwa jan walin uñjasini,+ukampis mä suma jaqejja luratanakaparjamaw pago katoqe.+
15 Jan experienciani jaqejja taqe kuntï jupar sapki ukjja creyikiwa,ukampis amuytʼasir jaqejja kunsa lurani uk sum amuytʼasi.+
16 Yatiñan jaqejja wali amuytʼasiriwa, jan walitsa jitheqtarakiwa,ukampis jan amuytʼasir jaqejja jan amuytʼasisaw kuns luri,* jupa pachparus wal confiyasiraki.
17 Khititï jankʼak coleraski ukajja, jan amuytʼasisaw kuns luri,+ukampis khititï taqe kunsa sum amuytʼaski ukajja uñisitawa.
18 Jan experienciani jaqenakajja jan amuytʼasirïpjjatapwa uñachtʼayapjjani,ukampis amuytʼasir jaqenakajja yatiñ coronampi uchatäpjjewa.+
19 Qhoru* jaqenakajja suma jaqenak nayraqatanwa altʼasipjjani,jan wali jaqenakajja cheqap sarnaqer jaqenakan punkunakapanwa altʼasipjjani.
20 Pobre jaqejja vecinonakapampis uñisitawa,+ukampis qamir jaqen amigonakapajj waljanïpjjewa.+
21 Khititï jaqe masipar uñiski ukajja juchachasiskiwa,ukampis khititï jan khiti yanapirin jaqet sinttʼaski ukajja kusisitawa.+
22 ¿Janit jan walinak amtir jaqenakajj chhaqanukupkani?
Ukampis kunatï walïki uk lurañatak taqe chuyma amtir jaqenakajja munatäpjjaniwa, confiykañäpjjarakiniwa.+
23 Taqe chʼama tukuñ trabajonjja askinakaw utji,ukampis laka mayak parlañajja pisin jakasiñaruw api.+
24 Yatiñan jaqenakan coronapajja utjirinakapawa,ukampis jan amuytʼasir jaqenakajja jan amuytʼasirïsipkakiwa.+
25 Cheq parlir testigojja jakäwinakwa salvi,ukampis kʼari testigojja sapa kut lak jistʼarasaw kʼarisi.
26 Jehová Diosar ajjsarir jaqejja taqe kunanwa jupar confiyi,+uka jaqen Diosar ajjsaratap laykojj wawanakapajj jarkʼaqatäpjjaniwa.+
27 Jehová Diosar ajjsarañajja jakañ chuririwa,ukhamat mä jaqer jiwañ trampanakat jitheqtayañataki.
28 Walja jaqenakan mä markajja reyin jachʼañchäwipawa,+ukampis jan khitir apnaqañajj utjki ukhajja, mä gobiernon apnaqäwipajj tukusiwa.
29 Pacienciani* jaqejja wali amuytʼasiriwa,+ukampis jan pacienciani jaqejja jan amuytʼasirïtapwa uñachtʼayi.+
30 Pacienciani chuymajja cuerporojj jakañwa churi,ukampis envidiasiñajja chʼakhanakar ñusantayir usuwa.+
31 Khititï jan khiti yanapirin jaqerojj engañjas aparki ukajja Luririparuw jiskʼachi,+ukampis khititï pobre jaqet sinttʼaski ukajja Luririparuw jachʼañchi.+
32 Jan wali jaqejja pachpa jan wali luratapatwa tukjat uñjasini,ukampis cheqap sarnaqer jaqejja taqpach chuymampi servisa sarnaqatap laykuw jarkʼaqatäni.+
33 Amuytʼasir jaqejja janiw yatiñanïtapat parlkiti,+ukampis jan amuytʼasir jaqejja kuntï yatki ukatjja jachʼañchasiwa.
34 Justiciajja mä markarojj jachʼañchiwa,+ukampis juchajja mä markarojj phenqʼachiwa.
35 Suma amuytʼasis kuns lurir servirejja reyirojj kusisiyiwa,+ukampis mä phenqʼa sarnaqerejja wal jupar colerayi.+
Notanaka
^ Ukajja, “jan amuytʼasir jaqenakajja jan amuytʼasirïtapampiw yaqhanakar engañjapjje” sasaw jaqokipasirakispa.
^ Jan ukajja, “colerasiriwa”.
^ Variante: “Phiru”.
^ Jan ukajja, “Jan ratuk colerasiri”.
