2 Corinto 6:1-18
6 Ha pagbuhat kaupod han Dios, gin-aaghat liwat namon kamo nga karawaton an diri-matupngan nga pagkabuotan han Dios ngan diri igbalewaray an katuyoan hito.
2 Kay nasiring hiya: “Ha panahon han pagkarawat ginpamatian ko ikaw, ngan ha adlaw han katalwasan ginbuligan ko ikaw.” Kitaa, yana na gud an panahon han pagkarawat! Kitaa, yana na an adlaw han katalwasan!
3 Diri gud kami naghihimo hin hinungdan nga makapakdol, basi waray makita nga sayop ha amon sagrado nga buruhaton;
4 lugod, ha tagsa nga paagi iginrirekomendar namon an amon kalugaringon sugad nga mga ministro han Dios, pinaagi ha pag-ilob han damu nga pagsari, pinaagi ha kasakitan, mga panahon han panginahanglan, kakurian,
5 mga pagkastigo, mga kapriso, mga kasamok, mabug-at nga buruhaton, mga gab-i nga waray pagkaturog, mga panahon nga waray kinakaon,
6 pinaagi ha pagpakita hin kaputli, kahibaro, hilawig nga pagpailob, pagkabuotan, pinaagi ha pagpagiya ha baraan nga espiritu, pagpakita hin gugma nga diri-hipokrito,
7 pagyakan han kamatuoran, ngan pagsarig ha gahum han Dios. Ginbubuhat liwat namon ini pinaagi ha pagkapot han mga armas han katadongan ha too nga kamot* ngan ha wala,*
8 pinaagi liwat han kadungganan ngan kaarawdan, ngan kon ginpapakaraot ngan gindadayaw; bisan kon nagyayakan kami hin kamatuoran, gintatratar kami sugad nga paralimbong,
9 ginhuhunahuna kami nga diri kilala pero ginkikilala, gintatagad kami nga angay mamatay pero kitaa, buhi kami! Ginkakastigo* kami pero diri igintutubyan ha kamatayon,
10 sugad hin nasusubo pero malipayon pirme, sugad hin mga pobre kondi nagpapariko ha damu, sugad hin waray bisan ano pero nagtatag-iya han ngatanan nga butang.
11 Prangka nga nagyayakan kami ha iyo, mga taga-Corinto, ngan gin-aabrihan* namon an amon kasingkasing.
12 Diri namon ginpupugngan an amon pagpalangga ha iyo, pero ginpupugngan niyo an pagpakita han iyo pagpalangga.
13 Salit nagyayakan ako ha iyo nga sugad hin mga anak ko kamo. Sugad nga balos niyo ha amon, abrihi hin haluag an iyo kasingkasing.
14 Diri kamo magpas-an hin yugo* upod han mga diri-tumuroo. Kay paonan-o pagtatampuhon an katadongan ngan an pagtalapas? O paonan-o pagtatampuhon an kalamrag ngan an kasisidman?
15 Ngan paonan-o magkakauyon hi Kristo ngan hi Belial?* O ano an kaparihoan han tumuroo ngan han diri-tumuroo?
16 Ngan paonan-o magkakaangay an templo han Dios ngan an mga dios-dios? Kay kita an templo han buhi nga Dios, sugad la han ginsiring han Dios: “Maukoy ako kaupod nira ngan maglalakat upod nira, ngan ako an magigin Dios nira, ngan magigin katawohan ko hira.”
17 “ ‘Salit gawas kamo tikang ha ira, ngan bulag kamo,’ nasiring hi Jehova, ‘ngan ayaw na kamo kapot han mahugaw nga butang’ ”; “ ‘ngan pasusudlon ko kamo.’ ”
18 “ ‘Magigin amay ako niyo, ngan magigin mga anak* ko kamo,’ siring ni Jehova nga Makagarahum-ha-ngatanan.”
Mga footnote
^ Posible nga para ha pag-atake.
^ Posible nga para ha pagdepensa.
^ O “gindidisiplina.”
^ O “ginpapahaluag.”
^ An Griego nga pulong nangangahulogan nga magkaupod ha yugo an diri magkatupong.
^ Hebreo nga pulong nga nangangahulogan, “Waray Pulos.” Usa ini nga tawag kan Satanas.
^ Ha literal, “anak nga kalalakin-an ngan kababayin-an.”
