• ALIZALIWA MWAKA WA: 1941

• INCHI: BENIN

• ALIKUWA: NA BIBI WENGI, NA ALIKUWA NAPINGA MASHAHIDI WA YEHOVA

MAISHA YANGU YA ZAMANI:

Nilizaliwa Cotonou, muji mukubwa wenye kuwa mu inchi ya Benin. Nilikuwa Katolike, lakini sikukuwa naenda sana ku kanisa. Ile wakati sheria iliruhusu wanaume kuwa na bibi wengi. Njo maana fasi kwenye nilikuwa naishi Wakatolike wengi walikuwa na bibi wengi. Na miye nilioa wanamuke ine.

Mu miaka ya 1970, kulitokea kikundi yenye ilipenda kuleta mabadiliko mu inchi ya Benin. Niliwaza kama ile kikundi itasaidia kumaliza magumu mu inchi yangu. Kwa hiyo niliiunga mukono na nikajiingiza mu mambo ya politike. Ile kikundi haikupenda Mashahidi wa Yehova juu hawakujiunga mu mambo ya politike. Nilikuwa kati ya watu wenye walitesa Mashahidi wa Yehova. Mu mwaka wa 1976, wamisionere Mashahidi walifukuzwa mu inchi ya Benin na niliwaza kama hawatarudiaka tena.

NAMNA BIBLIA IMEBADILISHA MAISHA YANGU:

Ile kikundi ya kupenda kuleta mabadiliko iliisha mu mwaka wa 1990. Muda kidogo kisha tu pale, nilishangala kuona wamisionere Mashahidi wa Yehova wanarudia tena. Nilianza kujiambia hivi: ‘Pengine Mungu iko upande wa Mashahidi wa Yehova.’ Ile wakati nilikuwa natumikia fasi ingine, na mumoja kati ya watu wenye nilikuwa natumika nao, alikuwa Shahidi wa Yehova. Na bila kukawia alianza kuniambia mambo yenye alikuwa anaamini. Alinionyesha maandiko ya Biblia yenye inaonyesha kama Yehova ni Mungu wa upendo na wa haki. (Kumbukumbu la Torati 32:4; 1 Yohana 4:8) Nilifurahia zile sifa na nilianza kujifunza mambo mingi juu ya Yehova. Kwa hiyo, nilikubali kuanza kujifunza Biblia.

Bila kukawia, nilianza kuenda ku mikutano ya Mashahidi wa Yehova. Upendo wenye niliona kule ulinigusa moyo sana. Hawakubagua watu juu tu ya rangi yao ya ngozi ao juu ya hali yao ya maisha. Kadiri niliendelea kupitisha wakati nao, niliona waziwazi kama walikuwa wanafunzi wa kweli wa Yesu.​—Yohana 13:35.

Nilielewa kama ikiwa ninapenda kumutumikia Yehova, nilipaswa kutoka mu kanisa Katoliki. Haikukuwa mwepesi juu niliogopa mambo yenye watu watasema. Kisha wakati murefu na kwa musaada wa Yehova, nilisimama sawa mwanaume na nikatoka mu kanisa Katoliki.

 Lakini nilipaswa kukamata uamuzi mwingine wa maana sana. Kujifunza Biblia kulinisaidia kuelewa kama Mungu hakubali mwanaume akuwe na bibi wengi. (Mwanzo 2:18-​24; Matayo 19:4-6) Mbele ya Yehova, ndoa yangu ya kwanza tu njo ilikuwa yenye kukubalika. Njo maana niliandikisha ndoa yangu ya kwanza na nikafukuza bibi zangu wengine. Lakini nilifanya mipango juu ya kutimiza mahitaji yao ya kimwili. Kisha wakati fulani, bibi zangu wawili wa zamani walifikia kuwa Mashahidi wa Yehova.

FAIDA YENYE NIMEPATA:

Hata kama bibi yangu angali tu Mukatoliki, anaheshimia uamuzi wangu wa kumutumikia Yehova. Naye anaona kama nimekuwa bwana muzuri.

Nilikuwa nawaza kama mambo ya politike itafanya nisaidie watu wa inchi yangu, lakini nilikuwa najidanganya. Ninaelewa sasa kama ni Ufalme wa Mungu tu njo utamaliza magumu ya wanadamu. (Matayo 6:9, 10) Ninamushukuru sana Yehova juu amenionyesha mambo yenye ninapaswa kufanya juu nikuwe na furaha ya kweli mu maisha.

• ALIZALIWA MWAKA WA: 1977

• INCHI: BRAZILI

• ALIKUWA: PASTERE MU KANISA YA PENTEKOSTE

MAISHA YANGU YA ZAMANI:

Nilikomalia mu muji wa Itu, mu Jimbo ya São Paulo. Kwenye nilikuwa naishi, watu walikuwa natendeana mubaya sana.

Nilikuwa napenda sana mambo ya kupigana-pigana sana na mambo ya uasherati. Zaidi ya ile, nilikuwa nauzisha dawa za kulewesha. Lakini nilifikia kuelewa kama nikiendelea na ile maisha, nitaishia mu gereza ao mu kaburi. Kwa hiyo, niliachana na ile maisha. Kisha nikaingia mu Kanisa ya Wapentekoste, na kisha wakati fulani nikakuwa pastere.

Niliona kama kuwa pastere mu ile kanisa, ingenipatia nafasi ya kusaidia wengine. Nilikuwa hata napitisha kipindi fulani ku radio, na ile ilifanya watu wengi wanijue. Lakini nilifikia kuona kama viongozi wa kanisa hawakukuwa nahangaikia watu kabisa na hawakukuwa hata natafuta kumutukuza Mungu. Niliona kuwa viongozi wa dini walikuwa tu natafuta makuta. Kwa hiyo niliamua kuachana na mambo ya kanisa.

NAMNA BIBLIA IMEBADILISHA MAISHA YANGU:

Wakati nilianza kujifunza Biblia na Mashahidi wa Yehova, bila kukawia nilitambua kama wako tofauti na dini zingine. Kulikuwa mambo mbili yenye ilinigusa moyo. Kwanza, Mashahidi wa Yehova hawafundishake tu kama tunapaswa kupenda Mungu na jirani, wanaonyeshaka ile upendo mu matendo. Na pili, hawajiingizake mu mambo ya politike na ya vita. (Isaya 2:4) Ile mambo mbili ilifanya niamini kabisa kama nimepata dini ya kweli, barabara yenye inaongoza ku uzima wa milele.​—Matayo 7:13, 14.

Nilielewa kama juu nimupendeze Mungu, nilipaswa kufanya mabadiliko fulani ya maana. Iliomba nianze kuhangaikia sana familia yangu na nijikaze kuwa munyenyekevu.  Haikukuwa mwepesi kufanya mabadiliko, lakini kwa musaada wa Yehova niliweza. Bibi yangu alishangala sana kuona mabadiliko yenye nilifanya. Yeye njo alianzaka kwanza kujifunza Biblia, lakini sasa alianza kufanya maendeleo haraka sana. Bila kukawia siye wote wawili tuliamua kuwa Mashahidi wa Yehova na tukabatizwa siku moya.

FAIDA YENYE NIMEPATA:

Miye na bibi yangu tunafurahi kusaidia watoto wetu watatu wakuwe pia marafiki wa Yehova. Familia yetu iko na furaha. Namushukuru Yehova juu amenisaidia nijue kweli yenye inapatikana mu Neno yake Biblia. Kwa kweli, mafundisho ya Biblia inabadilishaka maisha ya watu! Miye peke nimejionea vile.

• ALIZALIWA MWAKA WA: 1957

• INCHI: AUSTRALIA

• ALIKUWA: NA MAISHA YA MAGUMU WAKATI ALIKUWA MUTOTO

MAISHA YANGU YA ZAMANI:

Nilikomalia mu muji wa Newcastle, katika New South Wales. Tuko watoto saba, na miye njo wa kwanza. Baba yetu alikuwa mulevi na mwenye jeuri na mama yetu naye alikuwa mwenye jeuri. Mama yangu alikuwa nanipiga na kunitukana. Mara mingi alikuwa ananiambia kama niko mutoto mubaya, na nitaendaka mu moto wa mateso. Ile iliniogopesha sana.

Mara mingi sikukuwa naenda ku masomo juu ya vidonda vyenye mama yangu alikuwa ananilumiza. Wakati nilikuwa na 11, walinitosha mu mikono ya wazazi wangu na kunipeleka mu nyumba ya kuchungia watoto yenye inasimamiwa na watawa wanamuke. Wakati nilikuwa na miaka 14, nilitoroka ku ile nyumba. Sikupenda kurudia kwetu, kwa hiyo nikaanza kuishi mu barabara za Sydney.

Wakati nilikuwa naishi mu barabara, nilianza kutumia dawa za kulewesha, kunywa pombe sana, kuangalia pornografia, na nikakuwa kahaba. Siku fulani, jambo moja iliniogopeshaka sana. Nilikuwa nalala kwa mwanaume mumoya mwenye alikuwa na fasi ya kukunywia pombe usiku na kucheza. Mangaribi moja wanaume wawili walikuja kumuona. Akanituma mu chumba, lakini nilikuwa nasikia mambo yenye walikuwa nazungumuza. Alikuwa napenda kuniuzisha kwa wale wanaume. Wangenificha mu mashua ya mizigo na kunipeleka Japani juu nianze kutumika kule ku fasi ya kuuzishia. Niliogopa sana, na nikaruka na kukimbia.

Mu barabara nilikutana na mwanaume fulani mwenye alikuwa natembelea Sydney, nilimuelezea hali yangu na nilitumaini kama atanipatia makuta kidogo. Lakini, aliniambia nikuye kwake juu ninawe na nikule kitu fulani. Na njo nikabakia kwake. Kisha mwaka mumoja tukaoana.

NAMNA BIBLIA IMEBADILISHA MAISHA YANGU:

Wakati nilianza kujifunza na Mashahidi wa Yehova, wakati fulani nilikuwa nasikia kasirani na wakati ingine nilikuwa nasikia kitulizo. Nilikasikirika sana kujua kama Shetani njo anatuleteaka mambo ya mubaya; juu tangu zamani walikuwa wananiambia kama ni Mungu njo anatuleteaka mateso. Lakini nilisikia kitulizo wakati nilijifunza kama Mungu hatesake watu mu moto wa mateso,  juu ile fundisho ilikuwaka naniogopesha sana tangu zamani.

Niliguswa moyo sana kuona namna Mashahidi wa Yehova wanaachaka mawazo ya Biblia iwaongoze wakati wako nakamata maamuzi. Wanatumikishaka mambo yenye Biblia inasema. Nilikuwa mutu wa kukosana-kosana na watu, lakini Mashahidi walikuwa nanitendea kwa upendo na kwa heshima hata niseme nini ao nifanye nini.

Jambo yenye ilinisumbua sana ni kujisikia kama niko mutu wa bure. Nilikuwa najichukia na niliendelea kujichukia kwa muda murefu hata kisha kubatizwa. Nilimupenda Yehova, lakini nilikuwa hakika kama Yehova hawezi kupenda mutu sawa miye.

Miaka 15 hivi kisha ubatizo wangu, mambo ilibadilika kabisa. Wakati nilikuwa nasikiliza hotuba ku mukutano wa Mashahidi wa Yehova ku Jumba ya Ufalme, musemaji alizungumuzia Yakobo 1:23, 24. Ile maandiko inaonyesha kama Neno ya Mungu iko sawa vile kioo yenye inatusaidia tujione vile Yehova anatuonaka. Nilianza kujiuliza hivi: Ninajionaka vile Yehova ananionaka kabisa? Ku mwanzo, sikupenda kukubali ile jambo. Niliendelea kuwaza tu kama Yehova hawezi kunipenda.

Kisha masiku fulani, nilisoma andiko yenye ilibadilisha maisha yangu. Nilisoma Isaya 1:18. Mu ile andiko Yehova anasema hivi: “Mukuje, tunyooshe mambo kati yetu. . . . Hata kama zambi zenu ziko na rangi nyekundu yenye kungaa, zitafanywa kuwa nyeupe kama teluji.” Ni sawa vile Yehova alikuwa ananiambia: “Vicky, kuya tutengeneze mambo. Ninakujua, ninajua zambi zako, ninajua moyo wako, na ninakupenda.”

Ile usiku sikulala. Niliendelea kujiuliza ikiwa Yehova anaweza kunipenda kabisa, lakini nilianza kuwaza juu ya zabihu ya ukombozi ya Yesu. Na palepale nikaelewa kama Yehova alikuwa amenivumilia kwa wakati murefu, na kunionyesha kama ananipenda mu njia za mingi. Lakini, ni sawa vile nilikuwa namuambia: “Upendo wako ni wa kidogo, hauwezi kunifikia. Bei ya ukombozi ya mwana wako haiwezi kufunika zambi zangu.” Ni sawa vile nilikuwa namurudishia Yehova bei yake ya ukombozi. Lakini ile usiku, wakati nilitafakari sana juu ya bei ya ukombozi, kwa mara ya kwanza nilijisikia kama Yehova ananipenda.

FAIDA YENYE NIMEPATA:

Sasa niko safi, na ninafurahia maisha. Ndoa yangu imekuwa muzuri, na niko na furaha juu ninaweza kutumikisha mambo yenye ilinifikia mu maisha juu ya kusaidia wengine. Ninajisikia kuwa karibu sana na Yehova.

• ALIZALIWA MWAKA WA: 1974

• INCHI: URUSI

• ALIKUWA: NAPENDA SANA MUZIKI WA HEAVY-METAL

MAISHA YANGU YA ZAMANI:

Nilizaliwa Votkinsk, muji kwenye Pyotr Ilich Tchaikovsky, mutungaji wa muziki mwenye kujulikana alizaliwa. Familia yetu ilikuwa maskini. Baba yangu alikuwa na sifa mingi za muzuri, lakini alikuwa mulevi. Kwa hiyo, mara mingi mwetu mulikuwa tu hali ya kukosa kuelewana.

Sikukuwaka naweza sana ku masomo, na kadiri miaka ilikuwa napita, nilianza kujiona kuwa mutu wa bure. Sikukuwa na rafiki na sikutumainia wengine. Masomo ilikuwa nanichokesha. Kwa mufano, wakati  nilipaswa kufasiria wengine jambo fulani ku masomo, mara mingi nilikuwa hata nashindwa kufasiria mambo ya teketeke yenye wakati ingine ninawezaka kufasiria. Mwaka fulani wakati nilikuwa ku masomo ya segondere, ku cheti yangu (ao bulletin) kulikuwa hii maneno: “Hajue maneno mingi, na hajue kueleza mawazo yake muzuri.” Ile maneno ilinivunja moyo sana na nikajiona hata zaidi kuwa mutu wa bure. Nilianza kujiuliza juu ya nini tuko naishi.

Wakati nilikuwa kijana, nilianza kunywa pombe. Ku mwanzo, pombe ilinifanya nijisikie muzuri, lakini wakati nililewa, zamiri ilianza kunisumbua. Sikuona maana ya kuendelea kuishi. Nilivunjika moyo sana na wakati fulani nilijifungia mu nyumba kwa muda wa siku mingi. Nilianza kuwa na mawazo ya kujiua.

Wakati nilieneza miaka 20, nilipata jambo fulani ya kunituliza. Lakini ilikuwa ya muda mufupi tu. Nilianza kusikiliza muziki wa heavy-metal. Ulinichangamusha na nikaanza kupitisha wakati na watu wenye wanapendaka kuusikiliza. Nilikomalisha nywele, nikatobolewa masikio na nilikuwa navala sawa wapiga-muziki wenye nilikuwa napenda. Bila kukawia, nikakuwa mutu wa fujo, mukali, na kila mara nilikuwa nakosana na watu wa familia yangu.

Niliwaza kama kusikiliza muziki wa heavy-metal kungenisaidia nikuwe na furaha. Lakini mambo haikukuwa vile, niliharibika zaidi! Na wakati nilivumbula mambo ya mubaya yenye wanamuziki wenye nilikuwa napenda walikuwa nafanya, nilihuzunika sana.

Tena, nikaanza kuwa na mawazo ya kujiua. Na mara hii, nilipenda tu kufa. Jambo moya tu yenye ilinizuia ni kufikiria huzuni yenye mama yangu atabakia nayo. Alikuwa ananipenda sana na alikuwa ananifanyia mambo mingi sana. Hali ilikuwa nguvu sana. Sikupenda kuendelea kuishi, na nilishindwa kujiua.

Juu ya kubadilisha mawazo, nilianza kusoma maandishi ya zamani ya Warusi. Ilizungumuzia mambo yenye mwanaume fulani mwenye alikuwa natumika mu kanisa alifanya juu ya kusaidia watu. Ile ilinipatia hamu ya kufanya jambo fulani juu ya Mungu na kusaidia watu wengine. Kwa mara ya kwanza, nilisali kwa Mungu. Nilimuomba anisaidie kujua mambo yenye nilipaswa kufanya juu maisha yangu ikuwe na kusudi. Wakati nilkuwa nasali, nilijisikia ninatulia kabisa. Lakini jambo ingine ya kushangaza ilitokea kisha pale. Saa mbili kisha kutoa ile sala, Shahidi wa Yehova aligonga ku mulango yangu na akaniomba nianze kujifunza Biblia. Ninaamini kama ile ilikuwa jibu ya sala yangu. Ile njo siku nilianza kuwa na maisha yenye furaha.

NAMNA BIBLIA IMEBADILISHA MAISHA YANGU:

Nilitupa kila kitu yenye ilikuwa na uhusiano na muziki wa heavy-metal, hata kama haikukuwa mwepesi kufanya vile. Lakini, ile muziki ilinibakia mu kichwa siku mingi. Wakati nilikuwa napita fasi kwenye ile muziki iko napiga, nilikuwa nakumbuka maisha yangu ya zamani. Sikupenda kuendelea kukumbuka ile mambo, juu mu moyo wangu na mu akili yangu mulikuwa mulishakuwa mambo ya muzuri. Kwa hiyo, niliamua kuepuka kupita fasi za viIe. Na wakati niliona kama niko nafikiria sana maisha yangu ya zamani, nilisali sana kwa Yehova. Ile ilinisaidia nikuwe na “amani ya Mungu yenye kupita uelewaji wote.”​—Wafilipi 4:7.

Wakati niliendelea kujifunza Biblia, nilielewa kama Wakristo wanapaswa kuelezea wengine mambo yenye wanaamini. (Matayo 28:19, 20) Nilikuwa nawaza kama sitawezaka kufanya vile. Lakini, mambo yenye nilikuwa najifunza ilikuwa nafanya nikuwe na furaha na nitulie. Nilijua kama wengine pia wako na lazima ya kuisikia. Nilitia woga pembeni na nilianza kuambia wengine juu ya mambo yenye nilikuwa najifunza. Jambo ya kushangaza ni kwamba, kuhubiria wengine kulinisaidia niache kujiona kuwa mutu wa bure na kulitia imani yangu nguvu.

FAIDA YENYE NIMEPATA:

Sasa nimeoa na tuko na furaha mu ndoa yetu. Tena nimesaidia watu wengi kujifunza Biblia. Kati ya wale watu kuko mama yangu na dada yangu. Kumutumikia Mungu na kusaidia wengine wamujue kumefanya maisha yangu ikuwe na kusudi.