2 Corinto 13:1-14
13 Ikatulo na ini nga higayon nga nangangandam ako pagkada ha iyo. “An ngatanan nga ginsiring kinahanglan mapamatud-an han duha o tulo nga testigo.”
2 Bisan kon waray ako dida ha iyo yana, sugad hin ikaduha ko na ini nga pagkada ha iyo, ngan ginpapahamangnoan ko utro an mga nakasala hadto ngan an ngatanan, nga kon kumada utro ako diri hira makakalikay ha disiplina,
3 kay namimiling kamo hin ebidensya kon an Kristo gud an nagyayakan pinaagi ha akon. An iya pagtratar ha iyo diri maluya kondi makusog.
4 Oo, iginraysang hiya ha kahoy tungod han kamaluya, kondi buhi hiya tungod han gahum han Dios. Oo, maluya liwat kita kaupod niya, kondi mabubuhi kita kaupod niya pinaagi han gahum han Dios ha iyo.
5 Padayon nga usisaha niyo an iyo kalugaringon kon marig-on an iyo pagtoo, padayon nga pamatud-i niyo kon ano gud kamo. O diri ba kamo maaram nga kahiusa niyo hi Jesu-Kristo? Labot la kon iginsalikway kamo.
6 Naglalaom gud ako nga masasabtan niyo nga waray kami isalikway.
7 Yana nag-aampo kami ha Dios nga diri unta kamo magbuhat hin sayop, diri basi tagdon kami han iba sugad nga inuyonan, kondi basi magbuhat kamo han maopay, bisan kon an iba diri nakarawat ha amon.
8 Kay diri kami makakahimo hin bisan ano nga kontra han kamatuoran, kondi para la han kamatuoran.
9 Nalilipay gud kami kon maluya kami pero makusog kamo; ngan ini an amon igin-aampo, nga an iyo panhunahuna magin matadong utro.
10 Salit iginsusurat ko ini samtang waray ako dida ha iyo, basi kon aada na ako, diri ako magin istrikto ha paggamit han awtoridad nga iginhatag ha akon han Ginoo, para ha pagparig-on ngan diri ha pagbungkag.
11 Ha kataposan mga kabugtoan, padayon nga maglipay kamo, magpatadong utro han panhunahuna, magpaliaw, magkaurosa ha panhunahuna, magkinabuhi nga mamurayawon; ngan an Dios han gugma ngan kamurayawan maupod ha iyo.
12 Magkumustahay kamo pinaagi hin minagburugto nga harok.
13 Ginkukumusta kamo han ngatanan nga baraan.
14 Hinaot makarawat niyo ngatanan an diri-matupngan nga pagkabuotan han Ginoo nga hi Jesu-Kristo ngan an gugma han Dios ngan an baraan nga espiritu nga urosa nga ginpapahimulosan niyo.
