2 Corinto 5:1-21
5 Maaram kita nga an aton tunan-on nga balay,* ini nga tolda, mawawara ngan tatagan kita han Dios hin balay nga diri hinimo han mga kamot, nga magpapadayon ha waray kataposan ha langit.
2 Kay dinhi hini nga urukyan nga balay naghaharoy gud kita ngan sinsero nga naghihingyap ha pagsul-ot han aton urukyan nga igin-andam ha aton ha langit,
3 basi kon isul-ot na naton ito, diri kita hiagian nga hubo.
4 Naghaharoy gud kita dinhi hini nga tolda kay nabubug-atan kita; tungod kay diri naton karuyag nga bayaan ini, pero karuyag naton makarawat an langitnon nga urukyan, basi an mortal nga lawas saliwnan han kinabuhi nga waray kataposan.
5 Igin-andam kita han Dios para hini nga kinabuhi. Hiya an naghatag ha aton han espiritu sugad nga garantiya han tiarabot.
6 Salit pirme kita nasarig ngan maaram nga samtang aanhi kita hini nga lawas nga aton balay, waray pa kita didto ha Ginoo,
7 kay nagkikinabuhi kita uyon ha pagtoo, diri uyon ha aton nakikita.
8 Pero nasarig kita ngan mas karuyag gud naton nga mabuhi kaupod han Ginoo imbes nga dinhi hini nga lawas.
9 Salit umukoy man kita kaupod niya o diri, ginsisiguro naton nga pirme kita makapalipay ha iya.
10 Kay kita ngatanan kinahanglan tumindog ha atubangan han lingkoran ha paghukom han Kristo, basi an kada tagsa balosan uyon ha iya mga ginbuhat samtang aada pa ha iya tawhanon nga lawas, maopay man o maraot.
11 Salit tungod kay maaram kami nga kinahanglan kahadlokan an Ginoo, padayon nga ginkukombinse namon an mga tawo, ngan nakikita* gud kami han Dios. Naglalaom liwat ako nga ha bulig han iyo konsensya kilala na gud kami niyo.
12 Diri kami naghahambog ha iyo, lugod gin-aaghat namon kamo nga maghambog mahitungod ha amon, basi makabaton kamo ha mga tawo nga naghahambog han mga nakikita ha gawas kondi diri han aada ha kasingkasing.
13 Kon waray kami ha husto nga panhunahuna, tungod ito ha Dios; kon maopay an amon panhunahuna, tungod ito ha iyo.
14 Kay an gugma han Kristo nag-aaghat ha amon, tungod kay ini an amon konklusyon, nga an usa nga tawo namatay para ha ngatanan, kay an ngatanan nga tawo namatay.
15 Namatay hiya para ha ngatanan basi an mga buhi diri na mabuhi para ha ira kalugaringon, kondi para ha iya nga namatay para ha ira ngan ginbanhaw.
16 Salit tikang yana an pagkilala namon ha tawo diri na uyon ha opinyon han tawo. Bisan kon an pagkakilala namon hadto ha Kristo uyon ha opinyon han tawo, yana diri na sugad hito an amon pagkakilala ha iya.
17 Kon sugad, kon an bisan hin-o kahiusa han Kristo, bag-o hiya nga hinimo han Dios; an daan nga mga butang inagi na, ngan nagkakaada bag-o nga mga butang.
18 An ngatanan nga butang tikang ha Dios nga nagpahiuli ha amon ngadto ha iya pinaagi han Kristo, ngan hiya an naghatag ha amon han sagrado nga buruhaton han pagpahiuli,
19 karuyag sidngon, iginpapahiuli han Dios an kalibotan ngadto ha iya pinaagi han Kristo, nga diri gin-iihap an ira mga pagtalapas, ngan iya igintapod ha amon an mensahe han pagpahiuli.
20 Salit mga embahador kami nga kasaliwan han Kristo, nga sugad hin nakikimalooy an Dios pinaagi ha amon. Sugad nga mga kasaliwan han Kristo nakikimalooy kami: “Magpahiuli kamo ha Dios.”
21 An usa nga waray sala iya ginhimo nga magin makasasala tungod ha aton, basi pinaagi ha iya magin matadong kita ha pagkita han Dios.
Mga footnote
^ An “balay” o “urukyan” ginagamit ha simboliko nga paagi nga nangangahulogan hin pisikal o espirituwal nga lawas.
^ O “kilala gud.”
