Eaha to roto?

Mau faaho'iraa ê

Tapura tumu parau

Ite no Iehova

Tahiti

Rave noa i te mau mea e here mai ai te Atua

 TUHAA HAU

E nafea ia upootia i nia i te mirimiriraa i te mero atiraa?

E nafea ia upootia i nia i te mirimiriraa i te mero atiraa?

Te mirimiriraa i te mero atiraa, e peu ïa ta te Atua e ore e au. E faatupu riirii hoi te reira i te mau peu o te turai i te taata ia haapao noa ia ratou iho e o te haaviivii i te feruriraa. E tae roa atoa te hoê taata mirimiri i te mero atiraa i te hi‘o ia vetahi ê ei tao‘a noa no te haamâha i to ’na mau hinaaro e taoto i te hoê apiti. E ere atura ïa te taotoraa i te hoê apiti i te faaiteraa i te here, e peu noa râ o te faanavenave maa taime e o te haamâha i te hiaai puai e taoto i te hoê apiti. E taime poto noa râ ia mâha te reira. Inaha, eita te mirimiriraa i te mero atiraa e haapohe i te mau mero o te tino, “to roto hoi te mau peu taotoraa tia ore, te peu viivii, te hinaaro faufau vî ore,” e faaaraara râ i te reira.—Kolosa 3:5.

Ua papai te aposetolo Paulo: “Taeae here ma, . . . e tamâ ana‘e ïa ia tatou iho i te mau viivii atoa o te tino e o te feruriraa, e ia mo‘a roa ’tu â tatou a mǎta‘u ai i te Atua.” (Korinetia 2, 7:1) Mai te peu e te aro nei oe no te pee i teie mau parau, eiaha e taora i te tauera. “Ua tia” noa ia Iehova ia “faaore mai i te hara” e ia tauturu. (Salamo 86:5; Luka 11:9-13) Inaha, te faahaparaa to oe iho aau ia oe e ta oe mau tutavaraa i te faaea i te rave i taua peu ra, noa ’tu e e topa faahou oe i te tahi mau taime,  e tapao faaite ïa o te hoê huru feruriraa maitai. A haamana‘o atoa e “mea rahi a‘e te Atua i to tatou aau e ua ite o ’na i te mau mea atoa.” (Ioane 1, 3:20) Aita noa te Atua e ite ra i ta tatou mau hara, te ite atoa ra râ o ’na i te taata taatoa. Maoti taua ite i te mau mea atoa ra, e nehenehe ta ’na e faaroo ma te aumauiui i ta tatou mau taparuparuraa haavare ore i to ’na aroha hamani maitai. No reira, eiaha roa ’tu e fiu i te fariu i te Atua na roto i te pure haavare ore e te haehaa, mai te hoê tamarii o te fariu i to ’na papa ia fifi oia. E horoa ’tu Iehova i te hoê mana‘o haava tamâhia. (Salamo 51:1-12, 17; Isaia 1:18) Parau mau, e titauhia ia rave oe i te mau taahiraa avae maitatai ia au i ta oe mau pure. Ei hi‘oraa, e tutava oe i te ape i te mau huru peu faufau atoa e te mau amuimuiraa iino atoa. *

Ia tamau noa to oe fifi, a aparau na ïa i te reira e te hoê o to oe na metua Kerisetiano aore ra i te hoê hoa feruriraa paari i te pae varua e te hamani maitai. *Maseli 1:8, 9; Tesalonia 1, 5:14; Tito 2:3-5.

^ par. 2 Ei taahiraa avae tano no te hi‘opoa i te faaohiparaa o te matini roro uira i te fare, mea rahi te utuafare tei tuu i te reira i te hoê vahi e ite atu te taata atoa. Hau atu â, e hoo mai te tahi mau utuafare i te hoê porotarama roro uira o te titia i te mau mea haapaoraa ore. Tera râ, aita e porotarama papu maitai.

^ par. 2 Ei mana‘o tauturu e au ia faaohipa e nafea ia upootia i nia i te mirimiriraa i te mero atiraa, a hi‘o i te tumu parau “Te uiui nei te mau taurearea . . . E nafea ia upootia i nia i tera peu?” i roto i te Réveillez-vous! no Novema 2006, e i na api 178-182 o te buka Les jeunes s’interrogent. Réponses pratiques, buka 1.