1, 2. E taime oaoa no vai te mau bapetizoraa?

 MAI te peu e e rave rahi matahiti to oe taviniraa ia Iehova, e rave rahi paha ïa taime to oe faarooraa i te mau oreroraa parau bapetizoraa i ta tatou mau tairururaa. Teie râ, noa ˈtu ehia taime to oe na reiraraa, mea papu e e putapû noa oe i te mau taime atoa e ite ai oe i te feia e bapetizohia ia tia mai i nia i mua roa. I taua taime ra, e oaoa roa te feia i putuputu mai e e popou ratou ma te aau tae. E tahe atoa paha to oe roimata ia ite oe i te tahi atu â pǔpǔ taata poiherehia ia tia i te pae o Iehova. Auê tatou i te oaoa i taua mau taime ra!

² E ite paha tatou i te mau bapetizoraa tau taime i te matahiti i to tatou fenua, area te mau melahi ra, e fanaˈoraa taa ê ta ratou e mataitai pinepine atu â i te reira. E nehenehe anei oe e feruri i te “oaoa rahi” i “te raˈi” ia ite ratou i te mau tausani taata i te ao nei ia faaô i roto i te tuhaa ite-mata-hia o te faanahonahoraa a Iehova i te mau hebedoma atoa? (Luka 15:7, 10) Aita e feaaraa, te oaoa roa ra te mau melahi i te ite i teie maraaraa!—Hagai 2:7.

3. No te aha Satani e hahaere ai “mai te liona uuru,” e eaha ta ˈna e hinaaro ra e rave?

³ Mea taa ê roa râ no te tahi atu mau varua, te mataitai ra hoi ratou i tera mau bapetizoraa ma te riri rahi. Mea hae na Satani e te mau demoni ia ite i te mau tausani taata ia faarue  i teie nei ao piˈo. Inaha, ua parau hoi Satani e aita e taata e tavini ia Iehova ma te here e aita hoê aˈe e tapea i to ˈna haapao maitai i roto i te tamataraa uˈana. (A taio i te Ioba 2:4, 5.) I te taime atoa e faaoti ai te hoê taata e pûpû ia ˈna ia Iehova, e haapapuraa ïa e ua haavare Satani. Mai te huru ra e e tanohia Satani i te poara tausani taime i te mau hebedoma atoa o te matahiti. No reira oia e “hahaere” ai “mai te liona uuru e imi nei i te amu i te hoê taata”! (Petero 1, 5:8) E hinaaro iti rahi to teie “liona” ia pau tatou ia ˈna i te pae varua, a fifi ai aore ra a mutu atoa ˈi to tatou taairaa e te Atua.—Salamo 7:1, 2; Timoteo 2, 3:12.

4, 5. (a) Ua taotia Iehova i te mana o Satani na roto i teihea na ravea faufaa e piti? (b) E nehenehe te hoê Kerisetiano mau e tiaturi i te aha?

⁴ Noa ˈtu e e faaû tatou i te hoê enemi taehae, aita e tumu  e riaria ˈi tatou. No te aha hoi? No te mea ua taotia Iehova i te mana o taua “liona uuru” ra na roto e piti ravea faufaa. Eaha ïa na ravea? Na mua roa, ua tohu Iehova e e ora ˈtu “te hoê nahoa rahi” o te mau Kerisetiano mau i “te ati rahi” i mua nei. (Apokalupo 7:9, 14) E tupu noa iho â te mau parau tohu a te Atua. No reira, ua ite iho â Satani e eita e noaa ia ˈna te nunaa taatoa o te Atua.

⁵ Te ite-maitai-hia ra te piti o te taotiaraa i roto i te hoê parau mau tumu faahitihia e te hoê taata haapao maitai o te Atua no tahito ra. Ua parau te peropheta Azaria i te arii Asa: “Tei pihai iho Iehova ia outou, outou i ati mai ia ˈna.” (Paraleipomeno 2, 15:2; a taio i te Korinetia 1, 10:13.) Mea rahi te hiˈoraa papaihia e haapapu ra e i tahito ra, aita roa ˈtu Satani i manuïa i te haapau i te mau tavini atoa o tei haafatata noa ˈtu i te Atua. (Hebera 11:4-40) I teie mahana, e nehenehe te hoê Kerisetiano o te haafatata noa ˈtu i te Atua e patoi e e upootia atoa i nia i te Diabolo. Inaha, te haapapu mai ra te Parau a te Atua: “A patoi . . . i te Diabolo, e e horo ê oia ia outou.”—Iakobo 4:7.

6. E nafea Satani e aro ai i te Kerisetiano tataitahi?

⁶ Eita e tia ia Satani ia upootia i roto i te tamaˈi pae varua, e nehenehe râ oia e tairi ia tatou tataitahi ia faaea tatou i te vai ara. Ua ite Satani e e nehenehe oia e haapau ia tatou mai te peu e e haaparuparu oia i to tatou taairaa e o Iehova. E nafea ïa o ˈna? E aro o ˈna ma te uˈana, ta tatou iho aroraa, e te ravea paari. E hiˈopoa mai tatou i teie mau ravea rahi a Satani.

7. No te aha Satani e aro ai i te nunaa o Iehova ma te uˈana?

⁷ Aroraa uˈana. Ua parau te aposetolo Ioane: “Te vai nei . . . to te ao atoa i raro aˈe i te mana o te varua ino.” (Ioane 1, 5:19) E faaararaa to roto i tera mau parau no te mau Kerisetiano mau atoa. I te mea e ua pau ê na te ao ino taatoa o te  huitaata nei ia Satani, e nehenehe oia i teie nei e faatano e e faauˈana i ta ˈna mau aroraa i nia i te feia aita â i noaa ˈtura ia ˈna, te nunaa ïa o Iehova. (Mika 4:1; Ioane 15:19; Apokalupo 12:12, 17) E riri rahi to ˈna no te mea ua ite o ˈna e taime poto to ˈna e toe nei. No reira oia i faarahi atu â ˈi i te faaheporaa. I teie mahana, te faaruru nei tatou i to ˈna hae rahi, a tautoo ai oia i te tairi ia tatou ma te aroha ore.

8. Eaha te auraa o te parau a te aposetolo Paulo e te “aro” nei tatou i te mau varua ino?

⁸ Ta tatou iho aroraa. Ua faaara te aposetolo Paulo i to ˈna mau hoa Kerisetiano: “Ta tatou e aro [“taputô,” nota i raro i te api] nei . . . , [o] te mau varua ino i te raˈi.” (Ephesia 6:12) No te aha Paulo i faaohipa ˈi i te taˈo “aro”? No te mea te horoa ra te reira i te manaˈo o te hoê taputôraa piri roa. No reira, ma te faaohipa i taua taˈo ra, ua haapapu Paulo e e aroraa ta tatou iho tataitahi i te mau varua ino. Noa ˈtu e te faaea ra tatou i te hoê fenua mea puai te tiaturiraa i te mau varua ino aore ra eita, eiaha roa ˈtu tatou e haamoˈe e i to tatou pûpûraa ia tatou ia Iehova, ua haamata tatou i te hoê taputôraa ei auraa parau. Mai to ˈna pûpûraa ia ˈna mai â, to roto te Kerisetiano tataitahi i taua aroraa ra. No reira Paulo i aˈo ai i te mau Kerisetiano i Ephesia e toru taime ia “mau papu.”—Ephesia 6:11, 13, 14.

9. (a) No te aha Satani e te mau demoni e faaohipa ˈi i “te mau ravea paari” rau? (b) No te aha Satani e tamata ˈi i te haaviivii i to tatou feruriraa, e e nafea ia patoi i ta ˈna mau tutavaraa? (A hiˈo i te tumu parau “ A ara i te ravea paari a Satani!”) (c) Teihea ravea paari ta tatou e hiˈopoa i teie nei?

⁹ Ravea paari. Te aˈo ra Paulo i te mau Kerisetiano ia patoi i “te mau ravea paari” a Satani. (Ephesia 6:11) A tapao e te parau ra Paulo “te mau.” E faaohipa ïa te mau varua ino eiaha hoê noa, e rave rau râ ravea paari e ua ite ratou no te aha. Ua hema te tahi mau Kerisetiano o tei patoi na i te hoê huru tamataraa i te tahi atu tamataraa. No reira te Diabolo e te mau demoni e hiˈopoa maitai ai i to tatou tataitahi haerea  no te tapaopao i to tatou mau vahi paruparu. Ia oti, e hauti ratou i nia i to tatou mau paruparu atoa i te pae varua. Auaˈe râ e e nehenehe tatou e ite e rave rahi raveraa a te Diabolo, no te mea te faaite ra te Bibilia i te reira. (Korinetia 2, 2:11) I roto i teie buka, ua hiˈopoa aˈena tatou i te mau raveraa mai te ainu o te nounou taoˈa, te mau amuimuiraa ino e te mau peu taotoraa tia ore. E hiˈopoa tatou i teie nei i te tahi atu ravea paari a Satani, te peu tahutahu.

10. (a) Eaha te peu tahutahu? (b) Eaha to Iehova manaˈo i te peu tahutahu, e to oe ïa?

¹⁰ Ia rave te hoê taata i te peu tahutahu, aore ra peu demoni, e amui roa ˈtu ïa oia i te mau varua iino. Te tahi mau huru peu tahutahu, o te peu hiˈohiˈo ïa, te ohipa tahuˈa, te pifao e te uiuiraa i te feia pohe. Ua ite maitai tatou e mea “faufau” na Iehova te peu tahutahu. (Deuteronomi 18:10-12; Apokalupo 21:8) I te mea e e titauhia ia “faufau” tatou atoa “i te mea ino,” eita roa ˈtu ïa tatou e manaˈo e imi i te faahoa i te mau varua iino. (Roma 12:9) E taivaraa hairiiri mau â ïa te reira i to tatou Metua i te raˈi, o Iehova!

11. No te aha Satani e upootia rahi ai ia noaa ia ˈna i te turai ia tatou i roto i te peu tahutahu? A horoa i te hoê faaauraa.

¹¹ E no te mea e taivaraa hairiiri ia Iehova ia rave i te peu tahutahu, ua faaoti papu Satani e turai vetahi o tatou i roto i taua peu ra. I te mau taime atoa e noaa ˈi ia ˈna i te turai i te hoê Kerisetiano i roto i te peu demoni, e upootia rahi ïa Satani. No te aha? A feruri na i teie faaauraa: Mai te peu e e taparuparuhia te hoê faehau ia faarue e ia taiva i to ˈna nuu no te apiti i te nuu enemi, e oaoa ïa te tomana enemi. E faateniteni atoa paha oia i taua faehau ra i mua i te taata no te faaino i te tomana ta taua faehau ra i taiva. Oia atoa, ia rave te hoê Kerisetiano i te peu tahutahu, ua faarue ïa o ˈna ma te opua ia Iehova e ua tuu roa ˈtu ia ˈna iho i raro aˈe i te faatereraa a Satani. A feruri na ïa i te oaoa o Satani ia faateniteni  i taua taata taiva ra tei noaa ia ˈna! E hinaaro anei te hoê o tatou ia upootia te Diabolo? Eita roa ïa! E ere tatou i te feia taiva.

12. Eaha te ravea ta Satani e faaohipa ra no te faahape i to tatou manaˈo i te peu tahutahu?

¹² A faufau maoro noa ˈi tatou i te peu tahutahu, eita Satani e manuïa i te faaohipa i te reira no te faahema ia tatou. Te taa ra ïa ia ˈna e e mea tia ia taui o ˈna i to tatou huru feruriraa. E nafea? E imi oia i te mau ravea no te haapeapea i te feruriraa o te mau Kerisetiano a manaˈo atu ai vetahi e e maitai te ino e e ino te maitai. (Isaia 5:20) No te reira, e faaohipa pinepine Satani i te hoê ravea ta ˈna i tamata maoro, e tuu oia i te mau uiraa no te haafeaa.

13. Mea nafea to Satani faaohiparaa i ta ˈna ravea e tuu i te uiraa no te haafeaa?

¹³ A tapao na mea nafea to Satani faaohiparaa i taua ravea ra i tahito ra. I Edene, ua ui oia ia Eva: “Oia ïa, ua parau mai te Atua e, Eiaha orua e amu i to te mau raau atoa o te ô nei?” I te tau o Ioba, i mua i te mau melahi tei putuputu i nia i te raˈi, ua tuu Satani i teie uiraa: “E mǎtaˈu noa anei Ioba i te Atua?” E i te omuaraa o te taviniraa a Iesu i te fenua nei, ua aa Satani i te Mesia: “E tamaiti oe na te Atua, a parau i teie mau ofai ia riro ei faraoa.” A hiˈo na, i roto i te tupuraa o Iesu, ua tae roa Satani i te faaooo i te mau parau ta Iehova iho i faahiti fatata e ono hebedoma na mua ˈtu: “O ta ˈu Tamaiti teie, tei herehia, ta ˈu i mauruuru roa”!—Genese 3:1; Ioba 1:9; Mataio 3:17; 4:3.

14. (a) E nafea Satani e faaohipa ˈi i ta ˈna raveraa e haafeaa i te manaˈo no nia i te peu tahutahu? (b) Eaha ta tatou e hiˈopoa i teie nei?

¹⁴ I teie mahana, te faaohipa ra te Diabolo i te hoê â raveraa e haafeaa i te manaˈo o te taata no nia i te peu tahutahu. Tera noa râ, ua manuïa oia i nia i te tahi mau Kerisetiano. Ua haamata ratou i te parau e e ere mau â te tahi mau huru  peu tahutahu i te mea ino. (Korinetia 2, 11:3) E nafea ia tauturu ia ratou ia faaafaro i to ratou manaˈo? E nafea ïa tatou ia ore te ravea paari a Satani ia manuïa i nia ia tatou? No te pahono atu, e hiˈopoa mai tatou e piti tuhaa o te oraraa ta Satani i haaviivii omoˈe i te mau ohipa tahutahu. O te faaanaanataeraa ïa e te rapaauraa.

15. (a) Eaha te manaˈo o te taata e rave rahi i te peu tahutahu i te mau fenua i te pae tooa o te râ? (b) Mea nafea to te tahi mau Kerisetiano peeraahia i to teie nei ao manaˈo i te peu tahutahu?

¹⁵ Mea rahi o te hiˈo ra i te ohipa manamana e te tahi atu mau peu tahutahu ei ohipa hauti i te mau fenua iho â râ i te pae tooa o te râ. Te rahi noa ˈtu ra te mau hohoˈa teata, te mau buka, te mau mea e patahia i roto i te afata teata e te mau hauti roro uira i te faaite mai i te mau peu demoni ei ohipa arearea, maramarama e te ino ore. No te mea e mea au-roa-hia te tahi mau hohoˈa teata e buka ua niuhia te mau aamu i nia i te ohipa manamana, ua haamau vetahi tei maamaa i te reira i te mau taatiraa na ratou. Mea papu e ua manuïa te mau demoni i te turai i te taata ia manaˈo e e ere te ohipa manamana i te mea atâta. Ua pee-rii-hia anei te mau Kerisetiano i teie huru hiˈoraa i te peu tahutahu? Ua hauti te reira i nia i te manaˈo o vetahi. E nafea? Ei hiˈoraa taa maitai, teie ta te hoê Kerisetiano i parau i muri aˈe i te mataitairaa i te hoê hohoˈa teata no nia i te ohipa manamana: “Ua mataitai au i te hohoˈa, aita râ vau i rave i te peu tahutahu.” No te aha e manaˈo atâta ˈi teie?

16. No te aha e mea atâta ˈi ia maiti i te faaanaanataeraa tei niuhia i nia i te mau peu manamana?

¹⁶ Noa ˈtu e te vai ra te taa-ê-raa i rotopu i te raveraa i te peu tahutahu e te mataitairaa i te reira, e ere ïa te auraa e aita e fifi atâta ia mataitai i te mau peu manamana. No te aha hoi? A feruri na: Te faaite ra te Parau a te Atua e eita ta  Satani e ta ˈna mau demoni e nehenehe e ite eaha to tatou mau manaˈo. a No reira, mai tei faahitihia na mua ˈtu, no te ite eaha to tatou mau manaˈo e to tatou mau paruparu i te pae varua, e hiˈopoa maite ïa te mau varua ino i ta tatou mau ohipa, tae noa ˈtu te mau faaanaanataeraa ta tatou e maiti. Ia faaite te haerea o te hoê Kerisetiano e mea au na ˈna te mau hohoˈa teata aore ra buka no nia i te mau taura, te pifao, te ururaa i te demoni, aore ra te tahi atu mau mea demoni mai te reira te huru, te faatae ra ïa oia i te hoê poroi i te mau demoni ra. Oia mau, te faaara ra ïa o ˈna ia ratou eaha to ˈna paruparu! I reira ïa te mau demoni e faauˈana ˈi i ta ratou aroraa i nia i taua Kerisetiano ra no te hauti i nia i te paruparu ta ˈna i faaite atu, ia tahua roa oia ei auraa parau. Inaha, ua rave roa ˈtu vetahi o tei au i te peu tahutahu na roto i te faaanaanataeraa tei taaihia i te ohipa manamana, i taua peu ra.—A taio i te Galatia 6:7.

17. Maoti teihea ravea paari e totoa ˈi Satani i te feia maˈi?

¹⁷ Te imi ra Satani i te hauti eiaha noa i nia i to tatou hiaai i te faaanaanataeraa, i nia atoa râ i to tatou hinaaro mau i te rapaauraa. E nafea? E nehenehe te hoê Kerisetiano te rahi noa ˈtu ra to ˈna maˈi noa ˈtu te mau tutavaraa rahi i te imi i te rapaauraa, e toaruaru roa. (Mareko 5:25, 26) E nehenehe te reira e riro ei taime tano maitai no Satani e te mau demoni ia totoa ia ˈna. E faahema paha te mau demoni ia ˈna ia fariu, no te hepohepo hoi, i nia i te mau ravea rapaauraa o te faaohipa i “te puai manamana,” oia ïa te peu tahutahu. (Isaia 1:13, New World Translation) Ia manuïa taua ravea paari ra a te mau demoni, e nehenehe te reira e tuino i te taairaa o te Kerisetiano maˈi e te Atua. E nafea?

18. Teihea huru ravea rapaauraa ta te hoê Kerisetiano e patoi, e no te aha?

 ¹⁸ Ua faaara Iehova i te nunaa Iseraela o tei faaohipa na i “te puai manamana”: “Ia hohora mai i to outou rima, e purou vau i tau mata ia outou; e ia pinepine noa ta outou pure, e ore au e faaroo atu.” (Isaia 1:15) E hinaaro iho â tatou e haapae i te mau mea atoa o te haafifi i ta tatou mau pure e o te faaere rii ia tatou i te turu no ǒ mai ia Iehova ra, e hau roa ˈtu â ia maˈihia tatou. (Salamo 41:3) No reira, mai te peu e te vai ra te tahi mau mea o te faaite mai e e ohipa tahutahu to roto i te tahi ravea e itehia ˈi eaha te maˈi aore ra no te rapaau i te reira, e mea tia ia patoi atu te hoê Kerisetiano mau. b (Mataio 6:13) Mea na reira e papu ai ia ˈna i te fanaˈo noa i te turu a Iehova.—A hiˈo i te tumu parau “ E peu tahutahu iho â anei?”

19. (a) Ua râmâ te Diabolo e rave rahi taata ia tiaturi i te aha no nia i to ˈna mana? (b) Teihea mau aamu eiaha te mau Kerisetiano mau e faaatutu?

¹⁹ Aita e rave rahi taata i te mau fenua i te pae tooa o te râ e manaˈo ra e mea atâta te mana o Satani. Area i te tahi atu mau fenua ra, oia ïa. I reira, ua râmâ te Diabolo e rave rahi  ia tiaturi e ua rahi aˈe to ˈna mana i ta ˈna e fanaˈo mau ra. Te ora ra, te tamaa ra, te ohipa ra e te taoto ra te tahi mau taata i roto i te riaria i te mau varua iino. Mea rahi te aamu no nia i te mau ohipa puai a te mau demoni. E pinepine te reira i te faatiahia ma te faahiahia e mea au hoi na te taata. E mea maitai anei ia faaatutu tatou i te reira? Eita. Eita te mau tavini a te Atua mau e na reira no e piti tumu rahi.

20. E nafea tatou, ma te opua ore paha, e nehenehe ai e haaparare i te mau manaˈo haavarevare o Satani?

²⁰ A tahi, ma te faaatutu i te mau aamu o te mau ohipa a te mau demoni, te turu ra ïa tatou i te mau ohipa a Satani. Te haapapu ra te Parau a te Atua e e tia ia Satani ia rave i te mau ohipa puai, te faaara atoa ra râ e te faaohipa ra oia i “te tapao . . . haavare” e te “haavare.” (Tesalonia 2, 2:9, 10) I  te mea o Satani te râmâ rahi, ua ite o ˈna e nafea ia haapiˈo i te feruriraa o te feia mea au na ratou te peu tahutahu e e nafea ia faatiaturi ia ratou i te mau mea e ere i te mea mau. E parau iho â paha ratou e ua ite e ua faaroo ratou i te tahi mau mea, a faatia haere atu ai e mea mau te reira. I muri aˈe, e rahi roa ta ratou mau aamu no te faatia-noa-raahia te reira. Ia faaatutu te hoê Kerisetiano i tera mau huru aamu, te rave ra ïa o ˈna i te hinaaro o te Diabolo, “te metua no te haavare.” Te haaparare ra ïa oia i te mau manaˈo haavarevare o Satani.—Ioane 8:44; Timoteo 2, 2:16.

21. E hinaaro tatou e niu i ta tatou mau aparauraa i nia i te aha?

²¹ A piti, noa ˈtu e ua faaû iho â te hoê Kerisetiano i te mau varua iino na mua ˈˈe, eita o ˈna e faatia noa i te reira i to ˈna mau hoa Kerisetiano no te faaanaanatae ia ratou. No te aha? Te aˈohia mai ra: “A tiatonu . . . ia Iesu te Aratai rahi e te Faatia roa o to tatou faaroo.” (Hebera 12:2) Oia, e titauhia ia tiatonu tatou i te Mesia, eiaha ia Satani. A tapao na e i te fenua nei, aita Iesu i faaanaanatae i ta ˈna mau pǐpǐ i te mau aamu o te mau varua iino, noa ˈtu e mea rahi ta ˈna e nehenehe e faatia no nia i te mau ravea a Satani. Ua niu râ Iesu i to ˈna ara-maite-raa i nia i te poroi o te Faatereraa arii. No reira, mai ia Iesu e te mau aposetolo, e hinaaro tatou e niu i ta tatou mau aparauraa i nia i “te mau mea faahiahia a te Atua.”—Ohipa 2:11; Luka 8:1; Roma 1:11, 12.

22. Eaha ta tatou e rave e tupu ai te “oaoa rahi” i “te raˈi”?

²² E parau mau e te faaohipa ra Satani e rave rau ravea paari, te peu tahutahu atoa, no te tamata i te tâpû i to tatou taairaa e o Iehova. Ma te faufau râ i te mea ino e ma te mau papu i te mea maitai, eita e noaa i te Diabolo i te faaaueue i ta tatou faaotiraa papu e patoi i te mau huru peu tahutahu atoa. (A taio i te Ephesia 4:27.) A feruri na ïa i te “oaoa rahi” i “te raˈi” ia tamau tatou i te “mau papu i mua i te mau ravea paari a te Diabolo” e tae noa ˈtu i to ˈna haamouraa!—Luka 15:7; Ephesia 6:11.