Proverbios 3:1-35
3 Nayan wawaja, yatichäwinakajat* jan armasimti,chuymamajj mandamientonakaj phoqpan,
2 kuna laykutejj ukanakajj walja urunakwa yaptʼätam,jakañ maranakampi sumankañampwa yaptʼätam.+
3 Munasiñasa* jan apanukuñasa* jan jumar jaytanukupkpanti.+
Ukanakjja kunkamar chintʼasim,chuymamar qellqantarakim,+
4 ukhamatwa Dios nayraqatansa jaqenak nayraqatansa+jumajj suma uñjatäyäta, suma amuytʼasir jaqet uñjatarakïyätawa.
5 Jehová Diosar taqe chuymamamp confiyam,+jan pachpa amuyumarojj confiyasimti.+
6 Taqe thakinakaman jupat amtasipunim,+jupaw cheqa thak uñachtʼayätam.+
7 Jan pachpa yatiñamarojj confiyasimti.+
Jehová Diosar ajjsaram, jan walitsa jitheqtarakim.
8 Ukasti cuerpomar qolliri mä qollar uñtasitäniwa,chʼakhamatakis phajttʼayirirakïniwa.
9 Wali valorani yänakamampi* Jehová Diosar jachʼañcham,+taqpach achunakamat sumäkis ukanakamp* jupar jachʼañcham,+
10 ukhamatwa manqʼañanak imañ utanakamajj wali phoqtʼatäni,+wakullanakamas machaq vinompiw jilararakini.
11 Nayan wawaja, Jehová Diosan cheqañchäwipjja jan apanukumti,+janirak jumar toqenoqatapatsa colerasimti,+
12 kuna laykutejj Jehová Diosajj khitinakarutï munaski ukanakarojj cheqañchiwa,+kunjamtï mä awkejj munat wawapampejj lurki ukhama.+
13 Khititï yatiña jikjjatki ukajj kusisitawa,+khititï amuytʼasirïña jikjjatki ukajj kusisitarakiwa.
14 Yatiña jikjjatañajj qollqe jikjjatañat sipansa jukʼamp sumawa,yatiña jikjjatañajj qori jikjjatañat sipansa jukʼamp sumawa.+
15 Yatiñajj coralanakat* sipansa jukʼamp valoraniwa,yatiñajja kuntï jumajj munkta ukampejj janiw igualaskaspati.
16 Kupi amparapanjja walja tiempo jakañaw utji,chʼeqa amparapansti utjirinïñampi jachʼañchäwimpiw utji.
17 Thakinakapajj kusisiñwa apani,taqe thakinakapajj sumankañwa apani.+
18 Khitinakatï yatiñat katuntasipki ukanakatakejja yatiñajj jakañ qoqaruw* tukuni,khitinakatï yatiñat wal katuntasisipkaki ukanakajj kusisitäpjjaniwa.+
19 Oraqen cimientonakapjja Jehová Diosajj yatiñampiw usküna.+
Alajjpachanakjja amuytʼasaw Diosajj sum uttʼayäna.+
20 Jupan yatiñapampejj wali manqhankir umanakajj jaljtayatäpjjänwa,qenayrantat alajjpachanakatsa sulljjatanïnwa.+
21 Nayan wawaja, jan ukanakat* armasimti.
Yatiñanïñsa amuytʼasirïñsa jarkʼaqam.
22 Ukanakaw jakañ churätam,kunkamatakis mä suma collaräniwa.
23 Ukhamatwa jumajj thakiman jan ajjsaras sarnaqäta,kayunakamas janiw kunapachas lanktʼaskaniti.*+
24 Kunapachatï ikiñatak winktʼaskäta ukhajja, janiw kuns ajjsarkätati,+ikintjjäta ukhajja, sumakiw iktʼasïta.+
25 Akatjamat pasir jan waltʼäwirojj janiw ajjsarkätati,+jan wali jaqenakjjar jutkani uka jachʼa thayarus janirakiw ajjsarkätati.+
26 Kuna laykutejj taqe chuymaw jumajj Jehová Diosar confiyäta,+kayunakaman mä trampar jaltʼañapsa janiw jupajj munkaniti.+
27 Khitinakatï yanap munapki ukanakarojja, jan janiw samti,+jumatï yanaptʼirjamästa ukhajja yanaptʼam.+
28 Jan jaqe masimarojj “¡sarjjam!, qharüruw kuttʼanïta, qharüruw churäma” sasajj samti,jumatï jichpach churirjamästa ukhajja.
29 Jaqe masimar jan waltʼayañatakejj jan kuna jan wals amtamti,+jupatejj jumamp chika jan ajjsaras jakaskchi ukhajja.
30 Mä jaqempejj jan kuna motivonejj jan nuwasimti,+jupatejj kuna jan walsa jan lurkstam ukhajja.+
31 Nuwasir jaqetjja jan envidiasimti,+janirak thakinakapan sarnaqañsa amtamti.
32 Engañjir jaqenakatjja Jehová Diosajj ajjtasiwa,+ukampis cheqap sarnaqer jaqenakan suma amigopawa.+
33 Jehová Diosan maldicionapajj jan wali jaqen utapjjankiwa,+ukampis cheqap sarnaqer jaqenakan utaparojj bendisiwa.+
34 Burlasirinakatjja Diosajj burlasiwa,+ukampis llampʼu chuyman* jaqenakarojj sumwa uñji.+
35 Yatiñan jaqenakajj jachʼañchatäpjjaniwa,ukampis jan amuytʼasir jaqenakajj jiskʼachatäpjjaniwa.+
Notanaka
^ Jan ukajja, “leyijat”.
^ Jan ukajja, “Munasiñasa jan jaytjasiñasa”.
^ Jan ukajja, “kunatï cheqäki ukasa”.
^ Jan ukajja, “nayrïr achunakamamp”.
^ Jan ukajja, “cosasanakamampi”.
^ Jan ukajja, “arbolaruw”.
^ Amuyatajja, Diosan yatiñapata ukhamarak amuytʼasirïtapatwa parlaski. Ukanak toqetjja akat nayra versiculonakanwa parlaski.
^ Jan ukajja, “kayunakamajj janiw kunampis usuchjasipkaniti”.
^ “Llampʼu chuymanïña” siski uk glosarion liytʼäta.
