Deuteronomi 18:1-22
18 “E ore te mau tahuˈa ati Levi, e te opu taatoa iho â ïa o Levi, e fanaˈo i te tahi fenua aore ra tuhaa e o Iseraela. E amu ratou i te mau tusia pûpûhia ia Iehova na roto i te auahi, o ta ˈna hoi tuhaa tera.+
2 Eiaha ïa ei tuhaa ta ratou i rotopu i to ratou mau taeae. O Iehova ta ratou tuhaa, mai ta ˈna iho â i parau ia ratou.
3 “Teie râ te tuhaa te tia i te mau tahuˈa ia fanaˈo no ǒ mai i te nunaa: Te taata atoa o te pûpû i te tahi tusia, e puaatoro oni anei aore ra e mamoe, e horoa ïa i te huha mua, na taa, e te vairaa maa na te tahuˈa.
4 E horoa oe na ˈna i ta oe mau huero maa matamua, ta oe uaina apî matamua, ta oe hinu matamua, e te huruhuru mamoe matamua o ta oe nǎnǎ mamoe tei hahuhia.+
5 Ua maiti Iehova to Atua ia ˈna e ta ˈna mau tamaiti no roto i to mau opu atoa no te tamau i te rave i ta ˈna taviniraa i te iˈoa o Iehova.+
6 “Mai te peu râ e faarue te tahi ati Levi hoê o to mau oire i Iseraela i reira oia e ora ˈi+ e e hinaaro oia e haere i te vahi ta Iehova e maiti,*+
7 e nehenehe oia e rave i ta ˈna taviniraa i reira i te iˈoa o Iehova to ˈna Atua mai to ˈna mau taeae atoa, te ati Levi, o te tavini ra i reira i mua ia Iehova.+
8 Hoê â tuhaa maa ta ˈna e fanaˈo e ta ratou,+ hau atu â i tei noaa mai ia ˈna ia hoo oia i ta ˈna faufaa no ǒ mai i to ˈna mau tupuna.
9 “Ua tomo anaˈe oe i te fenua ta Iehova to Atua e horoa nei no oe, eiaha oe e haapii i te rave atoa i te mau peu hairiiri a taua mau nunaa ra.+
10 Eiaha ia itehia i ǒ oe te taata o te horoa i ta ˈna tamaiti aore ra tamahine ia taninahia,+ te taata o te rave i te peu hiˈohiˈo,+ te taata o te rave i te peu manamana,+ te taata o te imi i te mau tapao,+ te taata tahutahu,+
11 te taata o te pifao, te taata o te haere e hiˈo i te hoê taata e demoni hiˈohiˈo to ˈna,+ te hoê taata hiˈohiˈo,+ aore ra te taata o te uiui i te feia pohe.+
12 Mea faufau hoi na Iehova te taata atoa o te rave ra i teie mau mea, e no teie mau peu hairiiri e tiahi ai Iehova to Atua ia ratou mai mua ia oe.
13 Ei haerea hapa ore to oe i mua ia Iehova to Atua.+
14 “I faaroo noa na tera mau nunaa ta oe e faaere nei i to ratou fenua i te feia e rave ra i te peu manamana+ e te peu hiˈohiˈo.+ Aita râ Iehova to Atua i faatia ia oe ia rave i te mau mea mai tera.
15 E horoa mai Iehova to Atua no oe no rotopu i to mau taeae i te tahi peropheta mai ia ˈu. E faaroo oe ia ˈna.+
16 E pahonoraa teie i ta oe i ani ia Iehova to Atua i Horeba i te mahana rururaa*+ i to oe parauraa: ‘Eiaha vau ia faaroo faahou i te reo o Iehova to ˈu Atua aore ra ia ite faahou i teie auahi rahi, ia ore au ia pohe.’+
17 Na ô maira Iehova ia ˈu: ‘Mea maitai ta ratou i parau.
18 E horoa vau no ratou no rotopu i to ratou mau taeae i te tahi peropheta mai ia oe.+ E tuu vau i ta ˈu mau parau i roto i to ˈna vaha,+ e e parau oia ia ratou pauroa ta ˈu e faaue ia ˈna.+
19 Oia mau, e faahapa vau i te taata o te ore e faaroo i ta ˈu mau parau ta ˈna e faahiti i to ˈu iˈoa.+
20 “‘Ia faahiti te tahi peropheta ma te teoteo i te tahi parau i to ˈu iˈoa ta ˈu i ore i faaue ia ˈna ia faahiti aore ra ia paraparau oia i te iˈoa o te tahi atu mau atua, e pohe taua peropheta ra.+
21 E na ô râ paha oe i roto i to aau: “E nafea matou e ite ai e aita Iehova i faahiti i tera parau?”
22 Ia paraparau te peropheta i te iˈoa o Iehova e eita te parau e tupu, aita ïa Iehova i faahiti i taua parau ra. Ua faahiti te peropheta i te reira ma te teoteo. Eiaha oe e mǎtaˈu ia ˈna.’
