2 Corinto 1:1-24
1 Tikang kan Pablo, nga apostol ni Kristo Jesus pinaagi han kaburut-on han Dios, ngan kan Timoteo nga aton bugto, para ha kongregasyon han Dios ha Corinto upod na an ngatanan nga baraan ha bug-os nga Acaya.
2 Makarawat unta niyo an diri-matupngan nga pagkabuotan* ngan kamurayawan tikang ha Dios nga aton Amay ngan ha Ginoo nga hi Jesu-Kristo.
3 Pagdayawon an Dios ngan Amay han aton Ginoo nga hi Jesu-Kristo, an Amay han mahigugmaon nga kalooy ngan an Dios han ngatanan nga pagliaw,
4 nga nagliliaw ha aton ha ngatanan nga kasakitan, basi maliaw naton an iba ha bisan ano nga klase han kasakitan pinaagi han pagliaw nga nakakarawat naton tikang ha Dios.
5 Kay sugad la nga damu an aton gin-aantos tungod han Kristo, damu liwat an pagliaw nga aton nakakarawat pinaagi han Kristo.
6 Salit kon nag-aantos kami hin kasakitan, para ito ha pagliaw ngan katalwasan niyo; ngan kon ginliliaw kami, para ito ha pagliaw ha iyo basi mabuligan kamo nga makailob han mga kakurian nga gin-aantos namon.
7 Tungod hito, marig-on gud an amon paglaom para ha iyo, kay maaram kami nga sugad la nga nag-aantos kamo pariho han amon gin-aantos, liliawon liwat kamo pariho ha amon.
8 Mga kabugtoan, diri namon karuyag nga diri niyo hibaroan an kasakitan nga amon naeksperyensyahan ha distrito han Asia, nga ginpasakitan gud kami hin labaw ha amon kalugaringon nga kusog, salit waray gud kami kasigurohan bisan ha amon kinabuhi.
9 Oo, kombinsido kami nga nakarawat namon an sentensya nga kamatayon. Pero nahitabo ini basi sumarig kami, diri ha amon kalugaringon, kondi ha Dios nga nagbabanhaw han mga patay.
10 Tikang ha makaharadlok nga kamatayon gintalwas gud kami niya ngan tatalwason kami niya; ngan naglalaom kami ha iya nga padayon nga tatalwason kami niya.
11 Makakabulig liwat kamo pinaagi han iyo pangamuyo para ha amon, basi damu an magpasalamat para ha amon tungod han nakarawat namon nga pag-uyon sugad nga baton ha mga pag-ampo han damu nga tawo.*
12 Iginhahambog namon nga, ha kalibotan ngan labi na ha butnga niyo, nagawi kami nga may pagkabaraan ngan pagkasinsero sugad han igintututdo han Dios, diri pinaagi han kinaadman hini nga kalibotan, kondi pinaagi han diri-matupngan nga pagkabuotan han Dios. Ginpapamatud-an liwat ito han amon konsensya.
13 Diri kami nagsusurat ha iyo mahitungod han bisan ano nga butang labot han hinbabaroan na gud niyo ngan nasasabtan. Ngan naglalaom ako nga padayon nga masasabtan niyo ini nga mga butang tubtob ha kataposan,
14 sugad la nga nasasabtan liwat han iba ha iyo nga usa kami han iyo iginhahambog, sugad man ighahambog liwat namon kamo ha adlaw han aton Ginoo nga hi Jesus.
15 Salit tungod hini nga pagsarig, nagplano ako hadto pagkada ha iyo ha ikaduha nga higayon basi malipay na liwat kamo.
16 Mahapit ako dida basi makigkita ha iyo ngan katapos makadto ako ha Macedonia. Tikang ha Macedonia mabalik ako ha iyo ngan mapaupod ako ha iyo hin pipira ka distansya pagtikadto ko ha Judea.
17 Han ginplano ko ito, waray ko hunahunaa nga diri ito importante, diri ba? O ginpaplano ko ba an mga butang uyon ha panhunahuna han tawo, salit nasiring ako nga “Oo, syempre” ngan katapos nasiring nga “Diri, diri gud”?
18 Pero sugad la nga masasarigan an Dios, diri kami nasiring ha iyo hin Oo pero Diri ngay-an.
19 Kay an Anak han Dios nga hi Kristo Jesus nga iginsangyaw ha iyo pinaagi ha amon, karuyag sidngon, pinaagi ha akon ngan kanda Silvano ngan Timoteo, waray magin Oo pero nagin Diri, lugod an Oo pirme Oo ha iya kahimtang.
20 Kay mationan-o man kadamu an mga saad han Dios, nagin Oo ito pinaagi ha iya. Salit pinaagi liwat ha iya ginsisiring an “Amen” ha Dios basi makaghatag kita hin himaya ha iya.
21 Pero an Dios an naggagarantiya nga kamo ngan kami kan Kristo ngan hiya an nagpili* ha aton.
22 Hiya liwat an nagbutang han iya selyo ha aton ngan naghatag han baraan nga espiritu ha aton kasingkasing sugad nga garantiya hito nga maabot.
23 Yana nanunumpa ako ha Dios sugad nga testigo kontra ha akon* basi diri kamo dugang nga masubo nga diri pa ako napakada ha Corinto.
24 Diri ako nasiring nga kami an nagbubuot han iyo pagtoo, kondi mga igkasi-magburuhat kami para han iyo kalipay, kay natindog kamo nga marig-on tungod han iyo pagtoo.
Mga footnote
^ O “pag-uyon han Dios.”
^ Ha literal, “nawong.”
^ Ha literal, “nagdihog.” Kitaa an “Pagdihog” ha Glossary.
^ Ha literal, “akon kalag.”
