愛心——一種寶貴嘅特質
使徒保羅喺上帝嘅啟示下寫道，由聖靈産生嘅果實有九種特質。（加拉太書5:22，23）佢將呢啲美好嘅特質睇成一個整體，稱為“聖靈嘅果實”。 * 呢個果實就係我哋要培養嘅“新品格”。（歌羅西書3:10）一棵樹得到悉心照顧就會結出果實，同樣，聖靈喺一個人嘅生活上發揮作用，呢個人就會表現出聖靈嘅果實。（詩篇1:1-3）
保羅提及聖靈果實嘅第一種寶貴特質就係愛心。呢種特質有幾寶貴？保羅話如果佢冇愛心，“就唔算得係乜嘢”。（哥林多前書13:2）到底愛心係乜嘢？我哋可以點樣培養呢種特質？我哋每日可以點樣表現愛心？
點樣將愛表現出嚟？
雖然好難用一啲字詞嚟解釋乜嘢係愛，不過聖經描述到愛會有啲乜嘢表現。例如，經文話愛係“有耐心、和藹仁慈嘅”，又講到愛“只會因真理而高興”，同埋愛“能够凡事包容，凡事相信，凡事希望，凡事忍耐”。愛亦都牽涉到對人有深厚嘅感情、真摯嘅關懷，而且希望同對方培養親密嘅關係。另一方面，缺乏愛心嘅人會表現出妒忌、驕傲、自私、罔顧規矩、心懷怨恨、斤斤計較嘅態度。同呢啲只顧自己嘅態度相反，我哋要培養嘅愛係“唔求自己嘅利益”嘅。（哥林多前書13:4-8）
效法耶和華同耶穌表現愛心
“上帝就係愛。”冇錯，愛係耶和華嘅本質。（約翰一書4:8）佢所做嘅一切都係佢愛心嘅明證。佢對人類所表現最偉大嘅愛就係，派耶穌嚟到地上為我哋受苦，為我哋犧牲生命。使徒約翰話:“上帝差佢獨生嘅兒子到世人當中，使我哋可以通過佢得生命。憑住呢一點，上帝嘅愛就喺我哋身上顯明出嚟。我哋仲未愛上帝，上帝已經愛我哋，差派佢嘅兒子嚟，作為求恩嘅祭牲為我哋除罪。噉樣就係愛嘞。”（約翰一書4:9，10）因為上帝嘅愛，我哋可以得到寬恕、希望同生命。
耶穌樂意遵行上帝嘅旨意，證明佢好愛人類。保羅寫道:“［耶穌］話:‘我嚟係要遵行你嘅旨意。’……我哋憑住呢個‘旨意’，靠住耶穌基督只係一次獻上佢嘅身體，就成聖嘞。”（希伯來書10:9，10）冇任何人可以表現更偉大嘅愛。耶穌話:“人為朋友捨棄生命，人嘅愛心冇比呢個更大㗎嘞。”（約翰福音15:13）我哋不完美嘅人，可唔可以效法耶和華同耶穌表現愛心呢？可以！等我哋嚟思考吓，我哋點樣先可以做得到。
“總要憑愛心行事”
保羅勸勉我哋:“我哋既然係蒙愛嘅兒女，就要效法上帝，總要憑愛心行事，正如基督愛我哋，為我哋捨棄咗自己”。（以弗所書5:1，2）我哋“總要憑愛心行事”，就係要喺生活嘅每一方面都表現出呢種特質。我哋除咗用言語，亦都通過行動嚟表現呢種愛。約翰寫道:“孩子們，我哋嘅愛，唔好空口講白話，要有真誠嘅行動。”（約翰一書3:18）例如，我哋愛上帝同其他人，就好想向人傳講“王國嘅好消息”。（馬太福音24:14；路加福音10:27）同樣，憑愛心行事，我哋就會樂於寬恕人，表現耐心、温和嘅態度。所以，聖經勸勉我哋:“耶和華點樣甘心寬恕咗你哋，你哋亦都要點樣甘心寬恕人。”（歌羅西書3:13）
表現真摯嘅愛唔等於感情用事。例如，感情用事嘅父母為咗令小朋友唔再扭計，就會即刻應承佢哋所有要求。不過有愛心嘅父母喺必要時會表現出堅定嘅態度。同樣，雖然上帝係愛，但係“耶和華所愛嘅，佢都管教”。（希伯來書12:6）如果我哋憑愛心行事，亦都會喺需要嘅時候施行適當嘅管教。（箴言3:11，12）當然要記得，因為我哋唔完美，施行管教嗰陣有時會缺乏愛心。所以，我哋每個人喺表現愛心方面都有改善嘅餘地。我哋可以點樣做？我哋嚟睇吓三個方法。
點樣培養愛心？
第一，求耶和華賜聖靈幫助我哋培養愛心。耶穌講到耶和華會“將聖靈賜俾懇求佢嘅人”。（路加福音11:13）如果我哋祈求聖靈，盡力“順應聖靈行事”，噉我哋喺所做嘅事上就會越來越有愛心。（加拉太書5:16）例如，如果你係會衆嘅長老，你可以祈求耶和華賜聖靈，幫助你仁慈噉運用聖經嘅原則向其他人提出勸告。如果你為人父母，你可以祈求聖靈幫助你控制怒火，滿懷愛心噉管教兒女。
第二，認真諗吓，當有人想激嬲耶穌嘅時候，耶穌點樣表現愛心。（彼得前書2:21，23）受到冒犯或者唔公平嘅對待嗰時，我哋更加需要記得基督嘅榜樣。喺噉嘅情況下，我哋最好問吓自己:“耶穌會點做呢？”一個叫莉伊嘅姊妹發覺，噉樣做可以幫助佢學識三思而後行。佢話:“有一次，一個同事發咗封電子郵件俾其他同事，批評我，話我嘅工作做得唔好。呢件事，傷得我好深。但係，我問自己:‘我可以點樣效法耶穌處理同呢個同事嘅關係呢？’我想像吓耶穌喺呢種情況下會點樣做，之後我就決定唔追究，當咩事都冇發生過。後來，我知道咗呢個同事原來有嚴重嘅健康問題，而且面對緊好大嘅壓力。我先至意識到佢寫嘅嘢好可能唔係佢本意。即使有人想激嬲耶穌，耶穌仲係繼續表現愛心。沉思佢嘅榜樣，幫助我向同事表現出同樣嘅愛。”冇錯，如果我哋效法耶穌，就會時刻懷住愛心行事。
第三，培養無私嘅愛，呢種愛係真基督徒嘅標誌。（約翰福音13:34，35）喺呢方面，經文鼓勵我哋培養耶穌懷有嘅“精神”。基督耶穌從天上嚟到地上，為我哋“徹底捨棄自己”，甚至“服從至死”。（腓立比書2:5-8）如果我哋效法呢種無私嘅愛，思想同感覺就會越來越似基督，亦都受到推動將其他人嘅需要放喺自己嘅需要之上。培養愛心仲可以帶嚟邊啲益處呢？
表現愛心所帶嚟嘅益處
我哋表現愛心，可以帶嚟長遠嘅益處。睇吓呢兩個例子:
表現愛心會點樣使我哋得益？
-
一個國際弟兄團體:因為我哋彼此相愛，無論我哋去到世界各地邊個會衆，都會受到弟兄姊妹熱情嘅歡迎。得到“世上嘅整個弟兄團體”嘅愛，係幾咁大嘅福分啊！（彼得前書5:9）除咗喺上帝嘅大家庭，你仲可以喺邊度揾到呢種愛呢？
-
和平:“用愛心彼此包容”使我哋可以享有“用和平維繫［嘅］團結”。（以弗所書4:2，3）我哋喺會衆聚會、分區大會，同埋區域大會親身體驗到呢種和平。相信你一定會好同意，喺呢個四分五裂嘅世界，呢種和平嘅精神的確與衆不同！（詩篇119:165；以賽亞書54:13）我哋努力追求和睦，表明我哋對其他人有深厚嘅愛，亦都會令天父嘅心歡喜。（詩篇133:1-3；馬太福音5:9）
“愛心先至能够强化人”
保羅寫道:“愛心先至能够强化人。”（哥林多前書8:1）愛心點樣强化人呢？哥林多前書係保羅寫俾哥林多弟兄姊妹嘅第一封信。呢卷書嘅第13章被稱為“愛的詩篇”，因為使徒保羅喺入面解釋到愛可以點樣强化人。例如，有愛心嘅人會為其他人嘅益處着想。（哥林多前書10:24；13:5）另外，有愛心嘅人會關心體諒人，和藹仁慈同耐心噉對待人。愛可以建立起温馨嘅家庭，團結嘅會衆。（歌羅西書3:14）
我哋有好多方式向其他人表現愛，但係對上帝嘅愛先至最有價值同最能够造益人。呢種愛可以使唔同背景、唔同種族、唔同語言嘅人團結起嚟，喜樂噉“並肩”事奉耶和華。（西番雅書3:9）願我哋決心，每一日都將聖靈果實嘅呢種寶貴特質表現出嚟。
^ 2段 呢篇文章係一個系列文章嘅第一篇。呢個系列由九篇文章組成，每篇文章會討論聖靈果實嘅一種特質。
