Eaha to roto?

Mau faaho'iraa ê

Tapura tumu parau

Ite no Iehova

Tahiti

Rave noa i te mau mea e here mai ai te Atua

 PENE 13

Te mau oroa ta te Atua e ore roa e au

Te mau oroa ta te Atua e ore roa e au

“A tamau i te imi i ta te Fatu e farii.”—EPHESIA 5:10.

1. Teihea huru taata ta Iehova e faafatata mai ia ’na, e no te aha e titauhia ’i ia vai ara noa ratou i te pae varua?

“E HAAMORI . . . te feia haamori mau i te Metua ma te varua mo‘a e te parau mau, inaha te imi nei te Metua i te taata mai te reira no te haamori ia ’na,” ta Iesu ïa i parau. (Ioane 4:23) Ia itea ia Iehova tera mau huru taata, mai ia oe, e faafatata mai o ’na ia ratou ia ’na ra e i ta ’na Tamaiti. (Ioane 6:44) Auê te fana‘o e! E mea tia râ ia “tamau” te feia mea au na ratou te parau mau Bibilia “i te imi i ta te Fatu e farii,” mea ite roa hoi Satani i te haavare.—Ephesia 5:10; Apokalupo 12:9.

2. A faataa eaha te mana‘o o Iehova i te feia o te tamata i te anoi i te haapaoraa mau e te haapaoraa hape.

2 A hi‘o i te ohipa i tupu i pihai iho i te mou‘a Sinai i to te nunaa Iseraela aniraa ia Aarona e hamani i te tahi atua no ratou. Ua farii Aarona e ua hamani i te hoê kafa auro, ma te horoa i te mana‘o e te faahoho‘a ra te reira ia Iehova. “E mahana oroa ananahi no Iehova,” ta ’na ïa i parau. Ua tâu‘a ore anei Iehova i teie anoiraa i te haapaoraa mau e te haapaoraa hape? Aita. Ua haapohe oia e 3 000 taata haamori idolo. (Exodo 32:1-6, 10, 28) Eaha te haapiiraa? Ia hinaaro tatou e tamau i te rave i te mau mea e here mai ai te Atua, “eiaha” ïa tatou “e rave noa ’tu i te mea viivii,” e paruru râ tatou ma te itoito rahi i te parau mau i te mau huru viivii atoa.—Isaia 52:11; Ezekiela 44:23; Galatia 5:9.

3, 4. No te aha e mea maitai ai ia haapao maite tatou i te mau aratairaa Bibilia ia hi‘opoa tatou i te mau oroa e peu tumu au-roa-hia?

3 Tera noa râ, i muri a‘e i te poheraa o te mau aposetolo, o  tei tapea na i te mau Kerisetiano matamua ia ore ia farii i te ohipa taiva, ua haamata te feia e parau ra e Kerisetiano ratou aita hoi i hinaaro i te parau mau i te farii i te mau peu tumu, oroa e mahana “mo‘a” a te mau nunaa ěê, ta ratou i parau e e ohipa Kerisetiano. (Tesalonia 2, 2:7, 10) A hi‘opoa ’i oe i te tahi o teie mau oroa, e tapao oe e te faaite ra te reira eiaha i te varua o te Atua, tera râ i te huru feruriraa o teie nei ao. E pinepine, hoê â huru to te mau oroa a teie nei ao: E faaara i te mau hinaaro tia ore o te tino, e e turu i te mau tiaturiraa faaroo hape e te peu tahutahu, te mau peu iho â a “Babulonia rahi.” * (Apokalupo 18:2-4, 23) A haamana‘o atoa e ua ite roa ’tu Iehova i te mau peu faaroo hairiiri a te mau nunaa ěê no reira mai hoi e rave rahi peu tumu au-roa-hia. Aita e feaaraa e te au ore noa ra oia i taua mau oroa ra i teie tau atoa. Eiaha anei ïa tatou e haafaufaa roa i to ’na mana‘o?—Ioane 2, 6, 7.

4 Ei Kerisetiano mau, ua ite tatou e aita roa ’tu Iehova e au ra i te tahi mau oroa. E titauhia râ ia faaoti papu tatou i roto i to tatou aau eiaha roa ’tu e apiti i te reira. Ma te hi‘o faahou no te aha Iehova e ore roa ’i e au i tera mau oroa, e papu atu â ta tatou faaotiraa e haapae i te mau mea atoa o te nehenehe e haafifi ia tatou ia tamau i te rave i te mau mea e here mai ai te Atua.

NOELA: TE I‘OA APÎ O TE HAAMORIRAA I TE MAHANA

5. No te aha tatou e nehenehe ai e tiaturi e aita Iesu i fanauhia i te 25 no Titema?

5 Aita te Bibilia e faahiti ra i te oroa fanauraa o Iesu. Aita hoi tatou i ite i to ’na mahana fanauraa tia. E nehenehe râ tatou e tiaturi e aita o ’na i fanauhia i te 25 no Titema i te tau  to‘eto‘e i tera vahi o te ao. * No te mea ua papai Luka e i to Iesu fanauraahia, te “parahi ra” te mau tiai mamoe “i rapae” a haapao ai i ta ratou mau nǎnǎ. (Luka 2:8-11) Ahani e peu matauhia e ratou ia “parahi . . . i rapae” i te roaraa o te matahiti, aita ïa e faufaa ia tapao i te reira. Teie râ, no te mea e topa te ûa to‘eto‘e e te hiona i Betelehema i te tau to‘eto‘e, eita ïa te mau nǎnǎ e vaiihohia i rapae e eita te mau tiai mamoe e “parahi . . . i rapae.” Hau atu â, ua haere Iosepha raua Maria i Betelehema no te mea ua poroi Kaisara Auguso i te hoê tapaoraa i‘oa. (Luka 2:1-7) Eita ïa Kaisara e faaue i te hoê nunaa mea au ore na ratou te faatereraa Roma ia haere i te oire fanauraa o to ratou mau tupuna i te tau to‘eto‘e roa ’‘e.

6, 7. (a) Nohea mai e rave rahi peu tumu o te Noela? (b) Eaha te taa-ê-raa i rotopu i te horoaraa ô i te Noela e te horoaraa ô a te mau Kerisetiano mau?

6 No roto mai te Noela eiaha i te mau Papai, i te mau oroa râ a te mau nunaa ěê i tahito ra, mai te mau Saturnales Roma faatupuhia no Saturne, te atua o te faaapu. Ia au atoa i ta ratou mau numeraraa, i faatupu na te feia haamori i te atua Mithra i te 25 no Titema ei “oroa fanauraa o te mahana o te ore roa e pau,” ia au i te hoê buka ite rahi. “Ua haamata te Noela i te hoê tau e mea puai roa te haamoriraa i te mahana i Roma,” piri i te toru senekele i muri a‘e i te poheraa o te Mesia.—New Catholic Encyclopedia.

E horoa te mau Kerisetiano mau i te ô ma te here

7 I roto i ta ratou mau oroa, e horoa to te mau nunaa ěê i te mau ô na te tahi e te tahi e e tamaa ratou. Te rave-noa-hia ra te reira i te Noela. Mai i teie tau atoa râ, aita e rave rahi horoaraa ô i te Noela i tuati i te mana‘o o te Korinetia 2, 9:7, e na ô ra: “Ia horoa te taata tataitahi mai ta ’na i faaoti i roto i to ’na aau, eiaha ma te hinaaro ore aore ra ma te faahepohia, mea here hoi na te Atua te taata o te horoa ma te aau tae.” E  horoa te mau Kerisetiano mau ma te here, eiaha i te tahi noa taio mahana taa ê, e eita ratou e tiai i te mau ô ei faaho‘iraa. (Luka 14:12-14; a taio i te Ohipa 20:35.) Hau atu â, te mauruuru roa nei ratou i te tiamâ mai i te huehue o te Noela e i te teimaha o te tarahu a te taata e rave rahi i taua taime ra o te matahiti.—Mataio 11:28-30; Ioane 8:32.

8. Ua horoa anei te feia hi‘o fetia i te ô na Iesu no to ’na oroa fanauraa? A faataa na.

8 E na ô râ paha vetahi: ‘Aita anei te feia hi‘o fetia i horoa i te ô na Iesu no to ’na oroa fanauraa?’ Aita. Ta ratou mau ô, e ravea noa ïa no te faaite i to ratou faatura i te hoê taata faahiahia, e peu matauhia te reira i tahito ra. (Te mau arii 1, 10:1, 2, 10, 13; Mataio 2:2, 11) Inaha, aita ratou i haere atu i te po i fanauhia ’i Iesu. I to ratou taeraa ’tu, e ere Iesu i te hoê pêpe i roto i te hoê vahi e paruhia ’i te animara, e rave rahi râ ava‘e to ’na e te noho ra i roto i te hoê fare.

 FAATAARAA BIBILIA I TE OROA FANAURAA

9. Eaha tei tupu i na oroa fanauraa i faahitihia i roto i te Bibilia?

9 Noa ’tu e e tupuraa oaoa noa te fanauraa o te hoê pêpe, aita te Bibilia e faahiti ra i te hoê tavini a te Atua tei faatupu i to ’na oroa fanauraa. (Salamo 127:3) Ua mo‘ehia anei ia papai i te reira? Aita, e piti hoi oroa fanauraa tei faahitihia, to te hoê Pharao no Aiphiti e to Heroda Anitipa. (A taio i te Genese 40:20-22; Mareko 6:21-29.) Te faatiahia ra râ na oroa e piti ma te au ore, to Heroda Anitipa iho â râ i reira te tâpûraahia te upoo o Ioane Bapetizo.

10, 11. Eaha te mana‘o o te mau Kerisetiano matamua i te mau oroa fanauraa, e no te aha?

10 “I faariro na te mau Kerisetiano matamua,” ia au i te hoê buka ite rahi, “i te faatupuraa i te oroa fanauraa o te tahi taata ei peu tumu a te mau nunaa ěê.” (The World Book Encyclopedia)  Ei hi‘oraa, i tiaturi na to Heleni i tahito ra e e varua paruru to te taata tataitahi o te apiti i to ’na fanauraa e o te tiai ia ’na i muri a‘e. “E taairaa manamana” to taua varua ra “e te atua no ’na te oroa fanauraa i fanauhia ’i te taata,” ia au i te buka Peu tumu e tutuu o te mau oroa fanauraa (Beretane). Ua taai-roa-hia atoa te mau oroa fanauraa i te peu hi‘o fetia e te tohuraa tapao ehia maororaa.

11 Ua patoi te mau tavini a te Atua i tahito ra i te mau peu matauhia o te oroa fanauraa. E ere no te mea noa ua taaihia te reira i te peu tahutahu e na te mau nunaa ěê te reira, no ta ratou atoa râ mau ture aveia. No te aha hoi? E tane e e vahine haehaa noa ratou tei ore i hi‘o i to ratou fanauraa ei tupuraa faufaa roa e mea tia ia faatupuhia te oroa. * (Mika 6:8; Luka 9:48) O Iehova râ ta ratou i faahanahana e i haamauruuru no te ô faufaa roa o te ora. *Salamo 8:3, 4; 36:9; Apokalupo 4:11.

12. E nafea e maitai rahi ai to te mahana o to tatou poheraa i te mahana o to tatou fanauraa?

12 Eita e mo‘e i te Atua te feia atoa o te pohe ma te taiva ore, e mea papu to ratou oraraa no a muri a‘e. (Ioba 14:14, 15) Te na ô ra te Koheleta 7:1: “E maitai rahi to te i‘oa maitai i to te mono‘i hau‘a maitai ra; e te mahana e pohe ai ra i te mahana fanauraa.” To tatou “i‘oa,” o te roo maitai ïa i te aro o te Atua tei noaa mai ia tatou maoti ta tatou taviniraa haapao maitai. E tano roa ia tapao e ua taaihia te oroa hoê roa tei faauehia i te mau Kerisetiano ia faatupu, eiaha i te hoê fanauraa, i te hoê poheraa râ, to Iesu. O to ’na “i‘oa” maitai roa hoi te ravea faufaa roa e ora ’i tatou.—Hebera 1:3, 4; Luka 22:17-20.

 PAKATE: HAAMORIRAA I TE FANAURAA FAAHURU-Ê-HIA

13, 14. Nohea mai te mau peu tumu au-roa-hia o te Pakate?

13 Ua parauhia e e oroa te Pakate no te tia-faahou-raa o te Mesia, i te tanoraa râ no roto mai te reira i te haapaoraa hape. Ua taaihia te Pakate ia Eostre, aore ra Ostara, te ruahine Beretane o te aahiata e o te tau uaaraa tiare. E eaha ïa te taairaa o te huero moa e te rapiti e te Pakate? “Ua matau-maitai-hia” te huero moa “ei taipe o te ora apî e te tia-faahou-raa,” ia au i te hoê buka ite rahi, e ua faaohipa-maoro-hia te rapiti ei taipe o te fanauraa. (Encyclopædia Britannica) No reira, e oroa mau â te Pakate o te fanauraa tei faahuru-ê-rii-hia ei oroa o te tia-faahou-raa o te Mesia. *

14 E farii anei Iehova ia haamana‘ohia te tia-faahou-raa o ta ’na Tamaiti na roto i te hoê oroa hairiiri o te fanauraa? Eita ïa! (Korinetia 2, 6:17, 18) Inaha, aita roa ’tu te mau Papai e faaue ra e aita atoa e faatia ra i te haamana‘oraa i te tia-faahou-raa o Iesu. No reira, e ohipa taiva mau â ia faatupu i te reira ma te i‘oa o te Pakate.

HALLOWEEN: E ERE I TE OROA MO‘A

15. Nohea mai te Halloween, e eaha te nehenehe e tapao no nia i te taio mahana i maitihia no te faatupu i tera oroa?

15 Matauhia no ta ’na mau vahine tahutahu, ta ’na mau varua nainai e te tahi atu mau faaunaunaraa e tao‘a huru ê, no ǒ mai te Halloween, oia hoi te mahana hou te mahana o te mau peata atoa te auraa, i te mau Celtes i tahito ra no Beretane e no Irelane. I te atiraa ava‘e fatata roa i te 1 no Novema, i faatupu na ratou i te oroa Samain, “hopea o te tau veavea” te auraa. I tiaturi na ratou e i te roaraa o tera oroa, e matara te uputa i rotopu i te taata e te ao varua e e ratere haere  te mau varua maitai e te mau varua ino atoa na te fenua. I mana‘o na ratou e e ho‘i te varua o te feia pohe i ǒ ratou, e e faaineine ïa te mau utuafare i te maa e te inu na to ratou mau ratere tupapau no te tamǎrû ia ratou. No reira, ia haere te mau tamarii i teie tau ma te ahu tupapau aore ra tahutahu na te mau fare e haamǎta‘u i te taata e e hautihia ratou ia ore ratou e horoa i te momona, te tamau ra ïa ratou ma te ite ore i te faatupu i te oroa Samain.

IA VAI VIIVII ORE TO OE FAAIPOIPORAA

16, 17. (a) No te aha e mea maitai ai ia hi‘opoa te mau Kerisetiano o te faaineine ra i to ratou faaipoiporaa i te mau peu tumu faaipoiporaa o te fenua ia au i te mau aratairaa Bibilia? (b) No nia i te mau peu tumu mai te hueraa i te raiti aore ra te tahi atu mea, eaha ta te mau Kerisetiano e haapao maitai?

16 Fatata “eita te reo o te tane faaipoipo e ta ’na vahine e faaroo-faahou-hia i roto ia [Babulonia rahi].” (Apokalupo 18:23) No te aha? I roto i te hoê tuhaa, no ta ’na ïa mau peu tahutahu, o te nehenehe e haaviivii i te hoê faaipoiporaa mai te mahana iho â e tupu ai te faaipoiporaa.—Mareko 10:6-9.

17 Ua rau te peu tumu i tera fenua i tera fenua. No roto mai paha te tahi mau peu tumu ino ore ia hi‘ohia i te mau peu Babulonia tei mana‘ohia e e hopoi mai i te manuïa na te feia faaipoipo aore ra na ta raua mau manihini. (Isaia 65:11) Hoê tutuu mai tera te huru, o te hueraa ïa i te raiti aore ra te tahi atu mea. No roto mai paha teie peu i te tiaturiraa e e tamǎrû te maa i te mau varua ino, a ore atu ai ratou e rave ino i te tane e te vahine faaipoipo apî. Hau atu â, e taipe miterio maoro te raiti o te fanauraa, te oaoa e te oraraa maoro. Mea maramarama, te feia atoa o te hinaaro ra e tamau i te rave i te mau mea e here ai te Atua ia ratou, e haapae ïa i taua mau peu tumu viivii ra.—A taio i te Korinetia 2, 6:14-18.

18. Teihea mau aratairaa Bibilia ia pee na taata o te faaineine nei i to raua faaipoiporaa e te mau manihini e tia ’i?

18 E haapae atoa te mau tavini a Iehova i te mau peu a teie  nei ao o te faaere i te mau faaipoiporaa e te mau oroa faaipoiporaa i te tura Kerisetiano aore ra o te faaturori i te mana‘o haava o vetahi. Ei hi‘oraa, e haapae ratou i te mau faaoooraa mauiui aore ra faahitihitiraa faufau ia orero ratou. E haapae ratou i te mau peu hoata aore ra te mau parau e huru ê ai na hoa faaipoipo apî e vetahi ê. (Maseli 26:18, 19; Luka 6:31; 10:27) E haapae atoa ratou i te mau oroa faaipoiporaa rahi unauna aita e faaite ra i te huru au noa, tera râ i “te faaiteiteraa ahaaha i ta ’na mau faufaa.” (Ioane 1, 2:16) Mai te peu e te faaineine nei oe i to oe faaipoiporaa, eiaha roa ’tu e haamo‘e e te hinaaro ra Iehova ia haamana‘o noa oe i taua mahana taa ê ra ma te oaoa, eiaha ma te tatarahapa. *

PATERAA I TE HAPAINA: E PEU FAAROO ANEI?

19, 20. Eaha ta te hoê buka e parau ra no nia i te tumu o te pateraa i te hapaina, e no te aha teie peu tumu e ore ai e tano no te mau Kerisetiano?

19 E peu matauhia ia pate i te hapaina i te mau faaipoiporaa e te tahi atu mau oroa. Te na ô ra te hoê buka: “Peneia‘e e toetoea [te pateraa i te hapaina] o te mau tusia inu i tahito ra, i reira e pûpûhia ’i te tahi mea tahe mo‘a na te mau atua . . . ia faaroohia mai te hoê euhe, te hoê pure haapotohia ma te mau parau ‘ia roa to oe oraraa!’ aore ra ‘ia maitai to oe ea!’”—International Handbook on Alcohol and Culture, tei mahiti i 1995.

20 Parau mau, aita paha e rave rahi taata e mana‘o ra e e peu faaroo te pateraa i te hapaina aore ra e tiaturiraa i te ohipa manamana. E nehenehe râ te peu tumu e amo i te hapaina uaina i nia e hi‘ohia mai te hoê aniraa i te “ra‘i,” oia hoi te hoê puai hau a‘e i to te taata, i te hoê haamaitairaa aita hoi e tuati ra i tei faataahia i roto i te mau Papai.—Ioane 14:6; 16:23. *

 “OUTOU O TEI HINAARO IA IEHOVA RA, IA RIARIA OUTOU I TE INO”

21. Noa ’tu e aita e tumu faaroo to te reira, eaha te mau oroa matauhia ta te mau Kerisetiano e haapae, e no te aha?

21 Ei tapao faaite e ua ino roa te mau ture aveia a teie nei ao i teie tau, ta Babulonia rahi hoi e paturu roa ra aore ra ma te tahi atu mau ravea, te faanaho ra te tahi mau fenua i te mau oroa taravanaraa aore ra te mardi gras i te mau matahiti atoa, i reira e tupu ai te mau oriraa faufau e e faatietie-atoa-hia ’i te huru oraraa tane tane e vahine vahine. E tano anei ia apiti aore ra ia mataitai te feia e here ra ia Iehova i tera mau oroa? Ia na reira te hoê Kerisetiano, e faaite anei ïa oia e te riaria mau ra oia i te ino? (Salamo 1:1, 2; 97:10) Mea maitai a‘e ïa ia pee i te haerea o te papai salamo tei pure: “E faafariu ê i tau mata ia ore ia hi‘o i te mea faufaa ore”!—Salamo 119:37.

22. I roto i teihea tupuraa e tia ’i i te hoê Kerisetiano ia faaoti ia au i to ’na mana‘o haava e apiti anei i te hoê oroa aore ra eita?

22 I te mau mahana oroa a teie nei ao, e ara te hoê Kerisetiano ia ore to ’na haerea e horoa ia vetahi ê i te mana‘o e te apiti ra oia i te reira. “Te amu ra outou, te inu ra aore ra te rave ra i te tahi atu ohipa,” ta Paulo ïa i papai, “a rave i te mau mea atoa ia hanahana te Atua.” (Korinetia 1, 10:31; a hi‘o i te tumu parau “ A rave i te mau faaotiraa paari.”) Mai te peu râ e aita iho â e taairaa to te hoê peu tumu aore ra oroa e te haapaoraa hape, te poritita aore ra te here ai‘a, e aita e ofati ra i te mau aratairaa Bibilia, e nehenehe te Kerisetiano tataitahi e faaoti no ’na iho e apiti atu anei aore ra eita. E haapao atoa oia i te mau huru aau o vetahi ê ia ore ratou e turori.

IA HANAHANA TE ATUA I TE PARAU E TE OHIPA

23, 24. E nafea tatou e nehenehe ai e horoa i te hoê faaiteraa maitai no nia i te mau ture aveia parau-tia a Iehova?

23 No te taata e rave rahi, e taime maitai na mua roa te mau mahana oroa matauhia ia farerei te fetii e te mau hoa. No  reira, ia mana‘o hape te tahi taata e mea etaeta aore ra mea faarahi to tatou tiaraa Bibilia, e nehenehe tatou e faataa ma te mǎrû e mea au na te mau Ite no Iehova e amuimui maitai e te fetii e te mau hoa. (Maseli 11:25; Koheleta 3:12, 13; Korinetia 2, 9:7) E oaoa tatou i te farerei i tei herehia i te roaraa o te matahiti, no to tatou râ here i te Atua e to tatou hinaaro i ta ’na mau ture aveia parau-tia, eita tatou e hinaaro e haaviivii i taua mau taime oaoa ra i te mau peu tumu o te faainoino ia ’na.—A hi‘o i te tumu parau “ E hopoi mai te haamoriraa mau i te oaoa rahi roa ’‘e.”

24 Ua manuïa roa te tahi mau Ite no Iehova i te faaite i te tahi feia uiui haavare ore i te mau mana‘o o te pene 16 o te buka Eaha ta te Bibilia e haapii mau ra? * A haamana‘o râ i ta tatou fa, o te haaputapûraa ïa i te aau, e ere te haapapuraa e ua tano tatou. No reira, e faatura ana‘e, ia mǎrû noa, e “ei parau nehenehe noa ta [ta]tou e te tamitihia.”—Kolosa 4:6.

25, 26. E nafea te mau metua e tauturu ai i ta ratou mau tamarii ia haapuai i to ratou faaroo e to ratou here no Iehova?

25 Ei tavini na Iehova, ua haapii-maitai-hia tatou. Ua ite tatou no te aha tatou e tiaturi ai e e rave ai i te tahi mau mea e e haapae ai i te tahi atu. (Hebera 5:14) No reira e te mau metua, a haapii i ta outou mau tamarii ia feruri i te mau aratairaa Bibilia. E haapuai ïa outou i to ratou faaroo, e tauturu outou ia ratou ia pahono e te mau Papai i te feia o te ui no nia i ta ratou mau tiaturiraa, e e haapapu outou ia ratou e te here ra Iehova ia ratou.—Isaia 48:17, 18; Petero 1, 3:15.

26 Aita noa te feia atoa o te haamori ra i te Atua “ma te varua mo‘a e te parau mau” e haapae ra i te mau oroa aita i roto i te Bibilia, te tutava atoa ra râ i te tapi i te haerea afaro i roto i te mau tuhaa atoa o te oraraa. (Ioane 4:23) I teie mahana, mea rahi o te mana‘o ra e aita e faufaa to te haerea afaro. Mai ta tatou râ e ite i te pene i muri iho, o te mau e‘a o te Atua te mea maitai roa ’‘e.

^ par. 3 A hi‘o i te tumu parau “ E mea maitai anei ia apiti au i te oroa?”. Ua tapurahia te tahi mau oroa e mahana “mo‘a” taa maitai i roto i te Index des publications Watch Tower, piahia e te mau Ite no Iehova.

^ par. 5 Ia au i te tuatapaparaa tau Bibilia e te aamu o te ao, ua fanauhia paha Iesu i te 2 hou to tatou tau i te ava‘e ati Iuda no Etanima, Tetepa e Atopa ïa i roto i ta tatou nei tarena.—A hi‘o i te Étude perspicace des Écritures, buka 2, api 21, piahia e te mau Ite no Iehova.

^ par. 11 A hi‘o i te tumu parau “ Mahana ‘mo‘a’ e haamoriraa ia Satani.”

^ par. 11 I titau na te faufaa o te ture a Mose ia pûpû te hoê vahine, i muri a‘e i te fanauraa i ta ’na aiû, i te hoê tusia no te hara i te Atua. (Levitiko 12:1-8) Ua tauturu teie titauraa e au i te ture, o tei haamana‘o maitai e e tutuu te taata i te hara na ta ratou mau tamarii, i te nunaa Iseraela ia tapea i te mana‘o faito noa no nia i te fanauraa o te hoê tamarii, a ore atu ai ratou e hinaaro e farii i te mau peu o te oroa fanauraa a te mau nunaa ěê.—Salamo 51:5.

^ par. 13 E ruahine atoa Eostre (aore ra Eastre) o te fanauraa. Ia au i te hoê titionare e rapiti oviri ta ’na i roto i te ava‘e mea au na ’na te huero moa e, i te tahi mau taime, e upoo rapiti oviri to ’na.—The Dictionary of Mythology.

^ par. 18 A hi‘o i na tumu parau e toru no nia i te faaipoiporaa e te mau oroa faaanaanataeraa i roto i Te Pare Tiairaa o te 1 no Novema 2006, api 12-21 e Te Pare Tiairaa reo Farani o te 15 no Atopa 2006, api 28-31.

^ par. 20 A hi‘o i Te Pare Tiairaa o te 15 no Fepuare 2007, api 30-31 (Farani).

^ par. 24 Piahia e te mau Ite no Iehova.