Proverbios 23:1-35
23 Kunapachatï manqtʼasiñatak mä reyimp qontʼaskäta ukhajja,nayraqatamankki uka manqʼa manqʼañatjja wal amuyasiñamawa.
2 Wal manqʼañ munsta ukhajja,mä cuchillomp mallqʼamar uchasim.*
3 Reyin suma manqʼanakapjja jan sint munamti,ukhamat uka manqʼamp jan engañjatäñamataki.
4 Yänak* jikjjatañ laykojj jan inamay chʼam tukumti,+jan uk lurjjamti, jan ukasti amuytʼasir jaqëtam uñachtʼayam.
5 Kunapachatï uka yänakar* nayranakamamp uñchʼukta ukhajja, uka yänakajj chhaqtjjakiwa,+kunjamtï pakarojj chheqanakajj jilarkejja, ukhamarakiw uka yänakarojj chheqanakajj jilarani, ukatsti jaltawayasaw alajjpachar sarjjapjjani.+
6 Michʼa jaqen wajjtʼatajj jan manqʼamti,janirak suma manqʼanakapsa sint munamti.
7 Jupajj qhawqsa manqʼaskta uk controlir jaqer uñtasitawa.
Jupasti “manqtʼasim, umtʼasim” sistamwa, ukampis janiw taqe chuymajj siskiti.*
8 Mä jukʼa manqtʼasitamjja kutsuyanjjätawa,jupar jachʼañchtʼatamas inamayakïniwa.
9 Jan amuytʼasir jaqerojj jan parlamti,+kuna laykutejj yatiñamp arsut arunakamarojj jiskʼachaniwa.+
10 Nayra qorpanakjja jan onjjtayamti,+wajchan* oraqeparus janirak pasakipamti,
11 kuna laykutejj jupanakan Arjjatiripajj* wali chʼamaniwa,jupaw jupanakar arjjatani, juma contras saytʼasirakini.+
12 Chuymamjja cheqañchäwir katuyam,jiñchumsti yatiñamp arsut arunakar katuyam.
13 Wayniturojj* cheqañchaskakim,+lawamp jawqʼjäta ukhajja, janiw jupajj jiwkaniti.
14 Lawamp jawqʼjam,ukhamat Sepulturat* jupar salvañamataki.
15 Nayan wawaja, chuymamatejj yatiñanïni ukhajja,nayan chuymajajj kusisiniwa.+
16 Kunatï cheqapäki uk lakamajj parlani ukhajja,taqpach chuymajajj* wal kusisini.
17 Chuymamajj jucharar jaqenakat jan envidiaspanti,+jan ukasti chuymamajj uru jurnäla Jehová Diosar ajjsarpan,+
18 ukhamatwa jutïrin kusisit jakasïta,+kuntï jumajj suykta ukas phoqasipuniniwa.
19 Nayan wawaja, istʼam, yatiñan jaqer tukum,chuymamsti cheqa thaknam irparakim.
20 Jan jumajj vino wal umir jaqenak taypinkamti,+janirak aycha wal manqʼer jaqenak taypinkamti,+
21 kuna laykutejj machir jaqesa jiljas manqʼer jaqesa pobreptaniwa,+iktʼañ wal munapjjatapatjja thantha isinakampiw isthapisipjjani.
22 Awkimar istʼam, jupïpanwa jumajj utjtajja,jan taykamarojj jilïrëjjatap laykukejj jiskʼachamti.+
23 Kunatï cheqäki uk alasim,* janipun aljamti,+yatiñsa, cheqañchäwsa, amuytʼasirïñsa alasim, janirak aljamti.+
24 Cheqap sarnaqer jaqen awkipajja kusisitapunïniwa,yatiñanïki uka wawan awkipajja wawapat kusisiniwa.
25 Awkimas taykamas kusisipjjaniwa,ususktam uka taykamajj wal kusisirakini.
26 Nayan wawaja, chuymam churita,nayranakamasti thakinakajan kusisiñ jikjjatpan.+
27 Prostituta warmejja wali manqha pʼiyar uñtasitawa,qʼañu juchan sarnaqer warmejja* kʼullkʼu phujur uñtasitawa.+
28 Uka warmejja mä lunthatar uñtataw suyjjati,+traicionero chachanakarus waljaptayarakiwa.
29 ¿Khitinakas tʼaqesipjje? ¿Khitinakas llakitäpjje?
¿Khitinakas chʼajjwañanakan uñjasipjje? ¿Khitinakas quejanakanïpjje?
¿Khitinakas ina chʼusat usuchjatäpjje? ¿Khitinakas chhayphu* nayranïpjje?
30 Walja horanak vino umapki ukanakawa,+mezclat vino thaqas sarnaqapki ukanakawa.*
31 Jan jumajj vinon wila colorap uñchʼukimti,kunjamsa vinojj copan wali sum llijti, kunjamsa mallqʼarojj wali sum manti uk jan uñchʼukimti.
32 Vinojj mä asirur* uñtasitaw achji,mä asirur uñtasitaw veneno antutaraki.
33 Nayranakamajj mayjanakakwa uñj-jjani,chuymamas jan walinakakwa amuyjjarakini.+
34 Lamar qota taypin winktʼat jaqjamäyätawa,barcon velopajj uchañäki uka lawa patjjan winktʼat jaqer uñtasitäyätawa.
35 Jumajj akham sätawa: “Nuwantapjjetuwa, ukampis janiw amuyaskatätti.*
Nuwjapjjetuwa, ukampis janiw amtaskti.
¿Kunapacharak nayajj sartasïsti?+
Mayampiw umjjattʼañ munta” sasa.
Notanaka
^ Jan ukajja, “controlasim”.
^ Jan ukajja, “Cosasanak”.
^ Jan ukajja, “cosasanakar”.
^ Hebreo arunjja, “janiw chuymapajj jumampïkiti”.
^ Jan ukajja, “jan awkin wajchan (iñun)”.
^ Hebreo arunjja, “Salviripajj”.
^ Jan ukajja, “Wawarojj; Waynarojj”.
^ Hebreo arunjja, “riñonanakajajj”.
^ Jan ukajja, “jikjjatam”.
^ Hebreo arunjja, “extranjera warmejja”. Proverbios 2:16 texton notap liytʼäta.
^ Variante: “chharphu”.
^ Jan ukajja, “malltʼañatak juntasipki ukanakawa”.
^ Jan ukajja, “katarir”.
^ Jan ukajja, “janiw uskitänti”.
