اگست اور ستمبر ۱۹۲۹ء میں بادشاہت کی گواہی دینے کی مہم چلائی گئی۔‏ نو دنوں کی اِس مہم کے دوران ۱۰ ہزار سے زیادہ مبشر بادشاہت کا پیغام لے کر طوفانی رفتار سے پورے امریکہ میں پھیل گئے۔‏ اُنہوں نے لوگوں میں ڈھائی لاکھ کتابیں تقسیم کیں۔‏ اِن مبشروں میں ایک ہزار پہل‌کار بھی شامل تھے۔‏ پچھلے کچھ عرصے کے دوران پہل‌کاروں کی تعداد میں بڑی تیزی سے اِضافہ ہوا تھا۔‏ اِس اِضافے کو بلیٹن *نے ”‏بہت ہی حیرت‌انگیز“‏ قرار دیا۔‏ سن ۱۹۲۷ء سے ۱۹۲۹ء تک پہل‌کاروں کی تعداد میں تین گُنا اِضافہ ہوا تھا۔‏

سن ۱۹۲۹ء میں ایک معاشی بحران نے امریکہ کو آ دبوچا۔‏ یہ ۲۹ اکتوبر کا دن تھا جب نیویارک اسٹاک مارکیٹ میں آنے والی مندی دُنیا کے معاشی نظام پر بجلی بن کر گِری۔‏ ہزاروں بینک دیوالیہ ہو گئے اور بہت سے زرعی فارم بند ہو گئے۔‏ بڑے بڑے کارخانے ٹھپ ہو گئے اور لاکھوں لوگوں کی نوکریاں چلی گئیں۔‏ بینک کے قرضوں کی قسطیں ادا نہ کرنے کی وجہ سے بہت سے لوگوں کے گھر ضبط کر لئے گئے۔‏ یہاں تک کہ ۱۹۳۳ء میں کچھ دنوں تک ہر روز ۱۰۰۰ گھر ضبط کئے گئے۔‏

ایسے سخت بحران میں پہل‌کاروں کا گزارہ کیسے ہو رہا تھا؟‏ ہمارے بہت سے پہل‌کاروں نے اپنی گاڑیوں کو ہی اپنا گھر بنا لیا۔‏ اِس طرح اُنہیں نہ تو کرایہ دینا پڑتا تھا اور نہ ہی ٹیکس۔‏ چونکہ اُن کے اخراجات کم ہوتے تھے اِس لئے وہ پہل‌کاروں کے طور پر اپنی خدمت جاری رکھ سکتے تھے۔‏ *بڑے اِجتماعوں کے موقعوں پر یہی گاڑیاں مُفت رہائش کا کام بھی دیتی تھیں۔‏ سن ۱۹۳۴ء میں بلیٹن میں کچھ نقشے دئے گئے کہ گاڑیوں کو سادہ سے گھر میں کیسے ڈھالا جا سکتا ہے۔‏ اِن نقشوں میں ایک ایسا بیڈ دِکھایا گیا جو فولڈ ہو جائے۔‏ اِس کے علاوہ یہ بھی دِکھایا گیا کہ گاڑی میں کھانا پکانے کے لئے چولہا کیسے لگایا جائے،‏ پانی کا اِنتظام کیسے کِیا جائے اور سردی کو کیسے روکا جائے۔‏

بہت سے مبشروں نے اپنی گاڑیوں کو گھروں کی صورت میں ڈھالنا شروع کر دیا۔‏ ایک بھائی جن کا نام وکٹر تھا،‏ اُنہوں نے بتایا:‏ ”‏جیسے نوح کو کشتی بنانے کا کوئی تجربہ نہیں تھا ویسے ہی مجھے یہ معلوم نہیں تھا کہ گاڑی کو گھر میں کیسے ڈھالا جاتا ہے۔‏“‏ اِس کے باوجود وہ ایسا کرنے میں کامیاب ہو گئے۔‏

بھائی ایوری اور اُن کی بیوی لوینیا کا گھر بھی اُن کی گاڑی ہی تھی۔‏ بھائی نے کہا:‏ ”‏جس طرح ایک کچھوا جہاں جہاں جاتا ہے،‏ اُس کا خول اُس کے ساتھ ہی رہتا ہے اُسی طرح مَیں جہاں بھی جاتا،‏ میرا گھر میرے ساتھ رہتا۔‏“‏ ایوری اور لوینیا دو اَور پہل‌کاروں کے ساتھ مل کر خدمت کر رہے تھے جن کے نام ہاروی اور عین تھے۔‏ اُنہوں نے بھی اپنی گاڑی کو گھر کی شکل میں ڈھالا ہوا تھا۔‏ اُنہوں نے اپنی گاڑی کے پیچھے جو گھر بنایا تھا،‏ اُس کی دیواریں تارکول کی پتلی شیٹ سے بنی ہوئی تھیں۔‏ جب بھی وہ ایک جگہ سے دوسری جگہ جاتے تو اِس شیٹ کے ٹکڑے نیچے گِرتے جاتے تھے۔‏ بھائی ایوری نے بتایا:‏ ”‏ایسی گاڑی نہ تو تب کسی اَور کے پاس دیکھی گئی اور نہ ہی آج تک کسی کے پاس دیکھنے میں آئی ہے۔‏“‏ لیکن ایوری نے بتایا کہ ہاروی اور عین اپنے دو بیٹوں کے ساتھ ”‏اِسی گاڑی میں ہنسی‌خوشی زندگی گزار رہے تھے۔‏“‏ بھائی ہاروی نے کہا:‏ ”‏ہمیں کسی چیز کی کمی نہیں تھی۔‏ ہم یہوواہ خدا کی خدمت سے خوش اور مطمئن تھے۔‏ ہمیں یقین تھا کہ وہ ہمیں سنبھالے گا۔‏“‏ بعد میں ہاروی،‏ عین اور اُن کے دونوں بیٹوں کو گلئیڈ سکول بلایا گیا اور پھر اُنہیں مشنری مقرر کرکے ملک پیرو میں خدمت کرنے کے لئے بھیج دیا گیا۔‏

گسٹو اور اُن کی بیوی وِن‌سنزا بھی پہل‌کار تھے۔‏ جب اُنہیں پتہ چلا کہ اُن کے ہاں بچہ ہونے والا ہے تو اُنہوں نے بھی اپنے ٹرک کو گھر میں ڈھال لیا۔‏ پہلے وہ ٹینٹ میں  رہتے تھے۔‏ اِس لئے اُن کی نظر میں اُن کا یہ نیا گھر کسی شان‌دار ہوٹل سے کم نہیں تھا۔‏ اُن کے ہاں ایک بیٹی پیدا ہوئی۔‏ اُس کی پیدائش کے بعد بھی اُنہوں نے اپنی خدمت جاری رکھی۔‏ وہ اِٹلی سے امریکہ منتقل ہونے والے لوگوں میں بادشاہت کی مُنادی کرتے رہے۔‏

اُس وقت خوش‌خبری کا پیغام بہت سے لوگوں تک پہنچا۔‏ مگر غریب اور بےروزگار لوگ کتابوں اور رسالوں کے بدلے اکثر عطیات نہیں دے پاتے تھے۔‏ اِس کی بجائے وہ پہل‌کاروں کو مختلف چیزیں دے دیتے تھے۔‏ دو پہل‌کاروں نے ۶۴ ایسی چیزوں کی فہرست بنائی جو اُنہیں لوگوں سے ملی تھیں۔‏ یہ فہرست ”‏کسی دُکان میں بکنے والے سودے کی فہرست جیسی تھی۔‏“‏

بھائی فریڈ ایک کسان سے ملے جو ہماری کتابیں لینا چاہتا تھا۔‏ اُس نے کتابوں کے بدلے اُنہیں نظر کا چشمہ دیا جو اُس کی ماں کا تھا۔‏ اگلے گھر میں وہ ایک اَور کسان سے ملے جو ہماری کتابیں پڑھنا تو چاہتا تھا مگر اُس نے کہا کہ ”‏میرے پاس پڑھنے کے لئے چشمہ نہیں ہے۔‏“‏ بھائی فریڈ نے نظر کا چشمہ اُسے دے دیا۔‏ اِس چشمے کی مدد سے وہ آسانی سے کتابیں پڑھ سکتا تھا۔‏ اُس کسان نے چشمے اور کتابوں کے لئے بھائی فریڈ کو خوشی سے عطیہ دیا۔‏

بھائی ہربٹ نے اپنی گاڑی کے پیچھے مرغیوں کا خالی پنجرہ رکھا ہوا تھا۔‏ جب وہ لوگوں کو کتابیں دیتے تھے تو بعض لوگ بدلے میں اُن کو مُرغی دیتے تھے۔‏ اور جب اُن کے پاس تین یا چار مُرغیاں اِکٹھی ہو جاتی تھیں تو وہ اِنہیں بازار میں بیچ کر اپنی گاڑی میں پٹرول ڈلوا لیتے تھے۔‏ بھائی ہربٹ نے بتایا:‏ ”‏بعض اوقات ہماری جیب میں چند سکوں کے سوا کچھ بھی نہیں ہوتا تھا۔‏ لیکن جب تک ہماری گاڑی میں پٹرول رہتا،‏ ہم یہوواہ خدا پر بھروسا کرتے ہوئے آگے بڑھتے رہتے۔‏“‏

یہوواہ خدا پر بھروسے اور پُختہ عزم کی بدولت ہمارے بہت سے بہن‌بھائی اُن کٹھن سالوں کے دوران اپنی خدمت جاری رکھ پائے۔‏ اِس سلسلے میں بھائی میکس‌ویل اور اُن کی بیوی ایمی کی مثال پر غور کریں۔‏ اُنہوں نے بھی اپنی گاڑی کو اپنا گھر بنایا ہوا تھا۔‏ ایک مرتبہ وہ طوفان کے دوران اپنے گھر سے نکل کر بھاگے ہی تھے کہ ایک درخت اُن کے گھر پر گِرا اور اُسے تباہ کر دیا۔‏ بھائی میکس‌ویل نے لکھا:‏ ”‏ہم نے ایسے واقعات کی وجہ سے اپنا عزم کمزور نہیں پڑنے دیا۔‏ اپنی خدمت کو چھوڑنے کا خیال بھی کبھی ہمارے ذہن میں نہیں آیا۔‏ ہم جانتے تھے کہ ابھی بہت سا کام باقی ہے اور ہم نے اُسے پورا کرنے کی ٹھان رکھی تھی۔‏“‏ بھائی میکس‌ویل اور ایمی نے اپنے کچھ دوستوں کی مدد سے اپنی گاڑی کو پھر سے ایک گھر کی صورت میں ڈھال لیا۔‏

آج بھی اِس مشکل دَور میں ہمارے لاکھوں بہن‌بھائی خدا کی خدمت کے لئے بہت سی قربانیاں دے رہے ہیں۔‏ ماضی کے پہل‌کاروں کی طرح ہمارا بھی یہ پُختہ عزم ہے کہ ہم مُنادی کا کام تب تک جاری رکھیں گے جب تک یہوواہ خدا یہ نہیں کہتا:‏ ”‏بس!‏ کام مکمل ہو گیا۔‏“‏