2 Corinto 2:1-17
2 Karuyag ko nga diri kamo masubo ha sunod nga pagbisita ko ha iyo.
2 Kay kon mapapasubo ko kamo nga nakakapalipay ha akon, hin-o pa an magpapalipay ha akon?
3 Salit iginsurat ko an akon ginbuhat basi pagkada ko, diri ako mapasubo han mga angay ko kalipayan, kay nasarig ako nga an nakakapalipay ha akon makakapalipay liwat ha iyo ngatanan.
4 Kay han nagsusurat ako ha iyo nagtinangis ako tungod han kasakit ngan kabido ha kasingkasing, diri basi pasub-on kamo, kondi basi hibaroan niyo an akon hilarom nga gugma ha iyo.
5 Kon may tawo nga nakapasubo, diri ako an iya napasubo kondi kamo ngatanan. Pero diri ko karuyag nga magyinakan pa mahitungod hini.
6 Ini nga pagsaway nga ginhihimo han kadam-an igo na para hito nga tawo.
7 Salit yana, mahigugmaon nga pasayloa ngan liawa lugod niyo hiya, basi diri hiya madaog han sobra nga kasubo.
8 Tungod hito gin-aaghat ko kamo nga ipakita an iyo gugma ha iya.
9 Ini an hinungdan nga nagsurat ako ha iyo: basi masiguro kon masinugtanon gud kamo ha ngatanan nga butang.
10 Kon ginpapasaylo niyo an bisan hin-o anoman an iya sayop, ginpapasaylo ko liwat hiya. Ha pagkamatuod, anoman an akon ginpasaylo (kon may ginpasaylo man ako), para ito ha iyo kaopayan ha atubangan han Kristo,
11 basi diri kita malimbongan ni Satanas, kay diri kita ignorante han iya mga taktika.
12 Han pag-abot ko ha Troas basi ipasamwak an maopay nga sumat mahitungod han Kristo, ngan han gin-abrihan ha akon an usa nga purtahan para ha buruhaton han Ginoo,
13 nabaraka gud ako kay waray ko makita hi Tito nga akon bugto. Salit nagsarit ako ha ira nga malakat na ako ngan nagpakadto ha Macedonia.
14 Salamat ha Dios nga pirme naggigiya ha aton ha martsa han kadaogan kaupod han Kristo ngan pinaagi ha aton iya iginpapasimhot ha ngatanan nga lugar an kahamot han kahibaro mahitungod ha iya!
15 Kay para ha Dios pariho kita hin mahamot nga sumat mahitungod han Kristo nga nasisimhot han mga matatalwas ngan han mga mabubungkag.
16 Para ha mga mabubungkag ito an alimyon han kamatayon nga magriresulta hin kamatayon, kondi para ha mga matatalwas ito an hamot han kinabuhi nga magriresulta hin kinabuhi. Ngan hin-o an kwalipikado gud hini nga buruhaton?
17 Kita, kay diri kita pariho han damu nga tawo nga parabaligya han pulong han Dios, lugod sinsero nga nagsasangyaw kita kaupod han Kristo. Oo, ginsugo kita han Dios ngan ginbubuhat naton ini ha atubangan han Dios.
