Eaha to roto?

Mau faaho'iraa ê

Tapura tumu parau

Ite no Iehova

Tahiti

Rave noa i te mau mea e here mai ai te Atua

Rata a te Tino aratai

Rata a te Tino aratai

O oe e here ra ia Iehova:

“E ite outou i te parau mau e na te parau mau e faatiamâ ia outou,” ta Iesu ïa i parau. (Ioane 8:32) Auê ïa parau faaitoito e! Oia, e nehenehe e ite i te parau mau i teie atoa “mau mahana hopea” ino mau ua rahi hoi te haavare. (Timoteo 2, 3:1) Te haamana‘o ra anei oe i to oe ite-matamua-raa i te parau mau mai tei faataahia i roto i te Parau a te Atua? Auê hoi te oaoa e!

E mea faufaa ia noaa mai te ite mau i te parau mau e ia faaite tamau i te reira ia vetahi ê, e mea tia atoa râ ia tuati to tatou haerea e te parau mau. No te na reira, e titauhia ia tamau tatou i te rave i te mau mea e here mai ai te Atua. Eaha ïa te auraa? Ua pahono Iesu i teie uiraa i te po hou to ’na poheraa. Ua na ô oia i ta ’na mau aposetolo haapao maitai: “Ia haapao outou i ta ’u mau faaueraa, e here noa ïa vau ia outou, mai ia ’u hoi e haapao nei i te mau faaueraa a te Metua, a here noa ’i o ’na ia ’u.”—Ioane 15:10.

A tapao na e ua here noa te Atua ia Iesu, no te mea ua haapao oia i te parau a to ’na Metua. E tano atoa te reira no tatou i teie mahana. Ia here noa te Atua ia tatou, e titauhia ia faaohipa tatou i te parau mau i roto i to tatou oraraa o te mau mahana atoa. I taua noa po ra, ua parau Iesu: “Ua ite outou i teie mau mea, e oaoa outou ia rave outou i te reira.”—Ioane 13:17.

Te tiaturi mau nei matou e e tauturu teie buka ia oe ia tamau i te faaohipa i te parau mau i roto i to oe oraraa e i te rave i te mau mea “e here ai te Atua” ia oe “ma te tiaturi i te ora mure ore.”—Iuda 21.

Tino aratai a te mau Ite no Iehova