2 Corinto 4:1-18
4 Salit tungod kay may-ada kami hini nga sagrado nga buruhaton uyon ha kalooy nga iginpakita ha amon, diri kami naundang,
2 lugod gintalikdan namon an tinago ngan makaarawod nga mga butang, diri kami nanlilimbong, diri namon ginbabaliko an pulong han Dios, kondi pinaagi ha pagpahayag han kamatuoran nagigin maopay nga susbaranan kami ha tagsa nga konsensya han tawo ha atubangan han Dios.
3 Kon an maopay nga sumat nga amon iginpapahayag yana natatabonan, may tabon ito ha mga mabubungkag,
4 ha mga diri-tumuroo nga an mga hunahuna ginbubuta han dios hini nga sistema, basi an kalamrag han mahimayaon nga maopay nga sumat mahitungod han Kristo, nga amo an dagway han Dios, diri maglamrag ha ira.
5 Kay diri kami nagsasangyaw mahitungod han amon kalugaringon kondi mahitungod kan Kristo Jesus sugad nga Ginoo, ngan mga uripon niyo kami tungod kan Jesus.
6 Kay an Dios nagsiring: “Magsanag an kalamrag tikang ha kasisidman,” ngan ginlamragan niya an amon kasingkasing han mahimayaon nga kahibaro mahitungod ha iya pinaagi han nawong han Kristo.
7 Pero may-ada kami hini nga bahandi ha mga surudlan nga hinimo tikang ha tuna,* basi ipakita nga an diri-ordinaryo nga gahum nagtitikang ha Dios, diri ha amon kalugaringon.
8 Gin-iipit kami ha ngatanan nga paagi, pero diri naiipit nga diri na nakakagios; ginsasamok kami, pero diri nga waray na gud magagawsan;*
9 gintitimaraot kami, pero diri ginpapabay-an; gintutumba kami, pero diri nabubungkag.
10 Gin-iilob pirme han amon lawas an makamaratay nga pagtratar pariho han gin-antos ni Jesus, basi an kinabuhi ni Jesus makita liwat ha amon lawas.
11 Kay nabubuhi kami nga pirme naatubang ha kamatayon tungod kan Jesus, basi an kinabuhi ni Jesus makita ha amon mortal nga lawas.
12 Salit bisan kon naatubang kami hin kamatayon, nagriresulta ito hin kinabuhi para ha iyo.
13 May-ada kami espiritu han pagtoo nga pariho han nahisurat: “Nagpakita ako hin pagtoo, salit nagyakan ako.” Nagpapakita liwat kami hin pagtoo salit nagyayakan kami,
14 kay maaram kami nga an nagbanhaw kan Jesus magbabanhaw liwat ha amon, sugad la han pagbanhaw kan Jesus, ngan ipipresentar kami kaupod niyo.
15 Kay ini ngatanan para ha iyo kaopayan, basi magdugang pa gud an diri-matupngan nga pagkabuotan tungod kay nagtitikadamu an nagpapasalamat para ha kadayawan han Dios.
16 Salit diri kita naundang, kay bisan kon an aton lawas nagtitikaluya, an aton personalidad nababag-o gud kada adlaw.
17 Kay bisan kon an kasakitan temporaryo la ngan magaan, naghahatag ito ha aton hin nagtitikadaku* ngan waray kataposan nga kadungganan,
18 samtang an aton mga mata nakapokus, diri ha mga butang nga nakikita, kondi ha mga butang nga diri-nakikita. Kay an mga butang nga nakikita temporaryo la, pero an mga butang nga diri-nakikita waray kataposan.
Mga footnote
^ O “mga tibod nga tikang ha lapok.”
^ O “waray na gud paglaom.”
^ Ha literal, “nagtitikabug-at.”
