2 Corinto 7:1-16
7 Salit mga hinigugma, tungod kay may-ada kita hini nga mga saad, limpyohan naton an aton kalugaringon ha ngatanan nga kahugaw han lawas ngan kasingkasing,* basi magin mas baraan kita nga may kahadlok ha Dios.
2 Tagi kami hin lugar ha iyo kasingkasing. Waray kami ginbuhat nga sayop ha bisan hin-o, waray kami magpakaraot ha bisan hin-o, ngan waray kami magsalingabot ha bisan hin-o basi makabentaha.
3 Diri ko ini ginsisiring basi hukman kamo. Kay hadto nagsiring ako nga aadi kamo ha amon kasingkasing, basi kaupod namon kamo, mamatay man kita o mabuhi.
4 May daku nga kagawasan ako ha pagyakan ha iyo. Iginhahambog ko gud kamo. Puno ako hin pagliaw ngan daku gud an akon kalipay bisan pa han ngatanan nga amon kasakitan.
5 Ha pagkamatuod, han inabot kami ha Macedonia, an amon mga lawas waray pakapahuway, kondi padayon nga ginsakit kami ha ngatanan nga paagi, may mga pagkontra ha gawas ngan mga kahadlok ha sulod.
6 Bisan pa hito, an Dios nga nagliliaw ha mga nasusubo nagliaw ha amon pinaagi han presensya ni Tito;
7 pero diri la pinaagi han iya presensya, kondi pinaagi liwat han pagliaw nga nakarawat niya tungod ha iyo, han iginsumat niya ha amon an iyo paghandom ha akon, an iyo daku nga kabido, ngan an iyo sinsero nga kabaraka ha akon. Tungod hito mas nalipay gud ako.
8 Salit bisan kon napasubo ko kamo tungod han akon surat, diri ko ito ginbabasolan. Bisan kon ha tinikangan nagbasol ako, (maaram ako nga ito nga surat nakapasubo ha iyo, pero madaliay la,)
9 yana nalilipay ako, diri tungod kay napasubo kamo, kondi tungod kay an iyo kasubo nakaaghat ha iyo nga magbasol. Kay an iyo kasubo nakakalipay ha Dios, salit waray kamo mag-antos hin kadaot tikang ha amon.
10 Kay an kasubo nga uyon ha kaburut-on han Dios nag-aaghat hin pagbasol nga nagriresulta hin katalwasan nga diri pagbabasolan; pero an kasubo han kalibotan nagriresulta hin kamatayon.
11 Nakita niyo nga tungod han iyo kasubo nga uyon ha kaburut-on han Dios nagresulta ito ha iyo pagin sinsero, oo, napamatud-an niyo nga waray kamo sayop, nasina kamo ha sayop, nahadlok kamo ha Dios, nagpakita kamo hin sinsero nga hingyap ngan kaaktibo, ngan gintadong niyo an sayop! Ha ngatanan nga paagi iginpakita niyo nga putli kamo may kalabotan hini.
12 Bisan kon nagsurat ako ha iyo, waray ko ito buhata para ha usa nga nagbuhat hin sayop, o para ha ginbuhatan hin sayop, lugod basi an iyo kadasig ha pagsunod ha amon makita gud ha butnga niyo ha atubangan han Dios.
13 Salit naliliaw kami.
Pero labot pa han pagliaw, mas nalipay gud kami tungod han kalipay ni Tito, kay naparig-on niyo ngatanan an iya espiritu.
14 Kay kon iginhahambog ko kamo ha iya, waray ako kaalohi tungod han akon ginsiring; kondi sugad la nga totoo gud an ngatanan nga iginsumat namon ha iyo, sugad man totoo gud an amon iginhahambog kan Tito.
15 Sugad man, nagtitikadugang an iya pagpalangga ha iyo samtang iya gindudumdom an pagkamasinugtanon niyo ngatanan ngan an pagkarawat niyo ha iya nga may kahadlok ngan pangurog.
16 Nalilipay ako nga ha ngatanan nga iyo ginbubuhat, napaparig-on ako niyo.
Mga footnote
^ Ha literal, “unod ngan espiritu.”
