Proverbios 5:1-23
5 Nayan wawaja, yatiñajarojj wali amuyump istʼam.
Amuytʼasirïñ toqet kuntï nayajj yatichkta ukarojj wali amuyump istʼam,*+
2 ukhamat suma amuytʼasirïtam jarkʼaqañamatakiukhamarak uñtʼañsa pachpa lakamampi jarkʼaqañamataki.+
3 Kuna laykutejj saranukut mä warmin* arunakapajj miskʼjam wali mojjsawa,+lakapajj aceitet sipansa jukʼamp qoñawa.+
4 Ukampis qhepatjja uka warmejj ajenjor uñtat wali kʼallkʼuwa,+purapar arini espadar uñtat wali arirakiwa.+
5 Kayunakapajj jiwañaruw saraqapjje.
Chellqtatanakapajj Sepulturar* cheqakiw sarapjje.
6 Jakañ apanki uka thakjja janiw jupajj yäqkiti.
Jupajj uks akswa sarnaqe, kawkirus saraski uksa janirakiw yatkiti.
7 Jichhajj nayan wawanakaja, istʼapjjeta,kuntï sapksma ukat janirak jitheqtapjjamti.
8 Uka warmirojj jan jakʼachasimti,utapar mantañ lugararus jan jakʼachasimti,+
9 ukhamat yaqhanak nayraqatanjja respeto jan aptʼasiñamataki,+janirak tʼaqesiñ maranak apthapiñamataki,+
10 ukhamat jan uñtʼat jaqenakajj kunanaktï chʼamamampi jikjjatkta ukanakamp jan sistʼasipjjañapataki,+wal trabajisin jikjjatkta ukanakajj janirak mä extranjero jaqen utapar puriñapataki.
11 Janitï ukhamäkanejja, jakañ vidam tukuyarojj tʼaqesïtawa,jañchimas cuerpomas qʼal tukuskani ukhaw tʼaqesïta.+
12 Jumajj akham sarakïtawa: “¡Cheqañchäwirojj wal nayajj uñisiyäta!
¡Cheqañchäwirojj walpun chuymajajj uñisïna!
13 Instructoranakajan arsutanakaparojj janiw nayajj istʼkayätti,janirakiw yatichirinakajarus wali amuyumpi istʼkayätti.
14 Jichhajj qʼala aynachtʼirjamätwa,taqe congregación taypina”*+ sasa.
15 Uma estanquemat um umtʼam,phujumat jalir um* umtʼam.+
16 ¿Kunatarak uma jalsunakamajj anqar waranukutänisti?
¿Kunatarak uma jalirinakamajj plazanakan waranukutänisti?+
17 Ukanakajj juma sapatakikiwa,janiw jan uñtʼat jaqenakatakïkiti.+
18 Uma jalsumajj bendisitäpan,waynäkasin casaraskta uka esposamampi kusisim,+
19 jupajj munasir venador* uñtatawa, qollunkir wali munkañ cabrar uñtasitawa.+
Pechonakapajj* taqe tiempon jumar kusisiypan.*
Sapa kutis munasiñapampi apayasim.+
20 Nayan wawaja, ¿kunatarak saranukut warmimp* apayasïtasti?
¿Kunatarak qʼañu juchan sarnaqer warmir* qhomantätasti?+
21 Jaqen thakinakapajja Jehová Dios nayraqatankiwa,jupajj taqe thakinakapwa uñjaski.+
22 Jan wali jaqejja pachpa pantjasitanakapamp katuntatawa,pachpa juchapan pitanakapampi* katuntatäniwa.+
23 Cheqañchäwi jan katoqasitap laykuw jupajj jiwani,sinti jan amuytʼasir jaqëtap laykuw chhaqarakini.
Notanaka
^ Hebreo arunjja, “jiñchum altʼayanim”.
^ Hebreo arunjja, “jan uñtʼat warmin”. Proverbios 2:16 texton notap liytʼäta.
^ Hebreo arunjja, “asamblea taypina ukat congregación taypina”.
^ Jan ukajja, “mojjsa um”.
^ Jan ukajja, “mä tarujar”. Ukajja, qachu venadotwa parlaski.
^ Jan ukajja, “machjaypan”.
^ Jan ukajja, “Ñuñunakapajj”.
^ Hebreo arunjja, “jan uñtʼat warmimp”. Proverbios 2:16 texton notap liytʼäta.
^ Hebreo arunjja, “extranjera warmir”. Proverbios 2:16 texton notap liytʼäta.
^ Variante: “kawuyanakapampi”.
