Eaha to roto?

Mau faaho'iraa ê

Tapura tumu parau

Ite no Iehova

Tahiti

Rave noa i te mau mea e here mai ai te Atua

 PENE 10

Faaipoiporaa, e ô na te Atua e here ra ia tatou

Faaipoiporaa, e ô na te Atua e here ra ia tatou

“Te taura e toru fenu ra, eita ïa e motu vave.”—KOHELETA 4:12.

1, 2. (a) Ia haere tatou i te hoê faaipoiporaa, eaha ta tatou e uiui i te tahi taime, e no te aha? (b) Eaha te mau uiraa ta tatou e hi‘opoa i roto i teie pene?

MEA au anei na oe e haere i te mau faaipoiporaa? Mea au na e rave rahi, mea oaoa roa hoi taua mau taime ra. E ite oe e mea faanehenehe maitai na taata faaipoipo. Hau atu â, e mata oaoa roa to raua! I taua mahana ra, mea oaoa roa raua, e e au ra e mea rahi te tiaturiraa e te parau fafau i roto i to raua oraraa a muri a‘e.

2 E mea tia râ ia fa‘i e i roto e rave rahi tuhaa, ua arepurepu te faaipoiporaa i teie tau. Noa ’tu e te tiaturi ra tatou i te mea maitai roa ’‘e no na feia faaipoipo, e uiui paha tatou i te tahi taime: ‘E oaoa anei raua? E tapea anei to raua faaipoiporaa?’ Te pahonoraa o teie na uiraa, tei te tiaturiraa ïa te tane faaipoipo e ta ’na vahine i te mau a‘oraa a te Atua no nia i te faaipoiporaa, e te faaohiparaa raua i te reira. (A taio i te Maseli 3:5, 6.) E titauhia ia na reira raua no te tamau i te rave i te mau mea e here ai te Atua ia raua. E hi‘opoa tatou i teie nei i te pahonoraa a te Bibilia i teie na uiraa e maha: No te aha e faaipoipo ai? Ia faaipoipo oe, o vai ta oe e maiti ei apiti? E nafea ia faaineine ia oe no te faaipoiporaa? E eaha te tauturu i te hoê tane faaipoipo e ta ’na vahine ia oaoa noa?

NO TE AHA E FAAIPOIPO AI?

3. No te aha e haerea paari ore ai ia faaipoipo no te mau tumu faufaa ore?

3 Te tiaturi ra vetahi e mea faufaa roa te faaipoiporaa no te  ite i te oaoa, oia hoi eita oe e ite i te oaoa i roto i te oraraa mai te peu e aita to oe e apiti. Mea hape roa te reira! Ua faahiti Iesu, te hoê tane taa noa, i te faaea-taa-noa-raa mai te hoê ô e ua faaitoito i te feia e tia ia ratou ia farii i te reira. (Mataio 19:11, 12) Ua faataa atoa te aposetolo Paulo i te mau maitai ia faaea taa noa. (Korinetia 1, 7:32-38) Aita Iesu e aita atoa Paulo i faariro i te reira ei faatureraa. Inaha, ua tapurahia te opaniraa e faaipoipo i roto i “te mau haapiiraa a te mau demoni.” (Timoteo 1, 4:1-3) Mea rahi râ ta te faaea-taa-noa-raa e pûpû na te feia e hinaaro e tavini ia Iehova ma te aau atoa. E ere ïa i te haerea paari ia faaipoipo no te mau tumu faufaa ore, mai te faaheporaa a te mau hoa.

4. No te aha e niu maitai roa ’i te hoê faaipoiporaa oaoa no te rave i te mau tamarii?

4 I te tahi a‘e pae, te vai ra anei te tumu papu e faaipoipo ai? E. E ô atoa te faaipoiporaa na to tatou Atua e here ra ia tatou. (A taio i te Genese 2:18.) No reira, e maitai atoa to te faaipoiporaa e e nehenehe te reira e horoa mai i te oaoa. Ei hi‘oraa, e niu maitai roa te hoê faaipoiporaa oaoa no te oraraa utuafare. E hinaaro te mau tamarii i te hoê oraraa papu e te mau metua no te rave ia ratou, ma te horoa ’tu i te here, te a‘o e te aratairaa. (Salamo 127:3; Ephesia 6:1-4) E ere râ te raveraa i te tamarii i te tumu otahi e faaipoipo ai.

5, 6. (a) Ia au i te Koheleta 4:9-12, eaha te tahi mau maitai o te hoê auhoaraa piri? (b) E nafea te hoê faaipoiporaa e au ai i te hoê taura e toru fenu?

5 A hi‘o na i te mau irava tapiri o te irava tumu o teie pene: “E maitai te taata toopiti i te taata hoê; no te mea e utua maitai ta raua i ta raua ohipa. Ia hi‘a hoi te tahi ra, na te hoa e rave e faatia i nia; te taata hoê râ ia hi‘a ra, atae hoi oia, aita hoi o ’na e taua ei faatia ia ’na i nia! Te taata toopiti hoi ia taoto ra, e mahanahana ïa; eaha e mahanahana ’i te taata hoê oia ana‘e ra? Etaeta rahi to te taata ia rave mai i te hoê ra, e tia ia raua atoa ia rave atu ia ’na; e te taura e toru fenu ra, eita ïa e motu vave.”—Koheleta 4:9-12.

 6 Na mua roa, no nia teie irava i te faufaaraa o te hoa. Parau mau, o te faaipoiporaa te auhoaraa piri roa ’‘e. Ia au i teie mau irava, e nehenehe tera taairaa e horoa mai i te tauturu, te tamahanahanaraa e te parururaa. Mea puai roa te hoê faaipoiporaa mai te peu e e apitihia te tahi atu mea i teie taairaa i rotopu e piti taata. E nehenehe te taura e piti fenu e motu, te mana‘o ïa ta teie irava e horoa ra. Area e toru fenu raraahia aore ra firihia, eita ïa e motu oioi. Ia tapitapi na mua roa te tane faaipoipo e ta ’na vahine atoa i te faaoaoa ia Iehova, e au ïa to raua faaipoiporaa i taua taura e toru fenu ra. I te mea e te haamori ra raua toopiti ia Iehova ma te aau atoa, mea papu maitai ïa to raua faaipoiporaa.

7, 8. (a) Eaha te a‘oraa ta Paulo i papai no te mau Kerisetiano taa noa o te aro ra i te hinaaro e taoto i te hoê apiti? (b) Eaha te mana‘o tano no nia i te faaipoiporaa ta te Bibilia e horoa mai ra?

7 I roto atoa i te faaipoiporaa ana‘e e nehenehe ai e haamâha ma te au i te mau hinaaro e taoto i to ’na hoa faaipoipo. I roto i teie tupuraa, te hi‘o-mau-hia ra te taotoraa i to ’na hoa faaipoipo ei tumu o te oaoa. (Maseli 5:18) Ua mairi ana‘e ta te Bibilia e parau ra te “taurearearaa mai te umoa tiare i uaa,” oia hoi te area tau e mea puai roa te hinaaro e taoto i te hoê apiti, te aro noa ra paha taua taata taa noa ra i taua hinaaro ra. Ia ore oia e haavî i te reira, e nehenehe oia e rave i te tahi ohipa viivii aore ra tano ore. I raro a‘e i te aratairaa a te varua o te Atua, ua papai Paulo i teie a‘oraa no te feia taa noa: “Ia ore . . . ia vî ia ratou i te faaoromai, ia faaipoipo ïa, e mea maitai a‘e hoi te faaipoiporaa i te ura-noa-raa i te hinaaro.”—Korinetia 1, 7:9, 36; Iakobo 1:15.

8 Noa ’tu eaha te tumu e faaipoipo ai te hoê taata, e mea maitai ia tapea oia i te mana‘o tano. Mai ta Paulo i parau, “e fifihia” te feia e faaipoipo “i te tino.” (Korinetia 1, 7:28) E faaruru te feia faaipoipo i te mau fifi ta te feia taa noa e ore e faaû. Ia maiti râ oe i te faaipoipo, e nafea oe e faaiti mai ai i te mau fifi e e faarahi ai i te mau maitai? Te hoê ravea, o te maitiraa ïa i te hoê apiti ma te paari.

 O VAI TE HOA FAAIPOIPO MAITAI?

9, 10. (a) Mea nafea to Paulo faahoho‘araa i te fifi atâta ia amui roa ’tu i te feia e ere i te Kerisetiano? (b) Eaha te tupu pinepine ia tâu‘a-ore-hia te a‘oraa a te Atua eiaha e faaipoipo i te hoê taata e ere i te Kerisetiano?

9 I raro a‘e i te aratairaa a te varua o te Atua, ua papai Paulo i te hoê faaueraa tumu faufaa roa e mea maitai ia faaohipa no te maiti i te hoê hoa faaipoipo: “Eiaha outou ia amui-au-ore-hia i te feia aita e tiaturi ra ia Iesu.” (Korinetia 2, 6:14; a hi‘o i te nota i raro i te api o te irava.) Ua niuhia ta ’na faahoho‘araa i nia i te ohipa faaapu. Ia tuuhia i raro a‘e hoê â zugo e piti animara mea taa ê roa to raua rahi aore ra puai, o raua e piti atoa te mauiui. Oia atoa, ia taatihia te hoê Kerisetiano e te hoê apiti e ere i te Kerisetiano, e umeume raua. Ia hinaaro te hoê apiti e tamau i te rave i te mau mea e here ai Iehova ia ’na e aita to ’na apiti e tâu‘a ra i te reira, eita e tu ta raua mau fa matamua i roto i te oraraa, e e tupu te ahoaho rahi. No reira Paulo i a‘o ai i te mau Kerisetiano ia faaipoipo “i roto noa . . . i te Fatu.”—Korinetia 1, 7:39.

10 I te tahi mau taime, ua faaoti te tahi mau Kerisetiano taa noa e mea maitai a‘e te amui-au-ore-raa i te mo‘emo‘e ta ratou e faaruru nei. E faaoti vetahi i te tâu‘a ore i te mau a‘oraa Bibilia e i te faaipoipo i te hoê taata aita e tavini ra ia Iehova. E pinepine, mea mauiui te faahopearaa. Ua faaipoipo ratou i te hoê taata eita ratou e nehenehe e faaite atu i te mau mea faufaa roa ’‘e o te oraraa. Ua rahi a‘e ïa te mo‘emo‘e i ta ratou i ite hou ratou a faaipoipo ai. Aua‘e râ, e rave rahi tausani Kerisetiano taa noa teie e tiaturi nei i te mau a‘oraa a te Atua i roto i teie tuhaa, e e pee nei i te reira ma te taiva ore. (A taio i te Salamo 32:8.) A tiai noa ’tu ai râ i te faaipoipo i te hoê mahana, te faaea taa noa ra ratou e tae noa ’tu i te taime e ite ai ratou i te hoê apiti i rotopu i te feia e haamori ra i te Atua ra o Iehova.

11. Eaha te tauturu ia oe ia maiti i te hoê hoa faaipoipo ma te paari? (A hi‘o atoa i te tumu parau “ Eaha ta ’u e imi nei i ǒ te hoê hoa faaipoipo?”)

11 Parau mau, e ere pauroa te tavini a te Atua i te hoa faaipoipo e tano. Mai te peu e te mana‘o nei oe e faaipoipo, a  imi i te hoê apiti e tuati to ’na huru, ta ’na mau fa pae varua e to ’na here i te Atua e to oe. Ua nenei te tavini haapao maitai e te paari e rave rahi papai no nia i te reira, e mea maitai ia hi‘opoa oe i tera mau a‘oraa Bibilia e ia pure no te reira, a vaiiho atu ai i te reira ia aratai ia oe i roto i teie faaotiraa faufaa. *A taio i te Salamo 119:105.

12. Eaha te peu no nia i te faaipoiporaa e ravehia ra i e rave rahi fenua, e eaha te hi‘oraa Bibilia e horoa ra i te tahi aratairaa?

12 I e rave rahi fenua, ua matauhia e na te metua e maiti i te apiti no ta ratou tamarii. E farii te rahiraa i roto i taua mau ta‘ere ra e e paari e e aravihi rahi a‘e to te mau metua e mea faufaa roa no te rave i taua maitiraa rahi ra. Ua manuïa pinepine te mau faaipoiporaa faanahohia, mai i tahito ra. E haapiiraa te hi‘oraa o Aberahama tei tono i ta ’na tavini e tii i te hoê vahine na Isaaka, no te mau metua i roto i tera atoa tupuraa i teie mahana. Aita Aberahama i haapeapea no te moni e te tiaraa. Ua tutava maite râ oia i te imi i te hoê vahine faaipoipo na Isaaka i rotopu i te feia e haamori ra ia Iehova. *Genese 24:3, 67.

E NAFEA IA FAAINEINE IA OE NO TE HOÊ FAAIPOIPORAA O TE MANUÏA?

13-15. (a) E nafea te aratairaa Bibilia i roto i te Maseli 24:27 e tauturu ai i te hoê tane apî o te mana‘o ra e faaipoipo? (b) Eaha ta te hoê vahine apî e nehenehe e rave no te faaineine ia ’na no te faaipoiporaa?

13 Mai te peu e te mana‘o maite ra oe e faaipoipo, e mea maitai ia ui oe ia oe iho: ‘Ua ineine mau anei au?’ Te pahonoraa,  e ere noa ïa tei to oe huru aau no nia i te here, te taotoraa i to ’na hoa faaipoipo, te oraraa faaipoipo, aore ra te raveraa i te tamarii. Te vai ra râ te tahi mau fa taa maitai e mea tia ia feruri te tane aore ra te vahine o te hinaaro e faaipoipo.

14 E mea tia ia feruri maitai te hoê tane apî o te imi ra i te hoê vahine faaipoipo na ’na i teie aratairaa Bibilia: “E imi oe i ta oe ra mau ravea i te atea ê, a faaau maite ai ia au ta oe i rapae au; a faatia ’i i to oe fare i muri a‘e.” (Maseli 24:27) Eaha te mana‘o faufaa? I tera ra tau, ia hinaaro te hoê taata e haamau i te hoê utuafare ma te faaipoipo, e titauhia ia ui o ’na ia ’na iho: ‘Ua ineine anei au i te haapao e i te faatamaa i ta ’u vahine faaipoipo e te mau tamarii atoa e fanauhia mai i muri a‘e?’ E titauhia ia rave na mua oia i te ohipa, ma te haapao i ta ’na i rapaeau, aore ra ta ’na faaapu. Tera atoa te aratairaa Bibilia i teie tau. E titauhia ia faaineine te hoê tane e hinaaro ra e faaipoipo i te amo i te hopoia. A maraa noa ’i ia ’na, ia rave o ’na i te ohipa e tia ’i. Ia au i te Parau a te Atua, te hoê tane o te ore e haapao i te mau hinaaro mau i te pae tino, pae aau e pae varua o to ’na utuafare, ua hau a‘e to ’na ino i to te taata aita e faaroo to ’na!—A taio i te Timoteo 1, 5:8.

15 Te farii atoa ra te hoê vahine o te faaoti e faaipoipo i te amo i te tahi mau hopoia teimaha. Te faahiti ra te Bibilia i te tahi mau aravihi e huru maitai ta te hoê vahine e hinaaro mau no te tauturu i ta ’na tane e no te haapao i to ’na utuafare. (Maseli 31:10-31) Te mau tane e vahine o te ru i te faaipoipo ma te faaineine ore i te amo i te mau hopoia, e feia miimii mau ïa, aita e feruri ra eaha ta ratou e nehenehe e horoa na te taata ta ratou e faaipoipo. Te mea faufaa roa ’tu râ, e titauhia ia ineine te feia e mana‘o ra e faaipoipo i te pae varua.

16, 17. E mea maitai ia feruriruri te feia e faaineine ra no te faaipoiporaa i teihea mau aratairaa Bibilia?

16 Ua taaihia te faaineineraa no te faaipoiporaa i te feruriruriraa  i te mau tuhaa ta te Atua i faataa no te tane faaipoipo e no te vahine faaipoipo. E titauhia ia ite te hoê tane eaha te auraa e riro ei upoo o te hoê utuafare Kerisetiano. E ere teie tiaraa i te hoê parau faatia no te haavî. Eita, e mea tia ia pee o ’na i te huru faaohiparaa a Iesu i te tiaraa upoo. (Ephesia 5:23) Oia atoa, e mea tia ia taa i te hoê vahine Kerisetiano te tuhaa tura a te vahine faaipoipo. E farii anei o ’na i te auraro i “te ture a ta ’na tane”? (Roma 7:2) Tei raro a‘e ê na oia i te ture a Iehova e a te Mesia. (Galatia 6:2) E ture ê atu te mana faatere o ta ’na tane i roto i te utuafare. E turu e e auraro anei o ’na i te mana faatere o te hoê tane tia ore? Mai te peu e eita o ’na e au roa i te reira, eiaha ïa o ’na e faaipoipo.

17 Hau atu â, e titauhia ia ineine te apiti tataitahi i te haapao i te mau hinaaro mau taa ê o te tahi. (A taio i te Philipi 2:4.) Ua papai Paulo: “Ia here te tane faaipoipo tataitahi i rotopu ia outou i ta ’na vahine mai ta ’na e here ia ’na iho. Area te vahine faaipoipo ra, ia faatura maite ïa i ta ’na tane e tia ’i.” Ma te arataihia e te varua o te Atua, ua taa ia Paulo e e hinaaro mau â te tane faaipoipo e ite e te faatura roa ra ta ’na vahine ia ’na. E e hinaaro mau â te vahine faaipoipo e ite e te here ra ta ’na tane ia ’na.—Ephesia 5:21-33.

Ia haamatau ratou, mea rahi te rave ma te paari i te hoê apee

18. No te aha e mea maitai ai ia haavî te feia o te haamatau ra te tahi i te tahi ia ratou iho?

18 No reira, e ere te haamatauraa i te hoê taime faaanaanataeraa noa. E taime râ ia haapii te hoê tane e te hoê vahine i te haa ma te au te tahi i te tahi, ia ite e e maitiraa paari anei te faaipoiporaa. E taime atoa no te haavî ia raua iho! E nehenehe te faahemaraa e tapiri roa ’tu i te tahi e te tahi e puai roa, inaha, mea natura te hinaaroraa i te hoê taata. Teie râ, e haapae te feia o te here mau ra te tahi i te tahi i te mau ohipa atoa o te totoa i tei herehia i te pae varua. (Tesalonia 1, 4:6) No reira, mai te peu e te haamatau ra oe, a haavî ia oe iho. E faufaahia oe i taua huru maitai ra i te roaraa o to oe oraraa, ia faaipoipo noa ’tu oe aore ra eita.

 E NAFEA TO OE FAAIPOIPORAA E VAI TAMAU AI?

19, 20. E nafea te mana‘o o te hoê Kerisetiano i te faaipoiporaa e taa ê ai e to teie nei ao i teie mahana? A faataa na.

19 Ia vai tamau to raua faaipoiporaa, e mea tia ia tapea te tane faaipoipo e ta ’na vahine i te mana‘o tano no nia i ta raua i euhe te tahi i te tahi. Te faaipoiporaa i roto i te mau papai e te mau hoho‘a teata, o te hopea oaoa ïa ta te taata e hinaaro roa ra. I roto râ i te oraraa mau, e ere te faaipoiporaa i te hopea, e haamataraa râ o te hoê mea ta Iehova i opua e ia vai tamau. (Genese 2:24) Tera noa râ, e ere te reira i te mana‘o matauhia i roto i te ao i teie tau. I roto i te tahi mau ta‘ere, e hi‘o te taata i te faaipoiporaa mai e piti taura tei taponahia. Aita paha ratou i ite e te faataa maitai ra tera faahoho‘araa i te mana‘o o te rahiraa no nia i te faaipoiporaa, oia hoi mea paari maitai ua tapona-maitai-hia ana‘e na taura, oia atoa râ mea ohie roa ia tapona e ia tatara.

20 Mea rahi i teie mahana o te hi‘o i te faaipoiporaa mai te hoê faanahoraa taime poto. E farii ratou i te faaipoipo no to ratou mana‘o e e tano te reira i to ratou mau hinaaro mau. Tera râ, e faataa ratou i te taime e tupu ai te fifi. A haamana‘o râ i te faahoho‘araa ta te Bibilia e faaohipa ra no te taairaa o te faaipoiporaa, te taura. Ua hamanihia te mau taura o te mau pahi taie no te vai maoro, eita roa ’tu e mataratara i roto atoa i te vero puai roa ’‘e. Oia atoa, ua haamauhia te faaipoiporaa no te vai tamau. A haamana‘o i ta Iesu i parau: “Ta te Atua i taati, eiaha ïa te taata e faataa ê.” (Mataio 19:6) Ia faaipoipo oe, e titauhia ia hi‘o atoa oe i te faaipoiporaa mai tera. Te auraa anei ïa e mea teimaha te faaipoiporaa? E ere.

21. E titauhia ia tapea te hoê tane faaipoipo e ta ’na vahine i teihea mana‘o no nia ia raua iho, e eaha ïa te tauturu ia raua?

21 E titauhia ia tapea te hoê tane faaipoipo e ta ’na vahine i te mana‘o tano no nia ia raua iho. Ia tutava raua tataitahi i te tiatonu i to raua mau huru maitatai e ta raua mau tutavaraa, e riro ïa te faaipoiporaa ei tumu o te oaoa e te haumârû.  Mea tano ore anei tera huru mana‘o maitai no nia i te hoê apiti tia ore? E ere roa ’tu Iehova i te mea tano ore, e nehenehe hoi tatou e turui i nia ia ’na no te tapea i te hoê mana‘o maitai no nia ia tatou. Ua ui te papai salamo: “Ahiri oe, e Iehova, e tapao na i te mau hara nei, o vai, e Iehova, te taata e mau?” (Salamo 130:3) E titauhia ia tapea te mau tane faaipoipo e te mau vahine faaipoipo i te hoê â mana‘o maitai e te faaore i te hapa a te tahi e te tahi.—A taio i te Kolosa 3:13.

22, 23. Mea nafea to Aberahama raua Sara riroraa ei hi‘oraa maitai no te feia faaipoipo i teie tau?

 22 E nehenehe te faaipoiporaa e riro ei haamaitairaa rahi atu â a vai tamau ai te reira i te roaraa o te mau matahiti. Te faaite mai ra te Bibilia i te oraraa o Aberahama raua o Sara i to raua ruhiruhiaraa. Ua roohia raua i te ati e te fifi. A feruri na ia Sara, ua 60 paha matahiti, ia faarue i to ’na nohoraa fana‘o i te oire ruperupe o Ura e ia ora i raro a‘e i te tiahapa no te toea o to ’na oraraa. Ua auraro oia i te tiaraa upoo o ta ’na tane. Ei apiti e ei tauturu no Aberahama, ua turu oia ma te faatura i te manuïaraa o ta ’na mau faaotiraa. E ere to ’na i te auraro na nia nia noa. “I roto ia ’na iho,” ua pii oia i ta ’na tane ei fatu no ’na. (Genese 18:12; Petero 1, 3:6) No roto mai to ’na faatura ia Aberahama i te aau.

23 Parau mau, e ere i te auraa e ua tu noa to Aberahama raua Sara mana‘o. I te hoê mahana, ua parau Sara i te hoê mea e ua “mauiui roa” Aberahama. Na nia râ i ta Iehova faaueraa, ua faaroo haehaa Aberahama i te reo o ta ’na vahine, a riro atu ai te reira ei haamaitairaa no te utuafare. (Genese 21:9-13) I teie tau e nehenehe te mau tane faaipoipo e te mau vahine faaipoipo, tei faaipoipo atoa tau ahuru matahiti i te maoro, e haapii rahi mai i teie nau hoa faaipoipo tei here i te Atua.

24. Teihea huru faaipoiporaa e faahanahana i te Atua ra o Iehova, e no te aha?

24 I roto i te amuiraa Kerisetiano, te vai ra e rave rahi tausani feia faaipoipo oaoa. Te faatura hohonu ra te vahine faaipoipo i ta ’na tane, te here ra e te faatura ra te tane faaipoipo i ta ’na vahine, e te haa amui ra raua e piti atoa no te rave na mua roa i te hinaaro o Iehova. Ia faaoti oe e faaipoipo, a maiti ïa i to oe apiti ma te paari e a faaineine maitai ia oe no te faaipoiporaa. E ia haa orua e piti atoa ia tupu te here e te hau o te faahanahana i te Atua ra o Iehova i roto i to orua oraraa faaipoipo. E tauturu mau â te reira ia orua ia tamau i te rave i te mau mea e here ai te Atua ia orua.

^ par. 11 A hi‘o i te pene 2 o Te ravea e itehia ’i te oaoa i te utuafare, piahia e te mau Ite no Iehova.

^ par. 12 Ua hau atu i te hoê noa vahine faaipoipo ta te tahi mau patereareha haapao maitai. I to Iehova haaraa e te mau patereareha e o Iseraela pae tino, ua vaiiho oia ia ratou ia faaipoipo e rave rahi apiti. Aita oia i haamau i te reira, ua taotia râ. E haamana‘o râ te mau Kerisetiano e aita Iehova e faatia faahou ra ia faaipoipo to ’na feia haamori e rave rahi apiti.—Mataio 19:9; Timoteo 1, 3:2.

No te ite atu â

E haafatata ’tu ia Iehova

“Ei haerea aroha to outou”

Te faahiti ra te Korinetia 1, 14 ravea no te faaite i te aroha i te tahi atu.