Jehova—Hin-o Hiya?

SAMTANG ginhahawanan an iya inaagian ha kagurangan han Cambodia, nakaabot hi Henri Mouhot, usa nga parasaliksik nga Franses han ika-19 ka siglo, ha haluag nga katubigan nga nakapalibot ha usa nga templo. Amo ito an Angkor Wat, an gidadakui relihiyoso nga monumento ha tuna. Ha usa la nga pagsiplat makakasumat hi Mouhot nga an ginlulumot na nga tinukod hinimo han mga kamot han tawo. “Gintukod han pipira kadaan nga Michelangelo,” hiya nagsurat, “mas matahom ito kay ha bisan ano nga nahibibilin ha aton nga disenyo han Gresya o Roma.” Bisan pa han damu ka siglo nga pagkabinayaan ngan pagpasibaya, waray hiya magruhaduha nga ha luyo han daku nga tinukod, mayada usa nga disenyador.

Makapainteres, an libro han kinaadman nga iginsurat mga siglo na an naglabay naggamit hin pariho nga pangatadongan, nasiring: “An tagsatagsa nga balay ginhimo han usa; kondi an naghimo han ngatanan nga mga butang amo an Dios.” (Hebreo 3:4) Kondi an iba bangin sumiring, ‘An mga binuhat han kinaiya naiiba tikang ha hinimo-han-tawo.’ Kondi, diri ngatanan nga syentista nauyon hito nga pagriwa.

Katapos kilalahon nga an “biokemikal nga mga sistema diri kay waray-kinabuhi nga mga butang,” hi Michael Behe, propesor ha biochemistry ha Lehigh University, Pennsylvania, E.U.A., nagpapakiana: “Mahimo ba disenyuhon hin maaramon an may-kinabuhi biokemikal nga mga sistema?” Ipinapakita niya nga an mga syentista yana nagdidisenyo han importante nga mga pagbag-o ha buhi nga mga organismo pinaagi han mga paagi sugad han genetic engineering. Oo, an  buhi ngan waray-kinabuhi nga mga butang mahimo “himoon”! Ha pag-usisa ha gigutiayi nga kalibotan han buhi nga mga selyula, hi Behe may pagkahipausa nga nagsiring nga an makuti nga mga sistema nga ginkukompuwesto han mga bahin nadepende ha usa kag usa ha pagbuhat. Ano an iya konklusyon? “An resulta hinin nagdudugang nga mga pangalimbasog ha pag-usisa ha selyula—ha pag-usisa han kinabuhi sumala ha molekula—nagpapahayag hin matin-aw, nga an selyula produkto han ‘disenyo!’ ”

Hin-o, kon sugad, an Disenyador ha luyo hini ngatanan nga makuti nga mga sistema?

Hin-o an Disenyador?

An baton makikita hiton kadaan nga libro han kinaadman nga ginkotar kanina—an Biblia. Ha siyahan nga mga pulong hito, binabaton han Biblia ha simple ngan matin-aw an pakiana kon hin-o an nagdisenyo han ngatanan nga mga butang. “Ha tinikangan an Dios naghimo han mga langit ngan han tuna.”—Genesis 1:1.

Kondi, ha pagpakilala han iya kalugaringon nga kaiba tikang ha iba nga ginsisiring nga amo an Dios, iginpapakilala han Maglalarang an iya kalugaringon pinaagi han naiiba nga ngaran: “Ha sugad hini nasiring an Dios nga hi Jehova, hiya nga nagbuhat han mga langit . . . hiya nga nagbitad han kahaloagan han tuna ngan hadton nagawas tikang hini; hiya nga naghatag han pagginhawa han katawohan dida.” (Isaias 42:5, 8) Jehova an ngaran han Dios nga nagdisenyo han uniberso ngan naghimo han kalalakin-an ngan kababayin-an ha tuna. Kondi hin-o hi Jehova? Ano nga klase hin Dios hiya? Ngan kay ano nga sadang ka mamati ha iya?

Kahulogan han Iya Ngaran

Siyahan ha ngatanan, ano an kahulogan han ngaran han Maglalarang, nga Jehova? An baraan nga ngaran iginsurat ha upat Hebreo nga letra (יהדה) ngan makikita hin haros 7,000 ka beses ha Hebreo nga bahin han Biblia. Ini nga ngaran gintatagad nga may hinungdan nga porma han Hebreo nga berbo ha·wahʹ (“nga magin”) ngan salit  nangangahulogan “Iya Ginpapahanabo nga Magin.” Ha iba nga mga pulong, maaramon nga ginpapahanabo ni Jehova an iya kalugaringon nga magin bisan ano nga karuyag niya nga magin basi matuman an iya mga katuyoan. Hiya nagigin Maglalarang, Hukom, Manluluwas, Nagsusustini han kinabuhi, ngan iba pa, basi matuman an iya mga saad. Dugang pa, an Hebreo nga berbo mayada gramatiko nga porma nga nagpapasabot hin buhat nga iginpapadayon basi matuman. Iginpapasabot hini nga hi Jehova nagpapahanabo pa gihapon han iya kalugaringon nga magin paratuman han iya mga saad. Oo, hiya an buhi nga Dios!

Nalabaw nga mga Kuwalidad ni Jehova

Ipinapakita han Biblia ini nga Maglalarang ngan paratuman han iya mga saad nga makaruruyag gud nga persona. Iginpahayag mismo ni Jehova an iya pangirilal-an nga mga kuwalidad ngan nagsiring: “Hi Jehova, hi Jehova, usa ka Dios nga maloloy-on ngan mapinairon, mahinay ha kasina, ngan hura hin kalooy ngan hin kamatuoran; matinipigon han kalooy ha mga yinukot, mapinasayloon han karat-an ngan han pagtalapas ngan han sala.” (Eksodo 34:6, 7) Iginlaladawan hi Jehova sugad nga Dios han mahigugmaon-nga-kalooy. An Hebreo nga pulong nga ginamit dinhi mahimo liwat ighubad nga “maunungon nga gugma.” Ha pagtuman han iya waray kataposan nga katuyoan, maunungon nga nagpapadayon hi Jehova ha pagpakita hin gugma ha iya mga linarang. Diri mo ba pabibilhan an sugad nga gugma?

Hi Jehova maiha liwat masina ngan madagmit magpasaylo han aton mga sayop. Makalilipay an makaupod han usa ka persona nga diri nagbibiling-hin-sayop kondi disidido magpasaylo ha aton. Kondi diri ito nangangahulogan nga ginpapabay-an ni Jehova an sayop nga buhat. Hiya nagpahayag: “Ako, hi Jehova, nahigugma han kasubayan, ako nangangalas han panikas lakip an karat-an.” (Isaias 61:8) Sugad nga Dios han hustisya, diri niya ginpapabay-an ha kadayonan an mga magpakasasala nga nagpapadayon ha ira karaotan. Salit, makakasiguro kita nga ha iya igo nga panahon, tatadungon ni Jehova an kawaray-hustisya ha kalibotan ha palibot naton.

 An pagtipig han hingpit nga pagkatimbang butnga han mga kuwalidad han gugma ngan hustisya nagkikinahanglan hin kinaadman. Gintitimbang ni Jehova inin duha nga kuwalidad ha urusahon nga paagi kon nakikig-upod hiya ha aton. (Roma 11:33-36) Siyempre, an iya kinaadman makikita ha bisan diin. An mga urusahon han kinaiya nagpapahayag hito.—Salmo 104:24; Proberbios 3:19.

Kondi, an pagkaada kinaadman diri igo na. Basi matuman an iya nahuhunahuna, an Maglalarang kinahanglan magkaada liwat bug-os nga gahum. Ipinapakita han Biblia nga hiya sugad hito nga Dios: “Alsaha ha hitaas an iyo mga mata, ngan kitaa kon hin-o an naghimo hini, nga nagpakita han ira panon ha kadam-an . . . pinaagi han kadaku han iya gahum, . . . waray usa nga nakukulang.” (Isaias 40:26) Oo, hi Jehova ‘mayada daku nga gahum’ nga magagamit niya ha pagtuman han iya kaburut-on. Diri ba an sugad nga mga kuwalidad nakakadani ha imo kan Jehova?

Mga Kapulsanan ha Pagkilala kan Jehova

Hi Jehova ‘waray maglarang [han tuna] ha waray kapulsanan’ kondi ‘naghitsura hini basi pag-ukyan’ han mga tawo nga mayada makahuluganon nga relasyon ha iya. (Isaias 45:18; Genesis 1:28) Nagtatagad hiya ha iya tunan-on nga mga linarang. Iginhatag niya ha katawohan an hingpit nga tinikangan ha sugad-hardin nga panimalay, usa ka paraiso. An mga tawo, ha ira bahin, nagbubungkag hito, nga nakakapasubo gud kan Jehova. Kondi, sugad han iginpapasabot han iya ngaran, tutumanon ni Jehova an iya orihinal nga katuyoan para ha katawohan ngan ha tuna. (Salmo 115:16; Pahayag 11:18) Ibabalik niya an Paraiso ha tuna para hadton disidido ha pagsugot ha iya sugad nga iya mga anak.—Proberbios 8:17; Mateo 5:5.

An kataposan nga libro han Biblia nagsasaysay han kuwalidad han kinabuhi nga pahihimulsan mo hiton nga Paraiso: “Pagpapahiron niya an ngatanan nga luha tikang ha ira mga mata; ngan mawawaray na kamatayon; ngan mawawaray na an kabidoan, bisan pagtangis, bisan kasakit pa  gud: kay an siyahan nga mga bagay nag-agi na.” (Pahayag 21:3, 4) Ito an totoo nga kinabuhi nga karuyag ni Jehova nga pahimulsan mo. Mahinatagon gud hiya nga Amay! Disidido ka ba nga mahibaro pa mahitungod ha iya ngan kon ano an ginkikinahanglan ha imo basi mabuhi ha Paraiso?

Gawas la kon iba an ipinakita, an ngatanan nga kotasyon han Biblia tikang ha Samar-Leyte nga Biblia han PBS nga may moderno nga ortograpiya.