Eaha to roto?

Mau faaho'iraa ê

Tapura tumu parau

Ite no Iehova

Tahiti

Rave noa i te mau mea e here mai ai te Atua

 TUHAA HAU

E tapo‘i i te upoo, afea e no te aha?

E tapo‘i i te upoo, afea e no te aha?

Afea e no te aha e titauhia ’i ia tapo‘i te hoê tuahine i to ’na upoo i roto i te mau ohipa tei taaihia i ta ’na haamoriraa? E hi‘opoa ana‘e i ta te aposetolo Paulo i papai ma te arataihia e te varua o te Atua. Te horoa mai ra oia i te aratairaa ta tatou e hinaaro mau no te rave i te mau faaotiraa maitatai, o te faahanahana i te Atua. (Korinetia 1, 11:3-16) Te faaite ra Paulo e toru tuhaa e haapao: (1) te mau ohipa e titauhia ’i ia tapo‘i te hoê vahine i to ’na upoo, (2) te mau tupuraa e titauhia ’i ia na reira oia, e (3) te mau mana‘o turai e faatura ’i oia i teie ture aveia.

Te mau ohipa. Te faahiti ra Paulo e piti: te pure e te tohu. (Irava 4, 5) Parau mau, e aparauraa haamoriraa ia Iehova te pure. Te tohu i teie mahana, o te mau haapiiraa atoa ïa i niuhia i nia i te Bibilia ta te hoê tavini Kerisetiano e horoa. Te hinaaro ra anei ïa Paulo e parau e ia tapo‘i te hoê vahine i to ’na upoo i te mau taime atoa e pure ai aore ra e haapii ai oia i te parau mau Bibilia i te taata? Eita. Tei te huru hoi o te tupuraa.

Te mau tupuraa. Ia au i te mau parau a Paulo, te mana‘o ra oia e piti tupuraa, aore ra tuhaa ohiparaa: te utuafare e te amuiraa. Te na ô ra oia: “Te upoo o te vahine, o te tane ïa, . . . te  vahine atoa e pure aore ra e tohu aita te upoo i tapo‘ihia, ua faahaama ïa i to ’na upoo.” (Irava 3, 5) I roto i te utuafare, o te tane faaipoipo a te vahine ta Iehova i faataa ei upoo no ’na. Ia ore oia e farii ma te au i te mana faatere o ta ’na tane faaipoipo, e faahaama ïa o ’na i ta ’na tane ia amo oia i te mau hopoia ta Iehova i faataa no ’na. Ei hi‘oraa, mai te peu e e titauhia ia faatere o ’na i te hoê haapiiraa Bibilia e to reira ta ’na tane, e farii oia i to ’na mana faatere ma te tapo‘i i to ’na upoo. E na reira oia, noa ’tu e ua bapetizohia ta ’na tane aore ra aita, i te mea e o ’na te upoo utuafare. * Mai te peu e e titauhia ia pure aore ra ia haapii oia e to reira ta ’na tamaiti bapetizohia aitâ i raea te matahiti, e tapo‘i o ’na i to ’na upoo, eiaha no te mea o ’na te upoo utuafare, no te mana faatere râ i horoahia i te mau tane bapetizohia o te amuiraa Kerisetiano.

Te faahiti ra Paulo i te amuiraa i to ’na parauraa: “Ia mârô te tahi taata no te pee i te tahi atu peu, a parau atu i taua taata ra tera ana‘e ta tatou peu e ta te mau amuiraa o te Atua e aita ’tu.” (Irava 16) I roto i te amuiraa Kerisetiano, ua horoahia te mana faatere i te mau tane bapetizohia. (Timoteo 1, 2:11-14; Hebera 13:17) O te mau tane ana‘e te faatoroahia ei matahiapo e ei tavini tauturu e ua horoa te Atua ia ratou i te hopoia e aupuru i ta ’na nǎnǎ. (Ohipa 20:28) I te tahi râ mau taime, e anihia paha i te hoê vahine Kerisetiano ia rave i te hoê hopoia a te hoê tane bapetizohia. Ei hi‘oraa, e titauhia paha ia faatere oia i te hoê putuputuraa no te taviniraa, no te mea te tane bapetizohia faataahia no taua ohipa ra, aita ïa i vata aore ra aita i tae mai. Aore ra e faatere paha oia i te hoê haapiiraa Bibilia i te fare o te piahi tei faanaho-ê-hia na e to reira te hoê tane bapetizohia. * No te mea e tuhaa iho â taua mau ohipa ra o te tereraa o te amuiraa Kerisetiano, e tapo‘i ïa o ’na i to ’na upoo ei faaiteraa e te farii ra oia e e hopoia na te hoê tane ta ’na e rave ra.

 Teie râ, mea rahi te tuhaa o te haamoriraa aita e titauhia ra ia tapo‘i te hoê tuahine i to ’na upoo. Ei hi‘oraa, eita e titauhia ia na reira oia ia pahono oia i te mau putuputuraa Kerisetiano, ia apiti oia i te taviniraa na te mau fare e ta ’na tane faaipoipo aore ra te tahi atu tane bapetizohia, aore ra ia haapii aore ra ia pure oia e ta ’na mau tamarii bapetizo-ore-hia. Parau mau, e nehenehe te tahi atu â mau uiraa e hiti mai, e ia ore ia papu maitai i te hoê tuahine e nafea oia, e nehenehe oia e rave i te mau maimiraa hau. * Mai te peu e aita â i papu atura ia ’na e e turai to ’na mana‘o haava ia ’na ia tapo‘i i to ’na upoo, aita e ino ia na reira oia, mai ta te hoho‘a i nia nei e faaite ra.

Te mau mana‘o turai. I te irava 10, te ite ra tatou e piti tumu e hinaaro ai te hoê vahine Kerisetiano e haapao i teie titauraa: “No reira e mea tia ’i i te vahine ia tapo‘i i to ’na upoo no te faaiteraa i to ’na auraro i ta ’na tane, e no te mau melahi atoa.” A tapao na mua i te mau parau “te faaiteraa i to ’na auraro i ta ’na tane.” Ma te tapo‘i i to ’na upoo, te faaite ra ïa te hoê vahine e te farii ra o ’na i te mana faatere ta Iehova i horoa i te mau tane bapetizohia i roto i te amuiraa. Te faaite ra ïa o ’na i to ’na here e to ’na taiva ore no te Atua ra o Iehova. To roto te piti o te tumu i te mau parau “no te mau melahi atoa.” Eaha te taairaa o te tapo‘iraa te hoê vahine i to ’na upoo e taua mau varua puai ra?

Mea au na te mau melahi e ite i te mau faaiteraa i te faatura i te mana faatere o te Atua i roto i te faanahonahoraa a Iehova, i te ra‘i e i te fenua nei. Te faufaa-atoa-hia ra ratou i te mau hi‘oraa o te mau taata tia ore i roto i taua tuhaa ra. Inaha, e titauhia  ia auraro ratou atoa i te faanahoraa ta Iehova i rave, mea huru rahi hoi te melahi i mutaa ihora aita i haapao i te reira. (Iuda 6) I teie nei, te tapao ra paha te mau melahi i te tahi mau tupuraa e mea aravihi a‘e, mea ite a‘e e mea maramarama a‘e te hoê vahine Kerisetiano i te hoê tane bapetizohia i roto i te amuiraa. Teie râ, te auraro maite ra taua tuahine ra i te mana faatere o te taeae. I roto i te tahi mau tupuraa, e Kerisetiano faatavaihia te vahine o te riro a muri a‘e ei faatere e te Mesia. E tuuhia ïa taua vahine ra i nia i te hoê tiaraa teitei a‘e i to te mau melahi, a faatere atu ai e te Mesia i nia i te ra‘i. Auê ïa hi‘oraa maitai roa no te mau melahi o te tapao nei i te reira! Oia mau, maoti to ratou taiva ore e to ratou auraro, e fana‘oraa taa ê ta te mau tuahine atoa ia faaroo ma te auraro i mua i te aro o te mau mirioni melahi haapao maitai!

^ par. 3 I te tanoraa, eita te hoê tuahine e pure ma te reo puai e to reira ta ’na tane faaipoipo Kerisetiano. I roto râ i te tahi mau tupuraa taa ê, e nehenehe ta ’na, mai te peu e ei hi‘oraa eita ta ’na tane e nehenehe faahou e paraparau no te hoê ma‘i.

^ par. 1 Aita e faufaa ia tapo‘i te hoê tuahine i to ’na upoo ia faatere o ’na i te hoê haapiiraa Bibilia tamau e te hoê tane poro bapetizo-ore-hia e ere to ’na hoa faaipoipo.

^ par. 1 Ei haamaramaramaraa hau, a hi‘o i Te Pare Tiairaa o te 15 no Fepuare 2015, api 30 (Farani), o te 15 no Tiurai 2002, api 26-27 e te 1 no Tiunu 1977, api 349-352 (Farani).