Proverbios 6:1-35
6 Nayan wawaja, jumatejj jaqe masimataki mä garantiat sarsta,+jumatejj jan uñtʼat mä jaqer amparam chursta,*+
2 jumatejj promesa luratamat katuntat uñjassta,mä arunjja jumatejj lakamat mistur arunak kawsa katuntat uñjassta ukhajja,+
3 nayan wawaja, jaqe masimajj munañaparuw apnaqtamjja,salvasiñatakejj ak luram:
jupan ukar sarasin humillasim, jaqe masimar kutin kutin wal ruwtʼasirakim.+
4 Jan jumajj ikjamti,janirak nayranakamsa chʼirmthapimti.
5 Kunjamtï animal katurin amparapat mä gacelajj salvaskejja, ukham jumajj salvasim,kunjamtï mä jamachʼejj jamachʼi katurin amparapat salvaskejja, ukham salvasim.
6 Jayra jaqe, kʼisimiranakan ukar saram,+kunanaksa lurapjje uk uñjanim, ukatsti yatiñan jaqer tukum.
7 Kʼisimiranakan janis comandantepasa, oficialapasa, apnaqeripas utjkchejja,
8 cosecha tiemponwa manqʼañanakap wakichapjje,+manqʼañanakapsa apthapipjjaraki.
9 Jayra jaqe, ¿kunapachkamarak ukan ikiskakïtasti?
¿Kunapacharak ikïwit sartätasti?
10 Mä rat iktʼaña, mä rat ikikipaña,ampar qhomjjartʼasisin mä rat samartʼaña,+
11 ukham lurasajj ratukiw pobre jaqer tuküta, mä lunthatas akatjamat atackiristam ukhama,mä armantat jaqes taqe utjirinakam aparkiristam ukhama.+
12 Jan kunatak serviri mä jan wali jaqew kʼarinak parlasin ukäwjanakan sarnaqaski.+
13 Jupajj nayranakapwa chʼipheqtʼayi,+ kayunakapampejj señanakwa luri, lukʼananakapampejj señaltʼarakiwa.
14 Jan wali chuymampejja,jupajj jan walinak lurañ amtaskakiwa,+ nuwasiñanaksa ukjan akjan utjayaskakiwa.+
15 Ukatwa jupan jan waltʼäwipajj mä akatjamat jutani,mä ratukiw jan mayampitak qʼala tukjatäni.+
16 Jehová Diosajj sojjta jan walinakaruw uñisi,jïsa, paqallqo jan walinakatwa jupajj* ajjtasi:
17 jachʼa jachʼa tukuñata,+ kʼarisiñata,+ jan juchan jaqer jiwayañata,+
18 jan walinak lurañ amtañanakata,+ jan walinak lurañatak jankʼak tʼijur kayunakata,
19 falso testigot sarasin sapa kuti kʼarisiñanakata,+jilatanak taypin nuwasiñanak utjayirinakata.+
20 Nayan wawaja, awkiman mandamientonakap phoqam,taykaman yatichäwinakap* jan apanukumti.+
21 Ukanakjja chuymamar imapunim,kunkamar chintʼasirakim.
22 Kunapachatï sarnaqkäta ukhajja, ukanakaw irpätam.
Kunapachatï iktʼaskäta ukhajja, ukanakaw uñjaskätam.
Kunapachatï sartaskäta ukhajja, ukanakaw parlapjjätam.*
23 Kuna laykutejj mandamientonakajj mä lamparawa,+leyejj mä qhanarakiwa,+sum sarnaqañatak cheqañchäwejj jakañar apir thakiwa.+
24 Ukanakajj jan wali warmitwa jarkʼaqätam,+qʼañu juchan sarnaqer warmin* wali munkañ arunakapatwa jarkʼaqätam.+
25 Uka warmin suma uñnaqtʼapjja jan chuymaman munamti,+janirak wali munkañ nayranakapampejj chuym lunthatayasimti,
26 mä chachajja mä prostituta warmi kawsajj mä jiskʼa tʼantʼar tukuyatawa,+ukampis adulterio juchan sarnaqer mä warmejja yaqha jaqen vidapwa aptʼasiyi.
27 ¿Mä chachajj isip jan naksuyasisajj nina sankʼanakampi pechopjjar apjjatasispati?+
28 Jan ukajja ¿mä chachajj nina sankʼanak patjjan kayunakap jan naksuyasisajj sarnaqaspati?
29 Jaqe masipan warmipampi ikintasir chachampejj ukhamarakiw pasi,uka warmir llamktʼkani uka chachajj castigataw uñjasini.+
30 Mä lunthatatï manqʼat awtjatäsin lunthataschi ukhajja,jaqenakajj janiw uka lunthatarojj jan wal uñjapkiti.
31 Ukampis kunapachatï jupar katjapkani ukhajja, paqallq ukhampiw jupajj kuttʼayjjañapa,utapankir wali valorani taqpach utjirinakapwa churañaparaki.+
32 Khititï mä warmimpi adulterio jucha lurki ukajja jan amuytʼasiriwa,adulterio jucha lurir jaqejja jupa pachpaw jan walir purtʼasi.+
33 Jupajj usuchjata ukhamarak jiskʼachataw uñjasini,+ phenqʼachat uñjasitapajj janiw armatäkaniti.+
34 Celoso uchasiñajja mä esposorojj wal colerayi,uka chachajj vengaskani ukhajj janiw sinttʼaskaniti.+
35 Qollqe churañ munatasa janiw katoqaskaniti,jupajj janiw pacienciaskaniti, jila alani mä regalsa jumajj churkchïtajja, janiw pacienciaskaniti.
