2 Corinto 8:1-24
8 Yana mga kabugtoan, karuyag namon nga hibaroan niyo an mahitungod han diri-matupngan nga pagkabuotan han Dios nga iginhatag ha mga kongregasyon ha Macedonia,
2 nga samtang nakakaeksperyensya hira hin duro nga kasakitan, nagpakita hira hin daku nga kalipay ngan pagkamahinatagon bisan pa han ira kapobrehan.
3 Kay ginhimo nira ito uyon han ira maaakos, oo, ginpapamatud-an ko nga lahos pa ngani han ira maaakos,
4 samtang kinaburut-on nga naghinangyo gud hira ha amon nga tagan hira hin pribilehiyo ha mahigugmaon nga paghatag ngan pagbulig ha mga baraan.
5 Ngan labaw pa ha amon ginlalaoman an ira ginbuhat, kay mas gin-una nira an Ginoo ngan kami kay ha ira kalugaringon pinaagi han kaburut-on han Dios.
6 Salit gin-aghat namon hi Tito nga hiya an magtapos han pag-asikaso hini nga iyo mahigugmaon nga hatag, kay hiya man an nagtikang hini.
7 Labot pa, tungod kay hura kamo ha ngatanan, ha pagtoo ngan abilidad ha pagyakan, ha kahibaro ngan ha pagin madasigon ngan ha gugma namon ha iyo, hinaot magin hura liwat kamo hini nga mahigugmaon nga paghatag.
8 Diri ko ini ginsisiring sugad nga sugo, kondi basi ipahibaro ha iyo an pagin madasigon han iba ngan basi sarihan an pagkasinsero han iyo gugma.
9 Maaram kamo han diri-matupngan nga pagkabuotan han aton Ginoo nga hi Jesu-Kristo, nga bisan kon riko hiya nagin pobre hiya para ha iyo, basi magin riko kamo pinaagi han iya kapobre.
10 Mahitungod hini, ini an akon opinyon: para ini ha iyo kaopayan, kay han naglabay nga tuig diri la kay gintikangan niyo an buruhaton kondi nagpakita liwat kamo hin hingyap nga buhaton ito.
11 Salit yana, taposa niyo an iyo gintikangan pagbuhat, basi an iyo pagkadisidido ha pagbuhat matapos uyon ha iyo mga katigayonan.
12 Kay labi nga makalilipay kon an tawo disidido gud maghatag, depende ha iya gintatag-iya, diri depende ha diri niya gintatag-iya.
13 Kay diri ko karuyag nga magin masayon ito para ha iba pero makuri para ha iyo;
14 kondi basi pinaagi han pagkasarahid mapun-an yana han iyo sobra an ira panginahanglan, ngan basi mapun-an liwat han ira sobra an iyo kakulangan, basi magkaada pagkasarahid.
15 Sugad la han iginsurat: “An tawo nga nagtirok hin damu waray magkaada hin sobra, ngan an tawo nga nagtirok hin gutiay waray magkulang.”
16 Salamat ha Dios nga hi Tito sinsero nga nagtatagad liwat ha iyo pariho ha amon,
17 kay ginkarawat gud niya an pagdasig, pero tungod kay disidido gud hiya, kinaburut-on nga makada hiya ha iyo.
18 Pero pauupdon namon ha iya an bugto nga gindadayaw ha ngatanan nga kongregasyon tungod han pagpasamwak han maopay nga sumat.
19 Labot pa, ginpili liwat hiya han mga kongregasyon basi magin kaupod namon ha pagbiyahe tungod hini nga kinaburut-on nga regalo para ha kadayawan han Ginoo ngan sugad nga pamatuod han amon pagkadisidido ha pagbulig.
20 Salit ginlilikyan namon nga an bisan hin-o may makita nga sayop mahitungod hinin kinaburut-on nga kontribusyon nga amon gin-aasikaso.
21 Kay kami “tangkod nga nag-aasikaso hini ngatanan, diri la ha pagkita ni Jehova, kondi ha pagkita liwat han mga tawo.”
22 Ginpapaupod liwat namon ha ira an aton bugto nga damu ka beses nga napamatud-an namon nga madasigon ha damu nga butang, pero mas madasigon pa gud yana tungod han iya daku nga pagsarig ha iyo.
23 Kondi kon may pagruhaduha mahitungod kan Tito, hiya an akon kaupod-upod ngan igkasi-magburuhat para ha iyo kaopayan; o kon may mga pagruhaduha mahitungod ha aton kabugtoan, mga apostol hira han mga kongregasyon ngan naghahatag hira hin kadayawan ha Kristo.
24 Salit ipakita niyo ha ira an iyo gugma ngan ipakita ha ira kon kay ano nga iginhahambog namon kamo ha mga kongregasyon.
