2 Corinto 3:1-18
3 Kinahanglan ba kami magpakilala utro ha iyo? O pariho han iba nga tawo, kinahanglan ba kami maghatag ha iyo hin mga surat han rekomendasyon o kamo an mahatag ha amon?
2 Kamo mismo an amon surat han rekomendasyon, nga iginsurat ha amon kasingkasing ngan hinbabaroan ngan ginbabasa han ngatanan nga tawo.
3 Kay iginpapakita niyo nga kamo an surat tikang ha Kristo nga iginsurat namon sugad nga mga ministro, diri pinaagi hin tinta kondi pinaagi han espiritu han buhi nga Dios, ngan iginsurat diri ha mga papan nga bato kondi ha kasingkasing.
4 Pinaagi han Kristo may pagsarig kami nga masisiring namon ini ha Dios.
5 Diri kami nasiring nga kwalipikado gud kami ha pagbuhat hini nga buruhaton, kondi an amon pagin kwalipikado nagtitikang ha Dios.
6 Ngan tungod ha iya nagin kwalipikado gud kami nga magin mga ministro han bag-o nga kasabotan, diri han sinurat nga balaud kondi han espiritu, kay an sinurat nga balaud nagriresulta hin kamatayon, pero an espiritu naghahatag hin kinabuhi.
7 Labot pa, an balaud nga nagriresulta hin kamatayon ngan iginsurat ha mga bato iginhatag nga may himaya nga tungod hito an mga anak han Israel waray makatutok ha nawong ni Moises tungod han mahimayaon nga kasilaw han iya nawong, pero ito nga himaya nawara.
8 Kon sugad, kay ano nga an paghatag han espiritu diri magkakaada mas labaw nga himaya?
9 Kay kon mahimayaon an balaud nga naghuhukom, mas mahimayaon an pagpasamwak han katadongan.
10 Ha pagkamatuod, bisan an sinurat nga balaud nga mahimayaon hadto ginkuhaan hin himaya tungod han himaya nga labaw gud hito.
11 Kay kon adto nga ginkuhaan hin himaya inabot nga may himaya, mas labi nga mahimayaon an bag-o nga ginkasabotan!
12 Salit tungod kay may-ada kita han sugad nga paglaom, may-ada kita daku nga kagawasan ha pagyakan,
13 ngan diri nagbubuhat han ginbuhat ni Moises han gintabonan niya an iya nawong basi an mga anak han Israel diri makatutok ha himaya han balaud nga wawad-on.
14 Pero nagin mangarol an ira mga hunahuna. Kay tubtob hini nga adlaw, ito nga tabon aada pa gihapon kon ginbabasa an daan nga kasabotan, kay makukuha la ito pinaagi han Kristo.
15 Ha pagkamatuod, tubtob yana kon ginbabasa an mga sinurat ni Moises, aada pa gihapon ha ira kasingkasing an tabon.
16 Pero kon nagbabag-o an usa nga tawo basi magsingba kan Jehova, nakukuha an tabon.
17 Hi Jehova an Espiritu, ngan kon hain an espiritu ni Jehova, may-ada kagawasan.
18 Ngan samtang an himaya ni Jehova iginpapakita naton pariho hin mga espiho kay waray na tabon an aton nawong, kita ngatanan nababag-o ngadto ha dagway nga pariho ha iya, tikang ha himaya ngadto ha pagin mas mahimayaon, uyon gud ha ginpapahinabo ni Jehova, an Espiritu.*
Mga footnote
^ O “an espiritu ni Jehova.”
