2 Corinto 11:1-33
11 Karuyag ko unta nga pasensyahan ako niyo han akon gutiay nga pagkadiri-makatadunganon. Pero ha pagkamatuod, nagpapasensya kamo ha akon!
2 Kay naabugho ako tungod ha iyo pariho han pangabugho han Dios, kay iginsaad ko nga ipakasal kamo ha usa nga lalaki basi maipresentar ko kamo ha Kristo sugad hin putli nga birhen.
3 Pero nababaraka ako nga bangin madaot an iyo mga hunahuna sugad kan Eva nga nalimbongan han halas ha tuso nga paagi, ngan diri na kamo magin sinsero ngan putli nga sadang niyo ipakita ha Kristo.
4 Kay kon may naabot ngan nagsasangyaw hin Jesus nga iba han amon iginsasangyaw, o kon nakakakarawat kamo hin espiritu nga iba han iyo nakarawat, o hin maopay nga sumat nga iba han iyo ginkarawat, masayon kamo makapailob ha iya.
5 Kay ginhuhunahuna ko nga ha bisan usa nga butang waray ako magin ubos kay ha iyo sobra-kaopay nga mga apostol.
6 Pero bisan kon diri ako maopay magyakan, sigurado nga diri ako sugad hito ha kahibaro; kondi iginpasabot namon ito ha iyo ha ngatanan nga paagi ngan ha ngatanan nga butang.
7 O nakasala ba ako kay malipayon nga iginpahayag ko ha iyo nga waray bayad an maopay nga sumat han Dios ngan nagpaubos ako basi pahitas-on kamo?
8 Sugad hin ginpangawatan ko an iba nga mga kongregasyon tungod han pagkarawat ko han ira materyal nga bulig basi makagserbi ha iyo;
9 pero han nakada pa ako ha iyo ngan han nanginahanglan ako, waray ako magpabug-at ha bisan hin-o, kay an kabugtoan nga inabot tikang ha Macedonia hura nga nagsustento han akon mga panginahanglan. Oo, ha ngatanan nga paagi waray gud ako magpabug-at ha iyo ngan padayon nga bubuhaton ko ito.
10 Tubtob nga aadi ha akon an kamatuoran han Kristo, diri ako maundang ha paghambog mahitungod han mga rehiyon han Acaya.
11 Kay ano? Tungod ba kay diri ko kamo hinigugma? Maaram an Dios nga hinigugma ko kamo.
12 An ginbubuhat ko yana akon igpapadayon, basi mawara ko an pasangilan han mga namimiling hin basihan nga magin pariho ha amon an katungdanan nga ira iginhahambog.
13 Kay ito nga kalalakin-an buwa nga mga apostol, malimbong nga mga magburuhat, ngan nagpapakaapostol hira han Kristo.
14 Diri ito urusahon, kay hi Satanas mismo padayon nga nagpapakaanghel han kalamrag.
15 Salit diri ako nahipapausa kon an iya mga ministro padayon nga nagpapakaministro han katadongan. Pero an mahitatabo ha ira ha kataposan madepende ha ira mga buhat.
16 Uutruhon ko pagsiring, Waray bisan hin-o nga maghunahuna nga diri ako makatadunganon. Pero bisan kon sugad hito an iyo paghunahuna, karawata ako niyo pariho hin tawo nga diri-makatadunganon, basi ako liwat makaghambog hin gutiay.
17 An ginyayakan ko yana diri pagsubad ha Ginoo, kondi nagyayakan ako pariho hin tawo nga diri-makatadunganon, nga hambugiro ngan sobra an kompyansa ha kalugaringon.
18 Tungod kay damu an naghahambog han mga butang hini nga kalibotan, maghahambog liwat ako.
19 Tungod kay “makatadunganon” gud kamo, malipayon nga nagpapailob kamo ha mga tawo nga diri-makatadunganon.
20 Ha pagkamatuod, nagpapailob kamo ha bisan hin-o nga nag-uuripon ha iyo, ha bisan hin-o nga nag-aagaw han iyo mga panag-iya ngan han aada ha iyo, ha bisan hin-o nga karuyag lumabaw ha iyo, ngan ha bisan hin-o nga nagtatampalo ha iyo.
21 Kaarawdan namon an akon pagsiring hini, kay sugad hin nagbuhat kami tungod han kaluyahan.
Pero kon waray-kahadlok nga nagbubuhat an iba—nagyayakan ako ha diri-makatadunganon nga paagi—ako liwat waray-kahadlok nga nagbubuhat.
22 Mga Hebreo ba hira? Hebreo liwat ako. Mga Israelita ba hira? Israelita liwat ako. Katulinan ba hira ni Abraham? Ako liwat.
23 Mga ministro ba hira han Kristo? Nabaton ako pariho hin lurong nga tawo, kay labaw pa gud ako hito: mas damu an akon ginbuhat, mas agsob ako prisuhon, nag-antos ako hin diri-maihap nga pagkastigo, ngan damu ka beses nga haros mamatay ako.
24 Lima ka beses ako ginlatigo han mga Judio nga kulang na la hin usa nga latob basi mag-40,
25 tulo ka beses ako ginbalbag, makausa ako ginbato, tulo ka beses nga nakaeksperyensya ako hin kalunod han barko, usa ka gab-i ngan usa ka adlaw ako ha lawod;
26 ha akon agsob nga pagbiyahe nakaeksperyensya ako hin mga peligro ha mga salog, ha mga tulisan, ha akon nasud mismo, ha iba nga mga nasud, ha syudad, ha kamingawan, ha dagat, ha butnga han buwa nga kabugtoan.
27 Nakaeksperyensya liwat ako hin makuri nga trabaho ngan duro nga kakapoy, mga gab-i nga waray pagkaturog, gutom ngan uhaw, agsob nga waray kinakaon, kahagkot ngan kawaray iginsusul-ot.*
28 Labot han mga gin-unabi na, kada adlaw nababaraka liwat ako ha ngatanan nga kongregasyon.
29 Hin-o an maluya, ngan diri ako nanluluya? Hin-o an nahipapakdol, ngan diri ako nasisina?
30 Kon kinahanglan maghambog ako, ighahambog ko an mga butang nga nagpapakita han akon kamaluya.
31 An Dios ngan Amay han Ginoo nga hi Jesus, Hiya nga sadang dayawon ha kadayonan, maaram nga diri ako nagbubuwa.
32 An syudad han Damasco ginbinantayan han gobernador nga sakop han hadi nga hi Aretas basi arestuhon ako,
33 pero igintunton ako ha bintana han pader pinaagi hin alat ngan nakapalagiw ako.
Mga footnote
^ Ha literal, “pagin hubo.”
