2 Corinto 12:1-21
12 Kinahanglan maghambog ako. Totoo, waray ini pulos, pero magpapadayon ako pagsaysay mahitungod han milagroso nga mga bisyon ngan mga mensahe nga iginpahayag ha akon han Ginoo.
2 May kilala ako nga disipulo han Kristo nga tigda la nga gindara ha ikatulo nga langit 14 ka tuig na an naglabay; han gindara hiya diri ako maaram kon pisikal an iya lawas o diri, pero maaram hito an Dios.
3 Oo, kilala ko ito nga disipulo—diri ako maaram kon pisikal ba an iya lawas o diri, pero maaram an Dios—
4 nga gindara ha paraiso ngan nakabati han mga pulong nga diri mahimo yaknon ngan diri uyon ha balaud nga yaknon han tawo.
5 Ighahambog ko ito nga tawo, pero diri ko ighahambog an akon kalugaringon labot la han akon kamaluya.
6 Kay bisan kon karuyag ko maghambog, magigin makatadunganon ako kay magsusumat ako han kamatuoran. Pero diri ko ito ginbubuhat, basi waray magdayaw ha akon hin labaw han iya nakikita o nababatian ha akon,
7 tungod la han urusahon nga mga mensahe nga iginpapahayag ha akon.
Salit basi diri ako magpahitaas, gintagan ako hin tunok ha unod, usa nga anghel ni Satanas nga nagpapasakit pirme ha akon, basi diri ako magpahitaas.
8 Salit tulo ka beses nga nakimalooy ako ha Ginoo mahitungod hini, nga kuhaon unta niya ha akon ini nga tunok.
9 Pero nagsiring hiya ha akon: “Igo na an akon diri-matupngan nga pagkabuotan ha imo; kay an akon gahum nagigin perpekto kon ikaw maluya.” Salit malipayon nga ighahambog ko an akon pagin maluya, basi an gahum han Kristo aadi pirme ha akon pariho hin tolda.
10 Tungod hito, nalilipay ako ha kamaluya, ha mga pag-insulto, ha mga panahon han panginahanglan, ha mga pagtimaraot ngan kakurian tungod han Kristo. Kay kon ako maluya, makusog lugod ako.
11 Nagin diri-makatadunganon ako. Ginpirit ako niyo nga magin sugad hito, kay waray ako niyo igrekomendar. Kay ha bisan usa nga butang waray ako magin ubos kay ha iyo sobra-kaopay nga mga apostol, bisan kon ha iyo pagkita waray ako pulos.
12 Ha pagkamatuod, iginpakita ko ha iyo nga may daku nga pagpailob an mga tigaman han akon pagin apostol, pinaagi han mga tigaman ngan urusahon nga mga butang ngan gamhanan nga mga buhat.*
13 Nagin gutiay ba an iyo pribilehiyo kay ha iba nga mga kongregasyon tungod kay waray ako magpabug-at ha iyo? Alayon pasayloa ako niyo hini nga sayop.
14 Kitaa! Ikatulo na ini nga higayon nga nangangandam ako pagkada ha iyo, ngan diri la gihapon ako magpapabug-at ha iyo. Kay kamo gud an akon ginhihingyap, diri an iyo mga gintatag-iya; kay an mga anak diri ginlalaoman nga magtitirok para ha ira mga kag-anak, kondi an mga kag-anak an magtitirok para ha ira mga anak.
15 Malilipay gud ako paghatag han ngatanan ngan pagsakripisyo han akon kalugaringon para ha iyo mga kalag. Kon hinigugma ko gud kamo, diri ba ako angay higugmaon pariho han akon paghigugma ha iyo?
16 Pero bisan pa, waray ako magpabug-at ha iyo. Pero nasiring kamo nga “tuso” ako ngan “ginlimbongan” ko kamo.
17 Waray ako magsalingabot basi makabentaha ha iyo pinaagi han bisan hin-o nga akon ginpakada ha iyo, diri ba?
18 Gin-aghat ko hi Tito nga kumada ha iyo ngan ginpaupdan ko hin bugto. Waray gud magsalingabot hi Tito basi makabentaha ha iyo, diri ba? Pariho an amon hunahuna, diri ba? Pariho an amon paggawi, diri ba?
19 Han ginbabasa niyo ini nga surat, naghunahuna ba kamo nga nagdidepensa kami ha amon kalugaringon? Maaram an Dios nga nagyayakan kami mahitungod han Kristo. Pero mga hinigugma, ginbubuhat namon ini ngatanan basi parig-unon kamo.
20 Kay nababaraka ako nga bangin pag-abot ko, diri na kamo sugad han akon ginhuhunahuna ngan ako liwat bangin diri na sugad han iyo ginhuhunahuna, pero lugod, bangin may araway, pangabugho, mga kasina, pagkasumpaki, pagpakaraot, paglibak, pagtsismis, pagpahitaas, ngan mga kasamok.
21 Bangin pag-abot ko dida ha iyo, pakaalohan ako han akon Dios ha iyo atubangan, ngan mabido ako tungod han damu nga nakasala hadto pero waray magbasol han ira mahugaw nga buhat, imoralidad,* ngan mangil-ad nga paggawi.*
Mga footnote
^ O “milagro.”
^ Kitaa an footnote ha Mat 5:32.
^ Kitaa an “Mangil-ad nga paggawi” ha Glossary.
